ຫຼັງຈາກເຂົ້າຮ່ວມເວທີປາໄສ ການດຳເນີນ ທຸລະກິດ ແລະ ການລົງທຶນ ຕວກກີ - ຫວຽດນາມ ທີ່ Istanbul, ຕວກກີ, ວັນທີ 08 ຕຸລາ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ໄດ້ເດີນທາງ ໄປຮອດ ນະຄອນຫຼວງ Antalya, ເຂົ້າຮ່ວມກອງປະຊຸມປະທານສະພາແຫ່ງຊາດ ບັນດາປະເທດ ອາຊີ - ເອີຣົບ ຄັ້ງທີ 3 (MSEAP3). ໃນວັນດຽວກັນ ທ່ານນາງປະທານສະພາແຫ່ງຊາດ ຫງວຽນທິກິມເງິນ ໄດ້ພົບປະກັບ ທ່ານ Vyacheslav Vododin ປະທານ Duma ແຫ່ງຊາດ ສະຫະພັນລັດເຊຍ.

ທີ່ການພົບປະ, ປະທານສະພາທັງສອງໄດ້ແບ່ງປັນບົດຮຽນໃນການເຄື່ອນໄຫວຂອງລັດຖະສະພາ, ແລກປ່ຽນຄຳເຫັນກ່ຽວກັບບັນຫາສາກົນ ແລະ ພາກພື້ນ ທີ່ຕ່າງຝ່າຍຕ່າງມີຄວາມສົນໃຈ; ເຫັນດີເປັນເອກະພາບ, ຍູ້ແຮງ ນຳການພົວພັນຮ່ວມມືຂອງ ລັດຖະສະພາ ລະຫວ່າງສອງປະເທດ ກ້າວເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ, ປະກອບສ່ວນສຳຄັນເຂົ້າໃນການຮ່ວມມື ຄູ່ຮ່ວມມືຍຸດທະສາດຮອບດ້ານ ລະຫວ່າງສອງປະເທດ.

ທ່ານນາງປະທານສະພາແຫ່ງຊາດ ຫງວຽນທິກິມເງິນ ຕີລາຄາສູງ Duma ແຫ່ງຊາດ ສະຫະພັນລັດເຊຍ ແລະ ສະພາແຫ່ງຊາດ ສ ເກົາຫຼີ ໄດ້ຮ່ວມກັນລິເລີ່ມສ້າງກົນໄກ ກອງປະຊຸມປະທານສະພາແຫ່ງຊາດ ອາຊີ -ເອຣົບ ແນໃສ່ປະສານສົມທົບການ ເຄື່ອນໄຫວ ລະຫວ່າງບັນດາອົງການນິຕິບັນຍັດ ໃນພາກພື້ນ ອາຊີ -ເອີຣົບ ແລະ ຍົກສູງບົດບາດຂອງວຽກງານການຕ່າງປະເທດ ຂອງ ລັດຖະສະພາ; ພ້ອມນັ້ນກໍ່ເຊື່ອໝັ້ນວ່າກອງປະຊຸມ MSEAP3 ຈະປະສົບຜົນສຳເລັດຢ່າງຈົບງາມ.

ປະທານ Duma ແຫ່ງຊາດ ສະຫະພັນລັດເຊຍ ປາດຖະໜາຢາກໃຫ້ສະພາແຫ່ງຊາດຫວຽດນາມ ສະໜັບສະໜູນຂໍ້ລິເລີ່ມ ຂອງສະພາແຫ່ງຊາດ ສະຫະພັນລັດເຊຍ ກ່ຽວກັບການສ້າງຕັ້ງຄະນະກຳມະການລະຫວ່າງ ລັດຖະສະພາຂັ້ນສູງ ຫວຽດນາມ - ລັດເຊຍ ດ້ວຍຈຳນວນ ແລະ ອັດຕາສ່ວນເພດ 50/50 ເພື່ອແລກປ່ຽນບັນດາບັນຫາສຳຄັນລະຫວ່າງ ສອງປະເທດ, ຊຸກຍູ້ການເຄື່ອນໄຫວແລກປ່ຽນ ລະຫວ່າງ ສະມາຊິກລັດຖະສະພາຍິງ ຂອງສະພາແຫ່ງຊາດ, ເພີ່ມທະວີບົດບາດຂອງແມ່ຍິງໃນການເຄື່ອນໄຫວການເມືອງ ກໍ່ຄື ສະເໜີໃຫ້ມີການເພີ່ມທະວີການສົມທົບ ຕິດຕາມກວດກາ ການປະຕິບັດບັນດາຂໍ້ຕົກລົງການຮ່ວມມືທີ່ໄດ້ລົງນາມ ລະຫວ່າງສອງປະເທດ. ທ່ານ Vyacheslav Vododin ກໍ່ແຈ້ງໃຫ້ຊາບວ່າ ຄາດວ່າໃນທ້າຍປີນີ້ ທ່ານຈະເດີນທາງມາຢ້ຽມຢາມຫວຽດນາມຢ່າງເປັນທາງການ.

(ແຫຼ່ງຄັດຈາກ VOV)