ສືບເນື່ອງການຢ້ຽມຢາມ ຫວຽດນາມ ຢ່າງເປັນທາງການຂອງ ທ່ານ ບຸນຍັງ ວໍລະຈິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ທີ່ຫາກໍ່ສິ້ນສຸດລົງດ້ວຍຜົນສໍາເລັດຢ່າງຈົບງາມໃນທ້າຍເດືອນເມສາ ຜ່ານມາ, ທ່ານທອງລຸນ ສີສຸລິດນາຍົກລັດຖະມົນຕີ ແລະ ພັນລະຍາພ້ອມດ້ວຍຄະນະຜູ້ແທນຂັ້ນສູງແຫ່ງ ສປປ ລາວກໍ່ໄດ້ເດີນທາງມາຢ້ຽມຢາມ ຫວຽດນາມ ຢ່າງເປັນທາງການນັບແຕ່ວັນທີ 15-17 ພຶດສະພາ 2016 ແລະ ນີ້ກໍ່ແມ່ນການຢ້ຽມຢາມຕ່າງປະເທດຄັ້ງທຳອິດໃນຖານະດໍາລົງຕໍາແໜ່ງໃໝ່ເປັນນາຍົກລັດຖະມົນຕີຂອງທ່ານ ທອງລຸນ ສິີສຸລິດ. ການຢ້ຽມຢາມ ຫວຽດນາມ ຄັ້ງນີ້ເປັນການຢືນຢັນອີກເທື່ອໜຶ່ງເຖິງສາຍພົວພັນມິດຕະພາບອັນເປັນມູນເຊື້ອ,ຄວາມສາມັກຄີແບບພິເສດ ລະຫວ່າງ ສອງປະເທດ ຫວຽດນາມແລະ ລາວ ອ້າຍນ້ອງ.
ໃນຂອບຂອງການຢ້ຽມຢາມ ຫວຽດນາມ, ທ່ານນາຍົກ ລັດຖະມົນຕີທອງລຸນ ສີສຸລິດ ໄດ້ພົບປະເຈລະຈາກັບທ່ານນາຍົກລັດຖະມົນຕີຫງວຽນຊວນຟຸກ;ເຂົ້າຢ້ຽມຂໍ່ານັບທ່ານເລຂາທິການໃຫຍ່ ຫງວຽນຝູ໋ຈ້ອງ,ທ່ານປະທານປະເທດເຈີ່ນດ້າຍກວາງ;ພົບປະກັບປະທານສະພາແຫ່ງຊາດທ່ານນາງຫງວຽນທິກິມເງິນ, ທ່ານເລຂາຄະນະພັກນະຄອນ ໂຮ່ຈີມິນ ດິງລາທັງ;ວາງພວງມາລາທີ່ອະນຸສອນສະຖານ ວິລະຊົນຜູ້ເສຍສະຫຼະຊີວິດເພື່ອຊາດ; ວາງພວງມາລາແລະ ເຂົ້າຢ້ຽມຂໍ່ານັບຢູ່ສຸສານປະທານ ໂຮ່ຈີມິນ.
