នាយប់ថ្ងៃទី ២៦ ខែកញ្ញា
ម៉ោងក្នុងស្រុក នៅវិមានបដិវត្តន៍ក្នុងរដ្ឋធានី La Habana បន្ទាប់ពីបញ្ចប់កិច្ចចរចាកម្រិតខ្ពស់ដោយជោគជ័យ
លេខាទីមួយ ប្រធានរដ្ឋគុយបា លោក Miguel Díaz Canel Bermudez បានធ្វើជាអធិបតីក្នុងពិធីប្រគល់គ្រឿងឥស្សរិយយស
Jose Marti ជូនចំពោះអគ្គលេខាបក្ស ប្រធានរដ្ឋវៀតណាម លោក តូ
ឡឹម។
នេះគឺជាពានរង្វាន់ខ្ពង់ខ្ពស់បំផុតរបស់បក្សនិងរដ្ឋគុយបាដើម្បីទទួលស្គាល់ការរួមវិភាគទានរបស់លោកអគ្គលេខាបក្ស
ប្រធានរដ្ឋតូ ឡឹម ក្នុងការអភិវឌ្ឍសាមគ្គីភាព មិត្តភាព
និងទំនាក់ទំនងស្មោះត្រង់រវាងបក្ស រដ្ឋ និងប្រជាជនវៀតណាមនិងគុយបា។
អញ្ជើញថ្លែងមតិក្នុងពិធីនេះ
អគ្គលេខាបក្ស ប្រធានរដ្ឋតូ ឡឹម បានមានប្រសាសន៍ថា៖ “វៀតណាមមានបំណងចង់បង្កើនប្រសិទ្ធភាពនៃកិច្ចសហប្រតិបត្តិការលើគ្រប់វិស័យវៀតណាម-គុយបាឲ្យសក្តិសមជាមួយប្រពៃណីយ៉ាងល្អប្រសើរនិងវីរភាពនៃទំនាក់ទំនងរវាងប្រទេសទាំងពីរ
ដើម្បីផលប្រយោជន៍ជាក់ស្តែងរបស់ប្រជាជននិងឧត្តមគតិនៃការកសាងសង្គមនិយម។
ខ្ញុំសូមបញ្ជាក់នូវគោលជំហរដ៏ខ្ជាប់ខ្ជួនរបស់បក្ស រដ្ឋ
និងប្រជាជនវៀតណាមអំពីសាមគ្គីភាព គាំទ្រការតស៊ូដ៏ត្រឹមត្រូវរបស់ប្រជាជនគុយបា
ហើយជឿជាក់ថា ប្រជាជនគុយបាក្រោមការដឹកនាំរបស់បក្សកុម្មុយនិស្តគុយបានឹងជំនះរាល់បញ្ហាប្រឈម
ដើម្បីការពារយ៉ាងរឹងមាំនូវសមិទ្ធិផល នៃបដិវត្តន៍ ហើយបន្តទទួលបានជ័យជំនះថ្មី
និងធំជាងនេះជាច្រើននៅក្នុងបុព្វបទបដិវត្តន៍របស់ខ្លួន
ដើម្បីគោលដៅកសាងសង្គមនិយមប្រកបដោយវិបុលភាព និងនិរន្តរភាព៕