ດ້ວຍຕຳແໜ່ງປະທານປະເທດ, ທ່ານ ເຈິ່ນດ້າຍກວາງ ໄດ້ເອົາໃຈໃສ່ຕໍ່ວຽກງານພົວພັນຕ່າງປະເທດທີ່ສຸດ ເພື່ອຍົກສູງຖານະບົດບາດຂອງ ຫວຽດນາມ ບົນເວທີສາກົນ ແລະ ສ້າງຂີດໝາຍຫຼາຍຢ່າງ. ຂີດໝາຍນັ້ນໄດ້ສະແດງອອກຢ່າງຈະແຈ້ງທີ່ສຸດ ຜ່ານເຫດການ ສັບປະດາຂັ້ນສູງ APEC 2017 ຢູ່ ຫວຽດນາມ. ດ້ວຍຕຳແໜ່ງເປັນປະທານ ຂອງປະເທດເຈົ້າພາບ, ທ່ານປະທານປະເທດ ເຈິ່ນດ້າຍກວາງ ໄດ້ປະຕິບັດໜ້າທີ່ສຳຄັນດ້ວຍຜົນສຳເລັດຢ່າງຈົບງາມ ໂດຍຕາງໜ້າໃຫ້ແກ່ປະເທດຊາດ ໃນການຕ້ອນຮັບ, ເປັນປະທານບັນດາກອງປະຊຸມສຳຄັນທີ່ສຸດ,  ປຶກສາຫາລືຢ່າງຈິງໃຈ, ກົງໄປກົງມາກ່ຽວກັບບັນດາບັນຫາໃຫຍ່ຂອງ APEC ກັບບັນດາຜູ້ນຳໜ້າບັນດາປະເທດສະມາຊິກ APEC. ໃນບັນດາການພົບປະ, ທ່ານປະທານປະເທດ ເຈິ່ນດ້າຍກວາງ ໄດ້ສະແດງຖານະບົດບາດຂອງຫວຽດນາມ ດ້ວຍການຢັ້ງຢືນວ່າບັນດາປະເທດຄູ່ຮ່ວມມືແມ່ນເພື່ອນມິດ, ແມ່ນຄູ່ຮ່ວມມືຮອບດ້ານ ໂດຍການເຄົາລົບເຊິ່ງກັນ ແລະ ກັນ, ເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ ແລະ ລະບອບການເມືອງ, ພ້ອມນັ້ນສະແດງໃຫ້ເຫັນວ່າສາຍພົວພັນຄູ່ຮ່ວມມືຮອບດ້ານລະຫວ່າງ ຫວຽດນາມ ແລະ ບັນດາຄູ່ຮ່ວມມືກຳລັງພັດທະນາຢ່າງແທດຈິງ ແລະ ມີປະສິດທິຜົນ.

ໃນຕະຫຼອດອາຍຸການຂອງຕົນ, ທ່ານປະທານປະເທດ ເຈິ່ນດ້າຍກວາງ  ກໍ່ມີການພົບປະຫຼາຍຄັ້ງກັບການນຳຫຼາຍປະເທດໃນໂລກ ແລະ ດ້ວຍຄວາມເກັ່ງກ້າສາມາດດ້ານການພົວພັນຕ່າງປະເທດຂອງທ່ານ, ຫວຽດນາມໄດ້ສ້າງບັນດາຂີດໝາຍອັນດີງາມໃນຈິດໃຈການນຳບັນດາປະເທດເພື່ອນມິດ.

(​ແຫຼ່ງຄັດ​ຈາກ VOV)