ທ່ານເລຂາທິການໃຫຍ່, ປະທານປະເທດ ຫວຽດນາມ ຫງວຽນຝຸຈ້ອງ (ພາບ: TTXVN)

ໃນສານ, ທ່ານເລຂາທິການໃຫຍ່, ປະທານປະເທດ ຫວຽດນາມ ຫງວຽນຝຸຈ້ອງ  ໄດ້ເນັ້ນໜັກວ່າ ຫວຽດນາມຕັດສິນໃຈປະຕິບັດໜ້າທີ່ຂອງສອງຕໍາແໜ່ງນີ້ ໃຫ້ສໍາເລັດ ເຊິ່ງເປັນການສະແດງໃຫ້ເຫັນທັດສະນະສະເໝີຕົ້ນສະເໝີປາຍຂອງແນວທາງການພົວພັນການຕ່າງປະເທດເອກະລາດ, ເປັນເຈົ້າຕົນເອງ, ສັນຕິພາບ, ຮ່ວມມື ແລະ ພັດທະນາ; ຫັນການພົວພັນຕ່າງປະເທດ ເປັນຫຼາຍຮູບຫຼາຍແບບ ແລະ ຫຼາຍຝ່າຍ; ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນຂອງຫວຽດນາມ ແລະ ສະແດງໃຫ້ເຫັນຄວາມປາດຖະໜາຢາກປະກອບສ່ວນເຂົ້າໃນຂະບວນວິວັດການສ້າງສັນຕິພາບຢູ່ພາກພື້ນ ແລະ ສາກົນ ຂອງຫວຽດນາມ.

        ຫວຽດນາມ ໄດ້ກໍານົດ ຫົວຂໍ້ວ່າ: ສະໜິດຕິດພັນ ແລະ ເປັນເຈົ້າການຮັບມື” ແມ່ນຫົວຂໍ້ຂອງປີເປັນປະທານ ອາຊຽນ 2020 ແລະ ຫົວຂໍ້ “ຫວຽດນາມ: ຄູ່ຮ່ວມມືທີ່ໜ້າໄວ້ເນື້ອເຊື່ຶອໃຈເພື່ອສັນຕິພາບແບບຍືນຍົງ” ເມື່ອດໍາລົງຕໍາແໜ່ງເປັນກໍາມະການບໍ່ປະຈໍາການສະພາຄວາມໝັ້ນຄົງ ສປຊ ອາຍຸການ 2020 – 2021. ດ້ວຍຫົວຂໍ້ດັ່ງກ່າວ, ຫວຽດນາມ ຈະພ້ອມກັບບັນດາປະເທດສະມາຊິກ, ເພື່ອນມິດສາກົນ ແລະ ຄູ່ຮ່ວມມື ສຸມໃສ່ບັນດາກໍານົດທິດສໍາຄັນ. ທີໜຶ່ງແມ່ນ, ຍົກສູງຜົນປະໂຫຍດລວມຂອງພາກພື້ນ ແລະ ປະຊາຄົມສາກົນ ແມ່ນສັນຕິພາບ, ຮ່ວມມື ແລະ ພັດທະນາ. ທີສອງ, ຊຸກຍູ້ບົດບາດຂອງລັດທິຫຼາຍຝ່າຍ, ກົດບັດ ສປຊ ແລະ ບັນດາຫຼັກການພື້ນຖານຂອງກົດໝາຍສາກົນ ເພື່ອໂລກແຫ່ງສັນຕິພາບ, ຍຸຕິທໍາ ແລະ ສວຍງາມກວ່າ. ພິເສດ, ເນື່ອງໃນໂອກາດນີ້, ແມ່ນຕ້ອງເພີ່ມທະວີປະສິດທິຜົນຂອງການຮ່ວມມື ແລະ ການພົວພັນຄູ່ຮ່ວມມືຮອບດ້ານລະຫວ່າງ ອາຊຽນ ແລະ  ສປຊ ໃຫ້ມີປະສິດທິຜົນ. ທີສາມ ແມ່ນເປັນເຈົ້າການ, ຕັ້ງໜ້າປະກອບສ່ວນເຂົ້າໃນການແກ້ໄຂບັນດາສິ່ງທ້າທາຍລວມຂອງທົ່ວໂລກ ແລະ ພາກພື້ນ.