នារសៀលថ្ងៃទី ២ ខែវិច្ឆិកា ឆ្នាំ២០១៨ នៅទីក្រុងហាណូយ នាយករដ្ឋមន្ត្រីវៀតណាមលោក Nguyen Xuan Phuc និងនាយករដ្ឋមន្ត្រីបារាំងលោក Edouard Philippe បានជម្រាបជូនសារព័ត៌មានអំពីលទ្ធផលនៃកិច្ចចរចា រវាងនាយករដ្ឋមន្ត្រីទាំងពីររូប។ នាយករដ្ឋមន្ត្រីវៀតណាមលោក Nguyen Xuan Phuc បានឲ្យដឹងថា ភាគីទាំង ២ បានពិភាក្សាប្រកបដោយជោគជ័យនិងបានចុះហត្ថលេខាលើកិច្ចព្រមព្រៀងនិងផ្លាស់ប្តូរឯកសារ សហប្រតិបត្តិការចំនួន ១៧។
នាយករដ្ឋមន្ត្រីវៀតណាមលោក Nguyen Xuan Phuc និងនាយករដ្ឋមន្ត្រីបារាំង លោក Edouard Philippe នៅក្នុងសន្និសីទកាសែត (រូបថតៈ Chinhphu.vn)
នាយករដ្ឋមន្ត្រីវៀតណាមលោក Nguyen Xuan Phuc បានលើកច្បាស់ថា បារាំងជានិច្ចកាលជាដៃគូនាំមុខគេរបស់វៀតណាមនិងមានទីតាំងអាទិភាព ក្នុងគោលនយោបាយកិច្ចការបរទេសរបស់វៀតណាមនាបច្ចុប្បន្ន។
ភាគីទាំងពីរក៏បានអះអាងអំពីតួនាទីស្នូលនៃកិច្ចសហប្រតិបត្តិការលើវិស័យការពារជាតិ នៅក្នុងទំនាក់ទំនងរបស់ប្រទេសទាំងពីរ។ ភាគីទាំងពីរបានឯកភាព រក្សាយន្តការនូវកិច្ចសន្ទនាយុទ្ធសាស្រ្ត និងកិច្ចសហប្រតិបត្តិការការពារជាតិរវាងក្រសួងការពារជាតិនៃប្រទេសទាំងពីរ ព្រមទាំងអនុវត្តកិច្ចព្រមព្រៀងសហប្រតិបត្តិការដែលបានចុះហត្ថលេខាជាស្រាប់ជាពិសេសគឺសេចក្តីថ្លែងការណ៍រួមស្តីពីទស្សនៈវិស័យរួមនៃទំនាក់ទំនងការពារជាតិរវាងវៀតណាមនិងបារាំង។
នាយករដ្ឋមន្ត្រី លោក Nguyen Xuan Phuc អញ្ជើញថ្លែងមតិក្នុងសន្និសីទកាសែត (រូបថតៈ Chinhphu.vn)
នាយករដ្ឋមន្ត្រី លោក Nguyen Xuan Phuc បានវាយតម្លៃខ្ពស់ចំពោះគោលជំហររបស់បារាំងនៅក្នុងបញ្ហាសមុទ្រខាងកើត ការគោរពច្បាប់អន្តរជាតិនិងការធានាសេរីភាពនាវាចរណ៍និងអាកាសចរណ៍នៅសមុទ្រខាងកើតផងដែរ។
ចំណែកឯនាយករដ្ឋមន្ត្រីបារាំងបានអះអាងជាមួយសារព័ត៌មានថា ដំណើរទស្សនកិច្ចលើកនេះរបស់លោកគឺដើម្បីពង្រឹងទំនាក់ទំនងទ្វេភាគី។ ទន្ទឹមជាមួយគ្នានោះ អង្គភាពអាជីវកម្មរបស់បារាំងដែលមានវត្តមាននៅក្នុងប្រទេសវៀតណាមសុទ្ធតែជឿជាក់លើកំណើននិងឱកាសសហប្រតិបត្តិការជាមួយវៀតណាមផងដែរ៕
តាម VOV5 - វិទ្យុសម្លេងវៀតណាម