ທ່ານນາຍົກລັດຖະມົນຕີ ຫງວຽນຊວນຟຸກ ຕ້ອນຮັບທ່ານນາຍົກ
ລັດຖະມົນຕີ ທອງລຸນ ສີສຸລິດ. ພາບ: ຖົ໋ງເຍິດ/VNA
ທ່ານນາຍົກລັດຖະມົນຕີທັງສອງໄດ້ເປັນສັກຂີພິຍານໃນການ
ລົງນາມໃນຂໍ້ຕົກລົງຮ່ວມມືລະຫວ່າງກະຊວງແຜນການ ແລະ ການລົງທຶນສອງປະເທດ.ພາບ: ຖົ໋ງເຍິດ/VNA
ໃນບັນດາການພົບປະຫາລື ແມ່ນໄດ້ດໍາເນີນໄປດ້ວຍບັນຍາກາດຊະໜິດສະໜົມ, ເຊື່ອໝັ້ນເຊິ່ງກັນ ແລະ ກັນແລະ ເຕັມໄປດ້ວຍຈໍ້າໃຈມິດປະພາບຖານອ້າຍນ້ອງ.ທັງສອງຝ່າຍມີຄວາມເພິ່ງພໍໃຈຕໍ່ສາຍພົວພັນແບບພິເສດ ແລະ ການຮ່ວມມືຮອບດ້ານລະຫວ່າງຫວຽດນາມ-ລາວຊຶ່ງຍາມໃດກໍ່ໄດ້ຮັບການປັບປຸງ, ພັດທະນາ,ນັບມື້ນັບສະໜິດຕິດພັນແລະໄວ້ເນື້ອເຊື່ອໃຈກັນຢ່າງບໍ່ຢຸດຢັ້ງ. ສືບຕໍ່ຢືນຢັນສາຍພົວພັນມິດຕະພັນອັນເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ-ລາວ, ລາວ-ຫວຽດນາມ ແມ່ນຊັສົມບັດລວມທີ່ລຳ້ຄ່າຂອງສອງພັກ, ສອງຊາດ, ແມ່ນກົດເກນແຫ່ງການຄົງຕົວ ແລະຂະຫຍາຍຕົວ, ແມ່ນການ ພົວພັນເປັນຕາຍແລະ ແມ່ນແຫຼ່ງພະລັງແຮງທີ່ສຳຄັນສຳລັບພາລະກິດປົກປັກຮັກສາ ແລະ ພັດທະນາຢູ່ແຕ່ລະ ປະເທດ, ປະກອບສ່ວນຢ່າງຕັ້ງໜ້າໃຫ້ແກ່ສັນຕິພາບ, ສະຖຽນລະພາບ, ການຮ່ວມມື, ພັດທະນາຢູ່ພາກພື້ນ ແລະ ໂລກ, ຕ້ອງປົກປັກຮັກສາ,ເພີ່ມພູນຄູນສ້າງ,ເສີມຂະຫຍາຍ ແລະ ຖ່າຍທອດ ຄືນໃຫ້ບັນດາຄົນລຸ້ນຫຼັງ.
ສອງຝ່າຍຢືນຢັນວ່າ ຈະສົມທົບກັນຢ່າງແໜ້ນແຟ້ນເພື່ອຈັດຕັ້ງ, ປະຕິບັດເປັນຢ່າງດີບັນດາຂໍ້ຕົກລົງຮ່ວມກັນຂອງການນຳຂັ້ນສູງສອງປະເທດກ່ຽວກັບການເພີ່ມທະວີການພົວພັນດ້ານການເມືອງ, ການຕ່າງປະເທດ,ປ້ອງກັນຊາດ,ປ້ອງກັນຄວາມສະຫງົບກໍ່ຄືການຮ່ວມມືໃນຂົງເຂດເສດຖະກິດ,ການຄ້າ, ການລົງທຶນ;ເຫັນດີເປັນເອກະພາບກັນຈະຊີ້ນຳບັນດາກະຊວງ,ຂະແໜງການແລະທ້ອງຖິ່ນ ຜັນຂະຫຍາຍປະຕິບັດຢ່າງມີປະສິດທິຜົນແຜນການຮ່ວມມື ລະຫວ່າງສອງລັດຖະບານໃນປີ 2016 ແລະ ສັນຍາຮ່ວມມືສອງຝ່າຍ ຫວຽດນາມ-ລາວ ໄລຍະ 2016-2020;ສືບຕໍ່ປັບປຸງບູລະນະຄະນະກຳມະການຮ່ວມລະຫວ່າງລັດຖະບານກ່ຽວກັບການຮ່ວມມືສອງຝ່າຍ ເພື່ອເຮັດໃຫ້ກົນໄກການພົວພັນດັ່ງກ່າວນີ້ບັນລຸໝາກຜົນສູງສຸດ.
