អគ្គលេខាបក្ស ប្រធានរដ្ឋ លោក តូ ឡឹម បានស្នើឱ្យប្រទេសទាំងពីររួមគ្នាកសាងសមត្ថភាពអភិវឌ្ឍន៍ថ្មីដោយផ្អែកលើចំណេះដឹង បច្ចេកវិទ្យា និងនវានុវត្តន៍។ វៀតណាមមានបំណងចង់រួមជាមួយជប៉ុនដើម្បីអភិវឌ្ឍន៍ការតភ្ជាប់ប្រកបដោយចីរភាពរវាងថ្នាក់ដឹកនាំ សាកលវិទ្យាល័យ វិទ្យាស្ថានស្រាវជ្រាវ និងសហគ្រាស ព្រមទាំងកសាងខ្សែសង្វាក់ផ្គត់ផ្គង់ចម្រុះ មានតម្លាភាព មានសមត្ថភាពសម្របខ្លួន ក្នុងស្មារតីនៃកិច្ចសហប្រតិបត្តិការបើកចំហ និងការគោរពតាមការប្ដេជ្ញាចិត្តអន្តរជាតិ។
នៅកម្រិតតំបន់ វៀតណាមមានបំណងចង់សម្របសម្រួលជាមួយជប៉ុនក្នុងការការពារប្រព័ន្ធពាណិជ្ជកម្មពហុភាគី លើកកម្ពស់ប្រសិទ្ធភាពនៃកិច្ចព្រមព្រៀងគ្រប់ជ្រុងជ្រោយនិងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) និងបង្កើនការតភ្ជាប់សេដ្ឋកិច្ច។ វៀតណាមត្រៀមខ្លួនរួចជាស្រេចរួមជាមួយជប៉ុនក្នុងការស្នើ និងអនុវត្តសកម្មភាពសហប្រតិបត្តិការ ដែលបំពេញតាមអាទិភាពរួមនៃតំបន់។
នៅក្នុងសុន្ទរកថា អគ្គលេខាបក្ស ប្រធានរដ្ឋ លោក តូ ឡឹម បានស្នើឱ្យរដ្ឋសភានៃប្រទេសទាំងពីរពង្រីកការផ្លាស់ប្តូររវាងស្ថាប័នសភា ក្រុមសមាជិកសភាមិត្តភាព សមាជិកសភាវ័យក្មេង និងសមាជិកាសភា; ចែករំលែកបទពិសោធន៍លើបញ្ហាអភិវឌ្ឍន៍ថ្មីៗ ចាប់ពីសេដ្ឋកិច្ចឌីជីថល រហូតដល់ការផ្លាស់ប្តូរបៃតង និងគោលនយោបាយសង្គម។ លោកអគ្គលេខាបក្ស ប្រធានរដ្ឋ បានជឿជាក់ថា វៀតណាម និងជប៉ុននឹងបន្តពូនជ្រុំទំនាក់ទំនងមិត្តភាព តាមរយៈលទ្ធផលសហប្រតិបត្តិការជាក់ស្តែង៕
