ក្នុងពិធីជប់លៀង លោកប្រធានរដ្ឋ លឿង គឿង បានសង្កត់ធ្ងន់ថា កិច្ចសហប្រតិបត្តិការពហុវិស័យរវាងវៀតណាម និងអូស្ត្រាលីកំពុងស្ថិតក្នុងដំណាក់កាលអភិវឌ្ឍន៍ដ៏ ត្រចះត្រចង់បំផុត បន្ទាប់ពីជាងកន្លះសតវត្សនៃការបង្កើតទំនាក់ទំនងការទូត។ លោក ជឿជាក់ថា ភាពជាដៃគូយុទ្ធសាស្ត្រលើគ្រប់ជ្រុងជ្រោយវៀតណាម - អូស្ត្រាលីនឹង បន្តអភិវឌ្ឍន៍ឡើងដល់កំពស់ថ្មី នាំមកនូវផលប្រយោជន៍ជាក់ស្តែងជូនប្រជាជននៃ ប្រទេសទាំងពីរ រួមចំណែកយ៉ាងសកម្មដល់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍក្នុងតំបន់ និងពិភពលោក។

អញ្ជើញថ្លែងសុន្ទរកថាឆ្លើយតប លោកស្រីអគ្គទេសាភិបាល Sam Mostyn បានអះអាងថា សព្វថ្ងៃនេះ ស្ថិរភាព វិបុលភាព និងសន្តិសុខរបស់អូស្ត្រាលី បាន ផ្សាភ្ជាប់យ៉ាងជ្រាលជ្រៅជាមួយបណ្តាប្រទេសក្នុងតំបន់ ហើយវៀតណាមជាប្រទេស នាំមុខគេក្នុងទំនាក់ទំនងទាំងនេះ។ អគ្គទេសាភិបាលអូស្ត្រាលីបានមានប្រសាសន៍ថា ការដែលប្រទេសទាំងពីរលើកកំពស់ទំនាក់ទំនងការទូតទៅជាភាពជាដៃគូយុទ្ធសាស្ត្រ គ្រប់ជ្រុងជ្រោយក្នុងខែមីនា ឆ្នាំ ២០២៤ គឺជាព្រឹត្តិការណ៍ប្រវត្តិសាស្ត្រ ដែលឆ្លុះបញ្ចាំង ពីជំនឿទុកចិត្តជាយុទ្ធសាស្ត្រដ៏ជ្រាលជ្រៅ និងមហិច្ឆតារួមរបស់ប្រទេសទាំងពីរឆ្ពោះ ទៅរកការសហការគ្នាដើម្បីកសាងអនាគតកាន់តែល្អប្រសើរសម្រាប់ប្រទេសទាំងពីរ៕