ក្រុមកីឡាវៀតណាមចូលរួមការប្រកួតកីឡាស៊ីហ្គេម លើកទី៣២ ដោយមានសមាជិកជាង១ពាន់នាក់ ក្នុងនោះមានកីឡាករកីឡាការិនីចំនួន ៧០២នាក់។ នេះជាចំនួនសមាជិកច្រើនបំផុត ក្នុងប្រវត្តិសាស្ត្រកីឡាវៀតណាមនៅ ព្រឹត្តិការណ៍ស៊ីហ្គេម ដែលធ្វើឡើងនៅខាងក្រៅប្រទេសវៀតណាម។ ក្រុមកីឡាវៀត ណាមនឹងចូលរួមប្រកួតកីឡាចំនួន ៣០ ប្រភេទ ក្នុង ៤៤៧ វិញ្ញាសា ដោយមានគោល ដៅដណ្ដើមបានមេដាយមាសពី ៩០ ដល់ ១២០ គ្រឿង ហើយចូលក្នុងកំពូលទាំង ៣។ អញ្ជើញថ្លែងមតិនៅពិធីជូនដំណើរ ឧបនាយករដ្ឋមន្ត្រីវៀតណាម លោក Le Minh Khai បានសង្កត់ធ្ងន់ថា៖
“សមាជិកនីមួយៗនៃក្រុមកីឡាវៀតណាមដែលចូលរួមហ៊ីហ្គេមលើកទី៣២ ត្រូវ ជ្រួបជ្រាបពីទំនួលខុសត្រូវដ៏ភ្លឺស្វាងរបស់ខ្លួន ចាំបាច់ត្រូវបង្ហាញឲ្យបានល្អពីប្រពៃណី វប្បធម៌ ហើយផ្សព្វផ្សាយតម្លៃដ៏ល្អប្រសើររបស់វៀតណាមទៅកាន់មិត្តភក្តិអន្តរជាតិ; ពង្រឹងចំណងសាមគ្គីភាព មិត្តភាព ផ្លាស់ប្តូរ សិក្សាបទពិសោធន៍ជាមួយប្រទេសមិត្ត។ បុគ្គលនីមួយៗនៃក្រុមកីឡាវៀតណាមគឺជាឯកអគ្គរដ្ឋទូតវប្បធម៌របស់ប្រទេសជាតិ ទន្ទឹមនឹងនោះ សមាជិកទាំងអស់ត្រូវសាមគ្គីគ្នា ជំនះពុះពារលើការលំបាក រក្សាវិន័យ យ៉ាងរឹងមាំ ខិតខំប្រឹងប្រែងឲ្យអស់ពីសមត្ថភាពនិងស្មារតី ដើម្បីបំពេញភារកិច្ចដែល បានដាក់ចេញ។ ប្រកួតដោយស្មារតីកីឡាដ៏ខ្ពង់ខ្ពស់ ក្លាហាន ច្នៃប្រឌិត និងស្មោះត្រង់ ដើម្បីសម្រេចបានស្នាដៃខ្ពស់នៅស៊ីហ្គេម រួមចំណែកលើកកំពស់ឋានៈកីឡាវៀតណាម ឡើងកំពស់ថ្មី”។
តាមការគ្រោងទុក ក្រុមកីឡាវៀតណាមនឹងចេញដំណើរទៅកម្ពុជានៅព្រឹកថ្ងៃទី៣ ខែឧសភា។ ស៊ីហ្គេមលើកទី៣២ នឹងប្រព្រឹត្តិទៅចាប់ពីថ្ងៃទី៥ ដល់ថ្ងៃទី១៧ ខែ ឧសភា នៅរាជធានីភ្នំពេញ និងខេត្តចំនួន៤ នៃប្រទេសកម្ពុជា រួមមាន៖ ខេត្តសៀមរាប ព្រះសីហនុ កំពត និងកែប៕
