លោកស្រីឯកអគ្គរដ្ឋទូត ង្វៀន ធីវ៉ាន់អាញ់ ប្រធានបេសកកម្មអចិន្ត្រៃយ៍វៀតណាមអមអង្គការយូណេស្កូ។ (រូបថតឯកសារ៖ TTXVN)
ថ្លែងនៅក្នុងសម័យប្រជុំពេញអង្គនៅថ្ងៃទី ៩ ខែតុលា លោកស្រីឯកអគ្គរដ្ឋទូត ង្វៀន ធីវ៉ាន់អាញ់ ប្រធានបេសកកម្មអចិន្ត្រៃយ៍វៀតណាមអមអង្គការយូណេស្កូ បានបញ្ជាក់ជាថ្មីនូវការគាំទ្ររបស់វៀតណាមចំពោះតួនាទីរបស់យូណេស្កូនៅក្នុងវិស័យឯកទេសរបស់អង្គការនេះ ហើយបានរំលេចតួនាទីនាំមុខគេរបស់យូណេស្កូក្នុងការពន្លឿនការអនុវត្តគោលដៅអភិវឌ្ឍន៍ប្រកបដោយចីរភាពទី ៤ (SDG ៤) ស្តីពីការអប់រំប្រកបដោយគុណភាព។
នៅក្នុងវិស័យវប្បធម៌ លោកស្រីឯកអគ្គរដ្ឋទូតបានស្វាគមន៍ចំពោះការដែលមហាសន្និបាតអង្គការសហប្រជាជាតិបានប្រកាស "ទសវត្សរ៍អន្តរជាតិអំពីវប្បធម៌ដើម្បីការអភិវឌ្ឍប្រកបដោយចីរភាព" ដំណាក់កាល ២០២៧-២០៣៦ ដែលផ្ដួចផ្ដើមឡើងដោយប្រទេសវៀតណាម។ ក្នុងពេលជាមួយគ្នានេះ លោកស្រីឯកអគ្គរដ្ឋទូតបានសង្កត់ធ្ងន់ថា យូណេស្កូចាំបាច់ត្រូវដើរតួនាទីយ៉ាងសំខាន់ក្នុងការប្រែក្លាយគោលដៅនៃទសវត្សរ៍នេះទៅជាសកម្មភាពជាក់ស្តែង។
ទាក់ទងនឹងបច្ចេកវិទ្យាឌីជីថល លោកស្រីឯកអគ្គរដ្ឋទូតបានសង្កត់ធ្ងន់ថា វៀតណាមគាំទ្រចំពោះការស្រាវជ្រាវលើឯកសារបទដ្ឋានទាក់ទងនឹងយុវជន និងបរិស្ថានឌីជីថលក្នុងយុគសម័យបញ្ញាសិប្បនិម្មិត ហើយបានបញ្ជាក់ជាថ្មីនូវការគាំទ្រចំពោះដំណើរការកែទម្រង់ UNESCO ៨០ សំដៅបង្កើនប្រសិទ្ធភាពប្រតិបត្តិការរបស់អង្គការ។
ក្នុងឱកាសរំលឹកខួប ៥០ ឆ្នាំ នៃកិច្ចសហប្រតិបត្តិការវៀតណាម-យូណេស្កូ (១៩៧៦-២០២៦) លោកស្រីឯកអគ្គរដ្ឋទូត ង្វៀន ធីវ៉ាន់អាញ់ បានសង្កត់ធ្ងន់លើការផ្លាស់ប្តូរតួនាទីរបស់វៀតណាម ពីប្រទេសដែលទទួលជំនួយជាចម្បង ទៅជាដៃគូដែលរួមចំណែកយ៉ាងសកម្មដល់ការកសាងទិសដៅប្រតិបត្តិការសំខាន់ៗរបស់ យូណេស្កូ៕
