អគ្គលេខាបក្ស ប្រធានរដ្ឋវៀតណាមលោក តូ ឡឹម បានអញ្ជើញទទួលជួបលោក Prabowo Subianto ប្រធានាធិបតីជាប់ឆ្នោតរបស់ឥណ្ឌូនេស៊ី។ (រូបថត៖ VNA)
នារសៀលថ្ងៃទី ១៣ ខែកញ្ញា នៅវិមានប្រធានរដ្ឋ នៅទីក្រុងហាណូយ អគ្គលេខាបក្ស ប្រធានរដ្ឋវៀតណាមលោក តូ ឡឹម បានអញ្ជើញទទួលជួបលោក Prabowo Subianto ប្រធានាធិបតីជាប់ឆ្នោតរបស់ឥណ្ឌូនេស៊ីក្នុងឱកាសនៃដំណើរ ទស្សនកិច្ចការងាររបស់លោកនៅវៀតណាម។
ក្នុងជំនួបនេះ លោកអគ្គលេខាបក្ស ប្រធានរដ្ឋ តូ ឡឹម បានវាយតម្លៃខ្ពស់ចំពោះសមិទ្ធិផលថ្មីៗដែលឥណ្ឌូនេស៊ីសម្រេច បានក្នុងការអភិវឌ្ឍសេដ្ឋកិច្ចសង្គមនាពេលកន្លងមក ដោយក្លាយជាសេដ្ឋកិច្ចធំជាងគេ នៅអាស៊ីអាគ្នេយ៍ ជាទីផ្សារឌីជីថលរីកលូតលាស់លឿនបំផុតមួយលើពិភពលោក ដោយមានគំនិតផ្តួចផ្តើមនិងបានរួមចំណែកយ៉ាងសកម្មជាច្រើនដល់សន្តិភាព និង កិច្ចសហប្រតិបត្តិការក្នុងតំបន់ និងពិភពលោក។
ចំណែកឯប្រធានាធិបតីជាប់ឆ្នោត លោក Prabowo Subianto បានចែករំលែកការអាណិតអាសូរយ៉ាងជ្រាលជ្រៅចំពោះការបាត់បង់និងការខូចខាតដ៏ធ្ងន់ធ្ងរដែលបង្កឡើងដោយព្យុះទីហ្វុង Yagi ក្នុងប្រទេសវៀតណាម។ លោកប្រធានាធិបតី Prabowo Subianto បានអះអាងថា ឥណ្ឌូណេស៊ីជានិច្ចកាលគោរពទំនាក់ទំនងមិត្តភាពប្រពៃណី និងកិច្ចសហប្រតិបត្តិការជាមួយវៀតណាម - ដៃគូយុទ្ធសាស្ត្រតែមួយគត់របស់ឥណ្ឌូ នេស៊ីក្នុងសមាគមប្រជាជាតិអាស៊ីអាគ្នេយ៍ (អាស៊ាន) ដោយមានបំណងចង់ដាក់ ពង្រាយយ៉ាងខ្លាំងក្លាថែមទៀតនូវវិធានការនានាដើម្បីនាំទំនាក់ទំនងឲ្យកាន់តែ ស៊ីជម្រៅនិងជាក់ស្ដែង។
ថ្នាក់ដឹកនាំទាំងពីរបានពិភាក្សាអំពីវិធានការពង្រឹងទំនាក់ទំនងភាពជាដៃគូយុទ្ធសាស្ត្រ វៀតណាម-ឥណ្ឌូនេស៊ី ក៏ដូចជាបញ្ហាតំបន់ និងអន្តរជាតិដែលមានការយកចិត្តទុកដាក់ដូចគ្នាផងដែរ៕