ທ່ານເລຂາທິການໃຫຍ່ ຫງວຽນຝູ໋ຈ້ອງ ພົບປະກັບ ທ່ານນາຍົກລັດຖະມົນຕີ ທອງລຸນ ສີສຸລິດ. ພາບ: ຈີ໋ຢຸງ/VNA
ທ່ານປະທານປະເທດ ເຈີ່ນດ້າຍກວາງ ພົບປະກັບທ່ານນາຍົກລັດຖະມົນຕີ ທອງລຸນ ສີສຸລິດ. ພາບ: ຍ໋ານຊາງ/VNA
ປະທານສະພາແຫ່ງຊາດທ່ານນາງ ຫງວຽນທິກິມເງິນ
ພົບປະກັບທ່ານນາຍົກລັດຖະມົນຕີ ທອງລຸນ ສີສຸລິດ. ພາບ: ຈ້ອງດຶກ/VNA
ທ່ານ ດິງລາທັງ, ເລຂາຄະນະພັກນະຄອນ ໂຮ່ຈີມິນ ພົບປະ ແລກປ່ຽນຄວາມຄິດຄວາມເຫັນ
ກັບທ່ານນາຍົກລັດຖະມົນຕີ ທອງລຸນ ສີສຸລິດ. ພາບ: ແທງຫວູ/VNA
ສອງຝ່າຍເປັນເອກະສັນຈະສົມທົບກັນຜັນຂະຫຍາຍປະຕິບັດຢ່າງມີປະສິດທິຜົນບັນດາຂໍ້ຕົກລົງຮ່ວມມືທີ່ສອງປະເທດຫາກໍ່ເຊັນນໍາກັນໃນປີ 2015; ຢືນຢັນຈະສົມທົບກັນເພື່ອຜັຂະຫຍາຍປະຕິບັດເປັນຢ່າງດີອະນຸສັນຍາວ່າດ້ວຍການຮ່ວມມືດ້ານປ້ອງກັນຊາດ,ປ້ອງກັນຄວາມສະຫງົບ ໄລຍະປີ 2016-2020.
ສອງຝ່າຍຕົກລົງກັນຈະສືບຕໍ່ຍົກສູງຄຸນນະພາບການຮ່ວມມືກໍ່ ສ້າງ ແລະ ພັດທະນາແຫຼ່ງຊັບພະຍາກອນມະນຸດ; ສົມທົບກັນ ຢ່າງແໜ້ນແຟ້ນ ແລະ ເພີ່ມທະວີການຮ່ວມມືກັນໃນບັນດາເວທີພາກພື້ນ ແລະ ສາກົນ; ສົມທົບກັນຢ່າງແໜ້ນແຟ້ນລະຫວ່າງສອງປະເທດແລະ ກັບບັນດາປະເທດ,ກັບບັນດາອົງການຈັດຕັ້ງສາກົນໃນການ ຄຸ້ມຄອງ, ນຳໃຊ້ແຫຼ່ງແມ່ນຳ້ຂອງຢ່າງຍືນຍົງແລະມີປະສິດທິພາບ.ໃນໂອກາດນີ້, ທ່ານນາຍົກລັດຖະມົນຕີທັງສອງໄດ້ເປັນສັກຂີພິຍານພິທີລົງນາມເອກະສານຈຳນວນໜຶ່ງລະຫວ່າງບັນດາກະຊວງ, ຂະແໜງການ,ທ້ອງຖິ່ນຂອງ ຫວຽດນາມ ແລະ ລາວ; ເປັນສັກຂີພິຍານໃນເຫດການ ທະນາຄານ VietinBank ຊ່ວຍເຫຼືອ ລາວ 200.000USDເພື່ອຂະຫຍາຍວຽກງານສະວັດດີການສັງຄົມ.
ປະຕິບັດໂດຍ:VNA/VNP