នាព្រឹកថ្ងៃទី ១៦ តុលា ក្នុងឱកាសរំលឹកខួបអនុស្សាវរីយ៍លើកទី ៧៧ ទិវាលោកប្រធានហូជីមិញផ្ញើសារលិខិតជូនផ្នែកឧស្សាហកម្ម និងពាណិជ្ជកម្ម និងខួបលើកទី ១៨ ទិវាសហគ្រិនវៀតណាម (១៣ តុលា) នៅទីក្រុងហាណូយ នាយករដ្ឋមន្ត្រីវៀតណាមលោក Pham Minh Chinh បានធ្វើជាអធិបតីក្នុង ពិធីជួបសំណេះសំណាលរបស់លោកនាយករដ្ឋមន្ត្រីជាមួយប្រធាន និងអគ្គនាយកធនាគារពាណិជ្ជកម្ម។

អញ្ជើញថ្លែងមតិក្នុងជំនួបនេះ នាយករដ្ឋមន្ត្រីលោក Pham Minh Chinh បានឲ្យដឹងថា លទ្ធផលសម្រេចបានក្នុងរយៈពេល ៩ ខែដើមឆ្នាំ ២០២២ និងពេលវេលាកន្លងទៅបានបញ្ជាក់ពីតួនាទីសំខាន់នៃប្រព័ន្ធធនាគារក្នុងសេដ្ឋកិច្ច និងសន្តិសុខរូបិយប័ណ្ណជាតិ។ ប្រព័ន្ធធនាគារដើរតួជាសរសៃឈាមនៃខឿនសេដ្ឋកិច្ច ហើយជាបណ្តាញទុនដ៏សំខាន់បម្រើដល់ផលិតកម្ម និងអាជីវកម្ម រួមចំណែកដល់ការលើកកម្ពស់ការរៀបចំរចនាសម្ព័ន្ធសេដ្ឋកិច្ច ការកសាងខឿនសេដ្ឋកិច្ចឯករាជ្យ ម្ចាស់ការ និងលើកកម្ពស់ជីវភាពរស់នៅរបស់ប្រជាជន។

លោកនាយករដ្ឋមន្ត្រីបានស្នើឱ្យផ្នែកធនាគារអនុវត្តន៍ភារកិច្ច និងដំណោះស្រាយសំខាន់ៗមួយចំនួនក្នុងប៉ុន្មានខែចុងឆ្នាំ និងនាពេលខាងមុខ។ តាមនោះ ធនាគាររដ្ឋបន្តគ្រប់គ្រងគោលនយោបាយរូបិយវត្ថុយ៉ាងជិតស្និទ្ធ ប្រុងប្រយ័ត្ន ធានាភាពម្ចាស់ការ ភាពបត់បែន និងប្រសិទ្ធភាព សម្របសម្រួលឱ្យព្រមៗគ្នា រលូន និងប្រកបដោយប្រសិទ្ធភាពជាមួយនឹងគោលនយោបាយសារពើពន្ធ និងគោលនយោបាយផ្សេងៗទៀត ដើម្បីផ្តល់អាទិភាពដល់ការគ្រប់គ្រងអតិផរណា ស្ថិរភាពម៉ាក្រូសេដ្ឋកិច្ច ជំរុញកំណើន និងធានាឱ្យមានតុល្យភាពសំខាន់ៗនៃខឿនសេដ្ឋកិច្ច៕