ក្នុងសុន្ទរកថាបើក អនុរដ្ឋមន្ត្រីអចិន្ត្រៃយ៍ក្រសួងការបរទេស លោក Nguyen Minh Vu បានអះអាងថា ការលើកតម្កើងលោកប្រធានហូជីមិញតាមរយៈបរិយាកាសវប្បធម៌គឺជាយុទ្ធសាស្ត្រយូរអង្វែង រួមផ្សំរវាងអត្តសញ្ញាណជាតិ និងការទូតទំនើប។ គំរូទាំងនេះមិនត្រឹមតែជាកន្លែងសម្រាប់តាំងពិព័រណ៌ប៉ុណ្ណោះទេ ថែមទាំងត្រូវការអភិវឌ្ឍទៅជាចំណុចប្រសព្វរវាងការចងចាំ ការអប់រំ និងការផ្លាស់ប្តូរអន្តរជាតិ ជាពិសេសក្នុងបរិបទដែលវៀតណាមជំរុញសមាហរណកម្មលើគ្រប់ជ្រុងជ្រោយ។
សិក្ខាសាលានេះ ត្រូវបានបែងចែកជាវគ្គពិភាក្សាចំនួន២។ សម័យពិភាក្សាដំបូងបានវិលជុំវិញទម្រង់នៃការលើកតម្កើងលោកប្រធានហូជីមិញតាមរយៈសិល្បៈអរូបីដូចជា៖ អក្សរសាស្ត្រ តន្ត្រី ភាពយន្ត ល្ខោន ការផ្លាស់ប្តូរការសិក្សា និងពហុព័ត៌មាន។ តំណាងអង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (UNESCO) នៅទីក្រុងហាណូយ ក៏បានចែករំលែកភាពស្រដៀងគ្នារវាងមនោគមវិជ្ជារបស់ហូជីមិញ ស្តីពីការរៀនសូត្រពេញមួយជីវិត និងការតំរង់ទិសនៃការអប់រំប្រកបដោយនិរន្តរភាពជាសកល។ សម័យប្រជុំលើកទី២ ផ្តោតការពិភាក្សាលើប្រធានបទ “កសាងបរិយាកាសវប្បធម៌ហូជីមិញ៖ បទពិសោធន៍អន្តរជាតិ និងការអនុវត្តនៅទីភ្នាក់ងារតំណាងវៀតណាមនៅបរទេស”។
តាមការណែនាំរបស់ក្រសួងការបរទេស បរិយាកាសហូជីមិញនឹងត្រូវបានស្ថាបនាតាមគំរូតែមួយ នៅទីភ្នាក់ងារតំណាងវៀតណាមនៅបរទេសដោយចុះសម្រុងគ្នារវាងតម្លៃប្រវត្តិសាស្ត្រ អត្តសញ្ញាណវប្បធម៌ជាតិ និងវិធីសាស្រ្តការទូតទំនើប៕
