ព័ត៌មាន
លោកប្រធានរដ្ឋ លឿង គឿង៖ ការវិនិយោគនៅវៀតណាមគឺជាជំហានយុទ្ធសាស្ត្រដើម្បីតភ្ជាប់ជាមួយដៃគូធំៗនិងសក្តានុពលលើពិភពលោក
“ការវិនិយោគនៅវៀតណាមមិនត្រឹមតែបណ្តាក់ទុនចូលមកខឿនសេដ្ឋកិច្ចប្រកបដោយភាពស្វាហាប់ ស្ថិរភាព និងរីកចម្រើនយ៉ាងឆាប់រហ័សប៉ុណ្ណោះទេ ថែមទាំងជាជំហានយុទ្ធសាស្ត្រដើម្បីតភ្ជាប់ជាមួយដៃគូធំៗដែលមានសក្ដានុពលលើពិភពលោកទៀតផង”។ នេះត្រូវបានសង្កត់ធ្ងន់ដោយប្រធានរដ្ឋវៀតណាមលោក លឿង គឿង ក្នុងសម័យបើកកិច្ចប្រជុំលើកទី ៣ នៃក្រុមប្រឹក្សាពិគ្រោះយោបល់ធុរកិច្ច APEC (ABAC ៣) ដែលបានប្រព្រឹត្តទៅនាព្រឹកថ្ងៃទី ១៦ ខែកក្កដា នៅទីក្រុង Hai Phong។
លោកប្រធានរដ្ឋ លឿងគឿង ក៏បានវាយតំលៃខ្ពស់ចំពោះការដែល ABAC ៣ បានជ្រើសរើសប្រធានបទពិភាក្សាសម្រាប់កិច្ចប្រជុំនេះ ពាក់ព័ន្ធដល់វិស័យសំខាន់ៗ ដូចជា៖ ពាណិជ្ជកម្មសេរី និងការវិនិយោគប្រកបដោយនិរន្តរភាព; ការធ្វើបរិវត្តកម្ម ឌីជីថល និងបញ្ញាសិប្បនិម្មិត; ហិរញ្ញវត្ថុបៃតង និងការអភិវឌ្ឍប្រកបដោយនិរន្តរភាព; សន្តិសុខសុខាភិបាល និងនវានុវត្តន៍ក្នុងវិស័យជីវបច្ចេកវិទ្យា។ លោកប្រធានរដ្ឋមាន ប្រសាសន៍ថា ទាំងនេះគឺជាអាទិភាពចម្បងរបស់វៀតណាមក្នុងយុទ្ធសាស្ត្រអភិវឌ្ឍន៍ ជាតិដល់ឆ្នាំ ២០៣០ និងចក្ខុវិស័យដល់ឆ្នាំ ២០៤៥។ លោកប្រធានរដ្ឋក៏បានអះអាង ផងដែរថា វៀតណាមជានិច្ចកាលយកចិត្តទុកដាក់ និងមានសក្ដានុពលជាច្រើនដើម្បី រួមចំណែកដល់ការខិតខំប្រឹងប្រែងជំរុញកិច្ចសហប្រតិបត្តិការពាណិជ្ជកម្ម និងវិនិយោគ ក្នុងតំបន់។
“ដោយមានតួនាទីមជ្ឈភាពក្នុងបណ្តាញសេដ្ឋកិច្ចក្នុងតំបន់ និងកិច្ចព្រមព្រៀង ពាណិជ្ជកម្មសេរីពហុភាគី វៀតណាមនាំមកជូនវិនិយោគិននូវប្រៀបខ្លាំងក្នុងការចូល ទៅកាន់ទីផ្សារចម្រុះ និងខ្សែសង្វាក់ផ្គត់ផ្គង់ទូទាំងតំបន់។ ដូច្នេះហើយ ការវិនិយោគនៅ វៀតណាមមិនត្រឹមតែជាវិនិយោគចូលមកខឿនសេដ្ឋកិច្ចប្រកបដោយភាពស្វាហាប់ ស្ថិរភាព និងរីកចម្រើនយ៉ាងឆាប់រហ័សប៉ុណ្ណោះទេ ថែមទាំងជាជំហានយុទ្ធសាស្ត្រ ដើម្បីតភ្ជាប់ជាមួយដៃគូធំៗ និងមានសក្តានុពលលើពិភពលោក ក៏ដូចជាតំបន់ពាណិជ្ជ កម្មសេរីផ្សេងទៀត”៕
ABAC គឺជាយន្តការពិគ្រោះយោបល់គោលនយោបាយផ្លូវការពីសហគមន៍ធុរកិច្ចដល់មេដឹកនាំបណ្ដាប្រទេសជាសមាជិកនៃវេទិកាសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ដែលត្រូវបានបង្កើតឡើងក្នុងឆ្នាំ ១៩៩៦។ កិច្ចប្រជុំរបស់ ABAC ត្រូវបានធ្វើឡើងចំនួន ៤ ដងក្នុងមួយឆ្នាំ ដោយទម្រង់ប្ដូរវេនតាមទីក្រុងធំៗនៃសេដ្ឋកិច្ចសមាជិក។ កិច្ចប្រជុំ ABAC ៣ នៅទីក្រុង Hai Phong មានការចូលរួមពីគណៈប្រតិភូអន្តរជាតិ និងវៀតណាមជាង ២០០នាក់ រួមទាំងសមាជិក ABAC ដែលជាថ្នាក់ដឹកនាំសាជីវកម្ម សហគ្រាសឈានមុខគេ អង្គការជំរុញពាណិជ្ជកម្ម និងវិនិយោគមកពីខឿនសេដ្ឋកិច្ចសមាជិក APEC ទាំង ២១ ជំនួយការ និងភ្ញៀវអន្តរជាតិ។
