07/01/2022 23:40 GMT+7 Email Print Like 0

ນາຍົກລັດຖະມົນຕີລາວມາຢ້ຽມຢາມສັນຖະວະໄມຕີ ຫວຽດນາມ: ເຫດການເປີດສາກໃຫ້ປີມິດຕະພາບ ຫວຽດນາມ - ລາວ

      ການຢ້ຽມຢາມສັນຖະວະໄມຕີ ຫວຽດນາມ ເປັນການເປີດສາກໃຫ້ແກ່ບັນດາການເຄື່ອນໄຫວຂອງປີມິດຕະພາບ ລາວ - ຫວຽດນາມ, ຫວຽດນາມ - ລາວ 2022.
ທ່ານເອກອັກຄະລັດຖະທູດແຫ່ງ ສປປ.ລາວ ປະຈຳ ຫວຽດນາມ ແສງເພັດ ຮຸ່ງບຸນຍວງ (ພາບ: Duc Anh/VOV5)
      ໂດຍໄດ້ຮັບຄຳເຊື້ອເຊີນຈາກທ່ານນາຍົກລັດຖະມົນຕີ ຫວຽດນາມ ຟ້າມມິນຈິງ, ຄະນະຜູ້ແທນຂັ້ນສູງຂອງລັດຖະບານ ລາວ ໂດຍທ່ານນາຍົກລັດຖະມົນຕີ ລາວ ພັນຄຳ ວິພາວັນ ເປັນຫົວໜ້າຄະນະ ຈະມາຢ້ຽມຢາມສັນຖະວະໄມຕີ ຫວຽດນາມ ຢ່າງເປັນທາງການ ໃນລະຫວ່າງວັນທີ 08 – 10 ມັງກອນ 2022. ນີ້ແມ່ນການຢ້ຽມຢາມ ຫວຽດນາມ ຄັ້ງທຳອິດຂອງການນຳຂັ້ນສູງຕ່າງປະເທດໃນປີ 2022. ເນື່ອງໃນໂອກາດນີ້, ທ່ານເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສປປ.ລາວ ປະຈຳ ຫວຽດນາມ ແສງເພັດ ຮຸ່ງບຸນຍວງ ຖືວ່າ, ນີ້ແມ່ນເຫດການມີຄວາມໝາຍສຳຄັນທີ່ສຸດ, ເປີດສາກໃຫ້ແກ່ບັນດາການເຄື່ອນໄຫວຂອງປີມິດຕະພາບ ລາວ - ຫວຽດນາມ, ຫວຽດນາມ - ລາວ 2022.
            "ປີ 2022 ເປັນປີທີ່ມີຄວາມໝາຍສຳຄັນເປັນພິເສດ ໃນການພົວພັນລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ການນຳຂັ້ນສູງຂອງສອງພັກ, ສອງລັດ ໄດ້ເລືອກເອົາປີ 2022 ເປັນ “ປີສາມັກຄີ ມິດຕະພາບ ລາວ-ຫວຽດນາມ, ຫວຽດນາມ-ລາວ” ເພື່ອສະເຫລີມສະຫລອງ 2 ວັນປະຫວັດສາດຍິ່ງໃຫຍ່ ນັ້ນຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ (18 ກໍລະກົດ 1977 - 18 ກໍລະກົດ 2022) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (5 ກັນຍາ 1962 – 5 ກັນຍາ 2022). ການຢ້ຽມຢາມ ສສ ຫວຽດນາມ ຢ່າງເປັນທາງການຂອງ ສະຫາຍ ພັນຄຳ ວິພາວັນ, ນາຍົກລັດຖະມົນຕີ ສປປ ລາວ ເປັນເຫດການທຳອິດເປີດສາກໃຫ້ແກ່ການສະເຫລີມສະຫລອງ 2 ວັນປະຫວັດສາດທີ່ຍິ່ງໃຫຍ່ນັ້ນ"
        ຕາມລາຍການ, ທ່ານນາຍົກລັດຖະມົນຕີລາວ ພັນຄຳ ວິພາວັນ ຈະພົບປະກັບທ່ານນາຍົກລັດຖະມົນຕີ ຫວຽດນາມ ຟ້າມມິນຈິງ; ເປັນສັກຂີພິຍານພິທີລົງນາມໃນເອກະສານຮ່ວມມືຫຼາຍສະບັບ; ປຸກລະດົມປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ; ເຂົ້າຮ່ວມກອງປະຊຸມນັດສາມັນລະຫວ່າງ 2 ກົມການເມືອງ; ເປັນປະທານຮ່ວມກອງປະຊຸມຄະນະກຳມະການລະຫວ່າງລັດຖະບານ ຫວຽດນາມ - ລາວ ຄັ້ງທີ 44. ນອກນັ້ນ, ທ່ານນາຍົກລັດຖະມົນຕີ ພັນຄຳ ວິພາວັນ ຈະເຂົ້າຢ້ຽມຂ່ຳນັບທ່ານເລຂາທິການໃຫຍ່ພັກກອມມູນິດ ຫວຽດນາມ ຫງວຽນຝູຈ້ອງ; ພົບປະ ກັບທ່ານປະທານປະເທດ ຫງວຽນຊວັນຟຸກ; ທ່ານປະທານສະພາແຫ່ງຊາດ ເວືອງດິ່ງເຫ້ວ, ຕ້ອນຮັບຄະນະວິສາຫະກິດດີເດັ່ນຂອງ ຫວຽດນາມ…
(ແຫຼ່ງຄັດຈາກ VOV)