នាថ្ងៃទី ២៧ ខែវិច្ឆិកា សម្ព័ន្ធអង្គការមិត្តភាពទីក្រុងហូជីមិញ បានរៀបចំពិធីជួបសំណេះសំណាលក្នុងឱកាសអបអរសាទរខួបលើកទី ៤៥ នៃទិវាបុណ្យឯករាជ្យជាតិនៃសាធារណរដ្ឋប្រជាធិបតេយ្យប្រជាមានិតឡាវ។

ទិដ្ឋភាពនៃពិធីជួបសំណេះសំណាល

លោក Huynh Cach Mang ប្រធានសមាគមមិត្តភាពវៀតណាម - ឡាវនៃទីក្រុងហូជីមិញបានអបអរសាទរចំពោះសមិទ្ធិដែលបក្ស រដ្ឋាភិបាល និងប្រជាជនឡាវសម្រេចបានក្រោយរយៈពេល ៤៥ ឆ្នាំនៃការកសាង និងអភិវឌ្ឍន៍ប្រទេសជាតិ។ ជាមួយគ្នានេះ លោកបានសង្កត់ធ្ងន់ថា៖ វៀតណាមនិងឡាវជាប្រទេសជាភាតរភាពភូមិផងរបងជាមួយគ្នានិងប្រកៀកស្មាជួយគ្នាឆ្លងកាត់ដំណើរបដិវត្តន៍។ ទំនាក់ទំនងសាមគ្គីភាពពិសេសវៀតណាម - ឡាវជាប្រភពកម្លាំងពលំជានិច្ច ដើម្បីជួយប្រទេសទាំងពីរប្រយុទ្ធនិងឈ្នះលើមាគ៌ារំដោះជាតិ ការពារបូរណភាពទឹកដី និងកសាងប្រទេសប្រកបដោយវិបុលភាព។

នៅក្នុងពិធីនេះ លោក Vanxay Xaysena អគ្គកុងស៊ុលរងរបស់ឡាវប្រចាំទីក្រុងហូជីមិញ បានថ្លែងអំណរគុណចំពោះការគាំទ្រដ៏ធំធេង និងជំនួយដ៏មានតម្លៃ និងទាន់ពេលវេលាពីបក្ស រដ្ឋាភិបាល និងប្រជាជនវៀតណាមក្នុងរយៈពេល ៤៥ ឆ្នាំកន្លងមក។ លោកបានបញ្ជាក់ថា ប្រជាជនឡាវប្តេជ្ញាពួតដៃជាមួយវៀតណាមខិតខំប្រឹងប្រែងអស់ពីកម្លាំងកាយចិត្ត ដើម្បីការពារ ថែរក្សា និងជំរុញទំនាក់ទំនងមិត្តភាពជាប្រពៃណី និងសាមគ្គីភាពពិសេសរវាងប្រទេសទាំងពីរ ឲ្យកាន់តែនិរន្តរភាពនិងមានប្រសិទ្ធភាពថែមទៀត៕

តាមកាសែតកងទ័ពប្រជាជនអនឡាយ