ໃນຖານະເປັນປະທານ ອາຊຽນ 2020, ຫວຽດນາມ ສືບຕໍ່ມານະພະຍາຍາມປະຕິບັດບົດບາດຂອງຕົນ, ຮັບປະກັນໃຫ້ກອງປະຊຸມດັ່ງກ່າວບັນລຸໄດ້ໝາກຜົນໃດໜຶ່ງທີ່ສອດຄ່ອງກັບສະພາບການໃໝ່ (ພາບ: Reuters//baoquocte.vn)
ໂລກລະບາດໂຄວິດ - 19 ກໍໄດ້ສົ່ງຜົນສະທ້ອນຢ່າງໃຫຍ່ຫຼວງຕໍ່ ປະຊາຄົມ ອາຊຽນ ເວົ້າລວມ ແລະ ອາຍຸການເປັນປະທານ ອາຊຽນ 2020 ຂອງຫວຽດນາມ ເວົ້າສະເພາະ. ເຖິງຢ່າງໃດກໍຕາມ, ບັນດາສິ່ງທ້າທາຍທີ່ພວມປະເຊີນໜ້ານັ້ນ ກໍຈະແມ່ນກາລະໂອກາດເພື່ອໃຫ້ຫວຽດນາມເສີມຂະຫຍາຍບົດບາດເປັນປະທານ ອາຊຽນ 2020 ໄດ້ຫຼາຍກວ່າອີກ.
ມານະພະຍາຍາມສ້າງຄວາມ “ສະໜິດຕິດພັນ ແລະ ເປັນເຈົ້າການຮັບມື”ຍ້ອນຖືກຜົນສະທ້ອນຈາກໂລກລະບາດ, ສະນັ້ນ, ກອງປະຊຸມສຸດຍອດອາຊຽນ ຄັ້ງທີ 36 ຈະດໍາເນີນໃນວັນທີ 26 ມິຖຸນາ ດ້ວຍຮູບແບບອອນລາຍ. ໃນບົດບາດເປັນປະທານ ອາຊຽນ 2020, ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ຈະເປັນປະທານໃນວາລະໄຂ, ວາລະປະຊຸມຄົບຄະນະ, ບັນດາວາລະປະຊຸມພິເສດ ກ່ຽວກັບການເພີ່ມສິດ ອໍານາດໃຫ້ ແມ່ຍິງໃນຍຸກສະໄໝດີຈີຕອນ; ການເຈລະຈາລະຫວ່າງການນໍາບັນດາປະເທດ ອາຊຽນ ກັບ ສະມັດຊາໃຫຍ່ລັດຖະສະພາລະຫວ່າງຊາດ ອາຊຽນ (AIPA), ຜູ້ຕາງໜ້າຊາວໜຸ່ມ ອາຊຽນ, ສະພາທີ່ປຶກສາດໍາເນີນທຸລະກິດ ອາຊຽນ (ASEAN – BAC). ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ, ປະທານ AIPA 41 ຈະຕາງໜ້າໃຫ້ຫວຽດນາມ ກ່າວຄໍາເຫັນທີ່ວາລະປະຊຸມພິເສດກ່ຽວກັບການເພີ່ມສິດ, ອໍານາດໃຫ້ແມ່ຍິງໃນຍຸກສະໄໝດີຈີຕອນ ແລະ ເຂົ້າຮ່ວມກອງປະຊຸມເຈລະຈາລະຫວ່າງການນໍາ ອາຊຽນ ກັບ AIPA.
