អញ្ជើញទទួលគណៈប្រតិភូនៅអាកាសយានដ្ឋានអន្តរជាតិណូយបាយ មានរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យា លោក វូ ហាយក្វឹន (Vu Hai Quan); អនុរដ្ឋមន្ត្រីក្រសួងការបរទេស លោកស្រី ង្វៀន មិញហាំង (Nguyen Minh Hang); និងឯកអគ្គរដ្ឋទូតវៀតណាមប្រចាំប្រទេសឈីលី លោក ង្វៀន វៀតគឿង (Nguyen Viet Cuong)។

ដំណើរបំពេញទស្សនកិច្ចរបស់ប្រធានាធិបតីនៃសាធារណរដ្ឋឈីលី លោក ហ្សូសេ អានតូនីញ៉ូ កាស មកកាន់វៀតណាម គឺប្រព្រឹត្តទៅក្នុងបរិបទដែលទំនាក់ទំនងវៀតណាម-ឈីលី កាន់តែអភិវឌ្ឍន៍យ៉ាងជាក់ស្តែង និងមានប្រសិទ្ធភាព។ យោងតាមឯកអគ្គរដ្ឋទូតវៀតណាមប្រចាំប្រទេសឈីលី លោក ង្វៀន វៀតគឿង នេះជាលើកទីមួយហើយដែលប្រធានាធិបតី ហ្សូសេ អានតូនីញ៉ូ កាស អញ្ជើញបំពេញទស្សនកិច្ចផ្លូវការនៅវៀតណាម ក្នុងនាមជាប្រមុខរដ្ឋ។ ដំណើរបំពេញទស្សនកិច្ចគឺជាព្រឹត្តិការណ៍ដ៏សំខាន់បំផុតក្នុងឆ្នាំខួបលើកទី៥៥ នៃទំនាក់ទំនងវៀតណាម-ឈីលី (២៥ មីនា ១៩៧១ - ២៥ មីនា ២០២៦) ជាឱកាសសម្រាប់ថ្នាក់ដឹកនាំប្រទេសទាំងពីរ រំលឹកឡើងវិញនូវកំណាត់ផ្លូវរយៈពេល ៥៥ ឆ្នាំកន្លងមក និងកំណត់ទិសដៅសម្រាប់ដំណាក់កាលអភិវឌ្ឍន៍បន្តទៀតនៃទំនាក់ទំនងភាពជាដៃគូទូទៅ ជំរុញយន្តការសហប្រតិបត្តិការដែលមានស្រាប់ឱ្យដំណើរការបានកាន់តែមានប្រសិទ្ធភាព។

ដំណើរបំពេញទស្សនកិច្ចក៏មានអត្ថន័យហួសពីក្របខ័ណ្ឌទ្វេភាគីផងដែរ។ វៀតណាម និងឈីលី សុទ្ធតែជាសមាជិកនៃវេទិកាសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) និងកិច្ចព្រមព្រៀងគ្រប់ជ្រុងជ្រោយនិងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP)។ ការដែលវៀតណាមកាន់តួនាទីជាប្រធាន CPTPP ឆ្នាំ២០២៦ និងធ្វើជាម្ចាស់ផ្ទះរៀបចំ APEC ឆ្នាំ២០២៧ គឺជាឱកាសដើម្បីបង្កើនកិច្ចសហការជាមួយបណ្តាសមាជិកអាមេរិកឡាទីន ដែលក្នុងនោះប្រទេសឈីលីគឺជាដៃគូដ៏ជិតស្និទ្ធ៕