ຕອນບ່າຍວັນທີ 03 ກັນຍາ, ຢູ່ ປັກກິ່ງ, ປະເທດ ຈີນ, ເນື່ອງໃນໂອກາດເຂົ້າຮ່ວມພິທີສະເຫຼີມສະຫຼອງ 80 ປີແຫ່ງວັນໄຊຊະນະ ຟາດຊິດ ຂອງປະຊາຊົນໂລກ ແລະ ເຮັດວຽກຢູ່ ຈີນ, ທ່ານປະທານປະເທດ ຫວຽດນາມ ເລືອງເກື່ອງ ໄດ້ຕ້ອນຮັບ ທ່ານນາຍົກລັດຖະມົນຕີ ສະໂລວາກີ Robert Fico.
ທີ່ການຕ້ອນຮັບ, ທ່ານປະທານປະເທດ ເລືອງເກື່ອງ ສະແດງຄວາມເຄົາລົບຕໍ່ການພົວພັນທີ່ເປັນມູນເຊື້ອ ແລະ ການຮ່ວມມືມິດຕະພາບຢ່າງດີງາມກັບ ສະໂລວາກີ; ທ່ານໄດ້ແບ່ງປັນບັນດາເປົ້າໝາຍການພັດທະນາຂອງ ຫວຽດນາມ, ຊົມເຊີຍ ແລະ ຕີລາຄາສູງການພົວພັນມິດຕະພາບທີ່ເປັນມູນເຊື້ອລະຫວ່າງ 2 ປະເທດທີ່ໄດ້ພັດທະນາຢ່າງຕັ້ງໜ້າໃນໄລຍະຜ່ານມາ.
ສ່ວນທ່ານນາຍົກລັດຖະມົນຕີ Robert Fico ກໍ່ຕີລາຄາສູງທີ່ຕັ້ງ ແລະ ບົດບາດຂອງ ຫວຽດນາມ ຢູ່ພາກພື້ນ.
ການນຳ 2 ທ່ານໄດ້ເຫັນດີພັດທະນາການພົວພັນຢ່າງເລິກເຊິ່ງ, ກວ້າງຂວາງໃນທຸກຂົງເຂດ; ພ້ອມກັນນັ້ນ, ກໍ່ເພີ່ມທະວີການສົມທົບກັນຢ່າງແໜ້ນແຟ້ນໃນການແກ້ໄຂບັນດາບັນຫາພາກພື້ນ ແລະ ສາກົນ.
ກ່ອນໜ້ານັ້ນ, ຕອນເຊົ້າວັນດຽວກັນ, ທ່ານປະທານປະເທດ ເລືອງເກື່ອງ ກໍ່ໄດ້ພົບປະກັບການນຳບັນດາປະເທດ ກຳປູເຈຍ, ກຸຍບາ, ສປປ.ເກົາຫຼີ, ອິນໂດເນເຊຍ, ມາເລເຊຍ, ຕີມໍແລັດສະເຕ, ມົງໂກນ, ກາຊັກສະຖານ, ອາແຊກໄບຊານ…
ທີ່ບັນດາການພົບປະ, ທ່ານປະທານປະເທດ ໄດ້ສົ່ງຄຳຢື້ຢາມຖາມຂ່າວຂອງທ່ານເລຂາທິການໃຫຍ່ພັກກອມມູນິດ ຫວຽດນາມ ໂຕເລິມ ພ້ອມກັບການນຳພັກ, ລັດ ແລະ ປະຊາຊົນ ຫວຽດນາມ ເຖິງການນຳ ແລະ ປະຊາຊົນບັນດາປະເທດ ແລະ ສະແດງຄວາມເຊື່ອໝັ້ນວ່າ ຫວຽດນາມ ແລະ ບັນດາປະເທດຈະສືບຕໍ່ຮຽງບ່າຮຽງໄຫຼ່ ເພື່ອສັນຕິພາບ, ສະຖຽນລະພາບ, ການພັດທະນາ ແລະ ຄວາມວັດທະນາຖາວອນ. ການນຳບັນດາປະເທດກໍ່ອວຍພອນ ຫວຽດນາມ ເນື່ອງໃນໂອກາດ 80 ປີແຫ່ງວັນສະຖາປະນາປະເທດ ສສ.ຫວຽດນາມ; ຢືນຢັນການຖືເປັນສຳຄັນການພົວພັນມິດຕະພາບ ແລະ ນ້ຳໃຈອັນດີງາມກັບ ຫວຽດນາມ, ປາດຖະໜາຢາກຊຸກຍູ້ການພົວພັນຮ່ວມມືໃນທຸກຂົງເຂດກັບ ຫວຽດນາມ.