ກ່ອນໜ້ານັ້ນ, ໃນລະຫວ່າງວັນທີ 22 – 24 ມິຖຸນາ 2020, ຈະດໍາເນີນບັນດາກອງປະຊຸມຈັດກຽມ. ລັດຖະມົນຕີບັນດາກະຊວງການຕ່າງປະເທດ, ກະຊວງ ອຸດສາຫະກໍາ - ການຄ້າ, ກະຊວງແຮງງານ - ທະຫານເສຍອົງຄະ ແລະ ສັງຄົມ, ກະກຽມບັນດາກອງປະຊຸມລັດຖະມົນຕີກະຊວງການຕ່າງປະເທດ ອາຊຽນ ຢ່າງບໍ່ເປັນທາງການ, ສະມັດຊາປະສານງານ ອາຊຽນ ຄັ້ງທີ 26, ສະມັດຊາປະຊາຄົມ ການເມືອງ - ຄວາມໝັ້ນຄົງ ອາຊຽນ ຄັ້ງທີ 21, ກອງປະຊຸມລັດຖະບານບັນດາປະເທດເຂົ້າຮ່ວມການເຈລະຈາ ສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP), ກອງປະຊຸມສະມັດຊາປະຊາຄົມວັດທະນະທໍາ - ສັງຄົມ ອາຊຽນ ຄັ້ງທີ 23. ຕາມທ່ານນາງ ເລທິທູຮັ່ງ ຫົວໜ້າກົມການຂ່າວກະຊວງການຕ່າງປະເທດ ຫວຽດນາມແລ້ວ, ເຖິງວ່າ ໂລກລະບາດໂຄວິດ - 19 ພວມຜັນແປຢ່າງສັບສົນກໍ່ຕາມ, ແຕ່ຫວຽດນາມ ຍັງຕັ້ງໜ້າກະກຽມ ແລະ ກຽມພ້ອມດໍາເນີນກອງປະຊຸມສຸດຍອດຄັ້ງທີ 36 ແລະ ບັນດາກອງປະຊຸມອື່ນໆຂອງປີ 2020. ທ່ານນາງກ່າວວ່າ:
“ໃນສະພາບການໂລກລະບາດໂຄວິດ - 19 ພວມມີບັນດາການຜັນແປສັບສົນຢູ່ບັນດາປະເທດ ແລະ ໃນທົ່ວໂລກນັ້ນ ໄດ້ມີການເຄື່ອນໄຫວພົວພັນຕ່າງປະເທດຈໍານວນໜຶ່ງຂອງຫວຽດນາມ ຖືກດັດປັບໃຫ້ສອດຄ່ອງກັບສະພາບການ. ດ້ວຍຖານະເປັນປະທານ ອາຊຽນ ປີ 2020, ຫວຽດນາມ ໄດ້ມານະພະຍາຍາມ ແລະ ຕັ້ງໜ້າ ພ້ອມກັບບັນດາປະເທດສະມາຊິກຂອງ ອາຊຽນ ເພື່ອສາມາດຈັດຕັ້ງກອງປະຊຸມຕ່າງໆໃນຂອບເຂດປີປະທານ ອາຊຽນ ໄດ້ຢ່າງສໍາເລັດຜົນ”.
ເສີມຂະຫຍາຍບົດບາດຂອງອາຊຽນໃນໂລກທີ່ເຕັມໄປດ້ວຍສະພາບການຜັນແປ
ນັບແຕ່ຕົ້ນປີມາຮອດປັດຈຸບັນ, ຫວຽດນາມໄດ້ເປັນເຈົ້າການຈັດຕັ້ງບັນດາກອງປະຊຸມຂັ້ນຕ່າງໆທາງອອນລາຍໃນອາຊຽນກັບບັນດາຄູ່ຮ່ວມມື, ໃຫ້ສຳເລັດຜົນ ຢ່າງທັນການ ເພື່ອແນໃສ່ຊຸກຍູ້ບັນດາເນື້ອໃນ, ຂໍ້ລິເລີ່ມຂອງປີ ເປັນປະທານ, ຮັບປະກັນຄວາມຄືບໜ້າໃນການປະຕິບັດວຽກງານ ບໍ່ປະໃຫ້ຖືກຢຸດສະງັກ ຫຼື ຂາດຕອນ ແລະ ຖືກຕ້ອງຕາມເນື້ອໃນຈິດໃຈຂອງຫົວຂໍ້ປີ 2020 ແມ່ນ “ສະໜິດຕິດພັນ ແລະ ເປັນເຈົ້າການໃນການຮັບມື”.
