នារសៀលថ្ងៃទី២១ ខែវិច្ឆិកា នៅរាជធានីភ្នំពេញ ព្រះរាជាណាចក្រកម្ពុជា ក្នុងក្របខ័ណ្ឌនៃមហាសន្និបាតអន្តរសភានៃបណ្ដាប្រទេសអាស៊ីអាគ្នេយ៍លើកទី៤៣ (AIPA-43) បានប្រព្រឹត្តិទៅកិច្ចប្រជុំសមាជិកសភាស្ត្រី AIPA (WAIPA)។ គណៈប្រតិភូវៀតណាមដឹកនាំដោយសមាជិកាអចិន្ត្រៃយ៍នៃគណៈកម្មាធិការកិច្ចការបរទេសរដ្ឋសភា លោកស្រី Le Thu Ha បានអញ្ជើញចូលរួមកិច្ចប្រជុំនេះ។ នេះគឺជាលើកទីពីរហើយ ដែលកិច្ចប្រជុំសមាជិកសភាស្ត្រី AIPA បានបើកកិច្ចប្រជុំ ដើម្បីពិភាក្សាលើប្រធានបទចំនួនពីរគឺ៖ សមភាពយេនឌ័រ និងការផ្ដល់សិទ្ធិដល់ស្ត្រី ដើម្បីការស្ដារឡើងវិញប្រកបដោយបរិយាប័ន្នក្រោយជំងឺរាតត្បាតកូវីដ ១៩; ជំរុញតួនាទីរបស់សមាជិកសភាស្ត្រីក្នុងការជំរុញរបៀបវារៈសន្តិសុខ សន្តិភាព និងស្ត្រី។ អង្គប្រជុំបានពិចារណាលើពង្រាងសេចក្តីសម្រេចចិត្តចំនួន៣។ ទី១ គឺ ពង្រាងសេចក្តីសម្រេចចិត្តស្តីពីការអនុម័តលើរបាយការណ៍នៃកិច្ចប្រជុំគណៈកម្មាធិការសម្របសម្រួលសមាជិកសភាស្ត្រី AIPA។ ទីពីរ គឺពង្រាងសេចក្តីសម្រេចចិត្តស្ដីពីសមភាពយេនឌ័រ និងការផ្ដល់សិទ្ធិដល់ស្ត្រី ដើម្បីការស្ដារឡើងវិញប្រកបដោយចីរភាពក្រោយកូវីដ ១៩។ ទីបីគឺ សេចក្តីសម្រេចចិត្តស្ដីពីការជំរុញតួនាទីរបស់សមាជិកសភាស្ត្រីក្នុងការជំរុញរបៀបវារៈដើម្បីសន្តិសុខ សន្តិភាព និងស្ត្រី។ សំណើភាគច្រើនរបស់អង្គប្រជុំត្រូវបានអនុម័ត ហើយត្រូវបានដាក់បញ្ជូលទៅក្នុងសេចក្ដីសម្រេចចិត្តចុងក្រោយនៃកិច្ចប្រជុំសមាជិកសភាស្ត្រី។ ដោយផ្អែកលើមូលដ្ឋានទាំងនេះ អង្គប្រជុំបានអនុម័តជាឯកច្ឆ័ន្ទលើសេចក្តីព្រាងសេចក្តីសម្រេចទាំង៣ខាងលើផងដែរ៕