ក្នុងសេចក្តីប្រកាស បណ្តាប្រទេសអាស៊ានបានអំពាវនាវឱ្យភាគីទាំងអស់គោរពបទឈប់បាញ់ និងជៀសវាងការកើនឡើងនៃជម្លោះតទៅទៀត។ អាស៊ានបានអះអាងសារជាថ្មីនូវកាតព្វកិច្ចរបស់ប្រទេសទាំងអស់ ក្នុងការដោះស្រាយការខ្វែងគំនិតគ្នាតាមរយៈមធ្យោបាយសន្តិវិធី គោរពអធិបតេយ្យភាព និងបូរណភាពទឹកដីនៃប្រទេសទាំងអស់ ស្របតាមច្បាប់អន្តរជាតិ រួមទាំងធម្មនុញ្ញអង្គការសហប្រជាជាតិផងដែរ។ អាស៊ានបានសង្កត់ធ្ងន់លើកាតព្វកិច្ចការពារជនស៊ីវិល និងហេដ្ឋារចនាសម្ព័ន្ធស៊ីវិលក្នុងជម្លោះប្រដាប់អាវុធ ស្របតាមច្បាប់អន្តរជាតិ និងដំណោះស្រាយពាក់ព័ន្ធរបស់ក្រុមប្រឹក្សាសន្តិសុខអង្គការសហប្រជាជាតិ។ អាស៊ានគាំទ្រកិច្ចខិតខំប្រឹងប្រែងដែលកំពុងបន្ត រួមទាំងការដឹកនាំដោយអង្គការសហប្រជាជាតិ សំដៅកាត់បន្ថយភាពតានតឹង សម្រួលដល់ការបន្តកិច្ចសហប្រតិបត្តិការក្នុងន័យស្ថាបនាក្នុងចំណោមភាគីពាក់ព័ន្ធ។