ຕໍ່ໜ້າສະພາບການຂອງໂລກລະບາດ, ກອງປະຊຸມສຸດຍອດອາຊຽນຄັ້ງທີ 36 ຈະໄດ້ຮັບການຈັດຕັ້ງຕາມຮູບແບບອອນລາຍ, ຈຸດສຸມແມ່ນກວດກາຄືນ, ຕີລາຄາບັນດາຄວາມຫຍຸ້ງຍາກ, ຂໍ້ຕິດຂັດ ແລະ ສະເໜີບັນດາມາດຕະການແກ້ໄຂໃນການຜັນຂະຫຍາຍບັນດາເນື້ອໃນ, ຂໍ້ລິເລີ່ມຂອງປີເປັນປະທານອາຊຽນ 2020 ໃນທ່າມກາງຜົນກະທົບຈາກໂລກລະບາດ Covid -19. ບົນພື້ນຖານດັ່ງກ່າວ, ຫວຽດນາມໄດ້ສະເໜີໃຫ້ສຸມໃສ່ຜັນຂະຫຍາຍ 4 ບຸລິມະສິດຕົ້ນຕໍທີ່ໄດ້ຮັບການເຫັນດີເປັນເອກະພາບຈາກບັນດາການນຳອາຊຽນກ່ອນໜ້ານັ້ນ, ລວມມີ: ສ້າງກອງທຶນ ອາຊຽນຮັບມືກັບໂລກລະບາດ Covid -19, ສ້າງສາງສະສົມພາກພື້ນອາຊຽນກ່ຽວກັບອຸປະກອນການແພດ, ສ້າງລະບົບມາດຕະຖານຂອງອາຊຽນໃນການຮັບມືກັບບັນດາກໍລະນີການແພດສຸກເສີນໃນປະຊາຄົມ ແລະ ສ້າງແຜນການຟື້ນຟູຂອງອາຊຽນໄລຍະ ຫຼັງ Covid -19. ທ່ານ ຫງວຽນກ໊ວກຢຸງ ຮອງລັດຖະມົນຕີກະຊວງການຕ່າງປະເທດຫວຽດນາມໄດ້ຢັ້ງຢືນບຸລິມະສິດສູງສຸດຍັງຄົງແມ່ນຮັບປະກັນຊີວິດອິນຊີຂອງປະຊາຊົນອາຊຽນ. ທ່ານກ່າວວ່າ:
ໜຶ່ງແມ່ນສະກັດກັ້ນ, ຄວບຄຸມການແຜ່ລະບາດຂອງ ໂລກລະບາດ. ທີ 2 ແມ່ນໜູນຊ່ວຍປະຊາຊົນບັນດາປະເທດອາຊຽນ ທີ່ຖືກຜົນກະທົບຈາກໂລກລະບາດ, ໃນນັ້ນມີການໜູນຊ່ວຍການ ເຮັດລະບຽບການຢູ່ກົງສູນໃຫ້ແກ່ພົນລະເມືອງ ອາຊຽນທີ່ພວມດຳລົງຊີວິດ, ຮ່ຳຮຽນ ແລະ ເຮັດວຽກຢູ່ບັນດາປະເທດສະມາຊິກຂອງ ກັນ ແລະ ຢູ່ປະເທດທີ 3. ແລະ ທີ 3 ແມ່ນຫຼຸດຜ່ອນບັນດາຜົນກະທົບຕໍ່ເສດຖະກິດ - ສັງຄົມຂອງໂລກລະບາດ.
ນັບແຕ່ຕົ້ນປີນີ້, ໃນຖານະເປັນປະທານອາຊຽນ, ຫວຽດນາມ ພ້ອມກັບບັນດາປະເທດ ສະມາຊິກໄດ້ກຳນົດຫົວຂໍ້ລວມໃຫ້ແກ່ປີ 2020 ແມ່ນ “ອາຊຽນສະໜິດຕິດພັນ ແລະ ເປັນເຈົ້າການໃນການຮັບມື” ເພື່ອແນໃສ່ຍູ້ແຮງກິດຈະການສາປະຊາຄົມ ແລະ ເສີມຂະຫຍາຍບົດບາດຂອງອາຊຽນ ໃນໂລກທີ່ເຕັມໄປດ້ວຍສະພາບການຜັນແປ. ການເກີດຂຶ້ນແບບບໍ່ຄາດຄິດ ແລະ ບັນດາຜົນພາຍຫຼັງ, ການຕ່າວປິ້ນທຸກໆດ້ານແບບທີ່ບໍ່ເຄີຍມີມາກ່ອນຂອງໂລກລະບາດ Covid – 19 ສະແດງໃຫ້ເຫັນວ່າ ຫົວຂໍ້ ແລະ ທິດນຳນັ້ນ ແມ່ນຖືກກັບເວລາ ແລະ ເໝາະສົມກ່ວາເວລາໃດໝົດ. ບັນດາຄວາມມານະພະຍາຍາມ ຂອງຫວຽດນາມໃນບົດບາດເປັນປະທານອາ ໄດ້ສະແດງຊຽນອອກຢ່າງ ຖືກຕ້ອງກັບຈິດໃຈສະໜິດຕິດພັນ ແລະ ເປັນເຈົ້າການຮັບມື. ພ້ອມກັບຄວາມສາມັກຄີ, ສະໜິດຕິດພັນລະຫວ່າງບັນດາປະເທດສະມາຊິກອາຊຽນ, ກອງປະຊຸມສູງສຸດອາຊຽນ ຄັ້ງທີ 36 ຈະສືບຕໍ່ຜັນຂະຫຍາຍບັນດາເນື້ອໃນຮັບປະກັນການປະຕິບັດສຳເລັດບັນດາຂໍ້ລິເລີ່ມຂອງປີ ປະທານອາຊຽນ 2020ໃຫ້ເໝາະສົມກັບສະພາບການໃໝ່, ເພື່ອໃຫ້ອາຊຽນສືບຕໍ່ຢັ້ງຢືນບົດບາດເປັນໃຈກາງໃນພາກພື້ນ.
(ແຫຼ່ງຄັດຈາກ VOV)
