ຫວຽດນາມ ແລະ ລັດເຊຍ ເພີ່ມທະວີການຮ່ວມມືເສດຖະກິດ, ການຄ້າ ແລະ ການລົງທຶນ
ມີວິສາຫະກິດຫຼາຍແຫ່ງຊອກໄດ້ບັນດາຄູ່ຮ່ວມມືທີ່ມີຄວາມສາມາດບົ່ມຊ້ອນ, ມີແງ່ຫວັງໃນການຮ່ວມມືເພື່ອນຳເອົາຜະລິດຕະພັນຂອງຕົນແຊກຊຶມເຂົ້າໃນຕະຫຼາດສະຫະພັນລັດເຊຍ.
ຕອນບ່າຍວັນທີ 31 ພຶດສະພາ, ຢູ່ສູນການຄ້າ Food City, ນະຄອນຫຼວງ ມົດສະກຸ, ສະຫະພັນລັດເຊຍ ໄດ້ດຳເນີນການໂອ້ລົມສົນທະນາສົ່ງເສີມການຄ້າການລົງທຶນລະຫວ່າງ ຫວຽດນາມ - ສະຫະພັນລັດເຊຍ.ນີ້ເປັນການເຄື່ອນໄຫວໂດຍກົມສົ່ງເສີມການຄ້າ, ຂຶ້ນກັບກະຊວງອຸດສາຫະກຳ ແລະ ການຄ້າ ຫວຽດນາມ ແລະ ສູນການຄ້າ Food City ສົມທົບກັນຈັດຕັ້ງຂຶ້ນໂດຍມີການເຂົ້າຮ່ວມຂອງບາງວິສາຫະກິດໃນຫຼາຍຂົງເຂດຂອງສອງປະເທດ.
ທີ່ການໂອ້ລົມສົນທະນາ, ວິສາຫະກິດສອງປະເທດໄດ້ແລກປ່ຽນຂໍ້ມູນຂ່າວສານ, ແນະນຳບັນດາຜະລິດຕະພັນຂອງກັນ. ມີວິສາຫະກິດຫຼາຍແຫ່ງຊອກໄດ້ບັນດາຄູ່ຮ່ວມມືທີ່ມີຄວາມສາມາດບົ່ມຊ້ອນ, ມີແງ່ຫວັງໃນການຮ່ວມມືເພື່ອນຳເອົາຜະລິດຕະພັນຂອງຕົນແຊກຊຶມເຂົ້າໃນຕະຫຼາດສະຫະພັນລັດເຊຍ. ທ່ານ ເລຮົ່ງມິງ, ຜູ້ອຳນວຍການສູນສົ່ງເສີມການລົງທຶນພັດທະນາອຸດສາຫະກຳ ແລະ ການຄ້າ, ຂຶ້ນກັບກະຊວງອຸດສາຫະກຳ ແລະ ການຄ້າໄດ້ ເນັ້ນໜັກເຖິງທ່າໄດ້ປຽບຂອງວິສາຫະກິດຫວຽດນາມໃນການສົ່ງອອກ ໄປຍັງຕະຫຼາດ ລັດເຊຍ.
“ສັນຍາການຄ້າເສລີລະຫວ່າງ ຫວຽດນາມ ແລະ ສະຫະພັນ ເສດຖະກິດ ອາຊີ - ເອີລົບໄດ້ຮັບການລົງນາມ ແລະ ຜັນຂະຫຍາຍເຊິ່ງນຳມາເຊິ່ງທ່າໄດ້ປຽບໃຫ້ແກ່ວິສາຫະກິດ ຫວຽດນາມເມື່ອນຳບັນດາຜະລິດຕະພັນເຂົ້າຕະຫຼາດທີ່ບໍ່ມີຮົ້ວກີດຂວາງດ້ານພາສີ. ເຖິງຢ່າງໃດກໍ່ຕາມບັນດາວິສາຫະກິດຄວນເປັນເຈົ້າການ, ຂະຫຍັນຂັນເຄື່ອນໃນການຊອກຫາ ແລະ ຊອກຮູ້ຄ້າ, ຄົ້ນຄ້ວາທ່າໄດ້ປຽບເຊິ່ງສັນຍານຳມາໃຫ້ຢ່າງລະອຽດ.”
(ແຫຼ່ງຄັດຈາກ VOV)