ពីដើមឬស្សីតូចៗជាច្រើន ចង្កៀងផ្កាយត្រូវបានបង្ហើយជាបណ្តើរៗ ក្រោមការច្នៃប្រឌិត និងការយកចិត្តទុកដាក់របស់លោកគ្រូ អ្នកគ្រូ និងសិស្សានុសិស្សនៃអនុវិទ្យាល័យអន្តេវាសិកដ្ឋាន Co Ma ឃុំ Co Ma ស្រុក Son La។ នៅតំបន់ខ្ពង់រាបឆ្ងាយពីទីក្រុង សិស្សានុសិស្សនៅទីនេះកំពុងប្រារព្ធពិធីបុណ្យព្រះច័ន្ទពេញបូណ៌មីដ៏កក់ក្តៅ ពោរពេញដោយក្តីស្រលាញ់។

“ខ្ញុំឈ្មោះ Sung Thi Tau ជាសិស្សសាលា យើងទាំងអស់គ្នានៅឆ្ងាយពីផ្ទះ ស្នាក់នៅសាលាបណ្ដុះបណ្ដាលជាមួយលោកគ្រូ អ្នកគ្រូ ពិធីបុណ្យតេត សែនលោកខែ ឆ្នាំនេះ យើងកំពុងប្រារព្ធពិធីបុណ្យដ៏កក់ក្តៅជាមួយលោកគ្រូ អ្នកគ្រូ និងមិត្តភក្តិនៅក្នុងសាលា។ ពួកយើងធ្វើចង្កៀងគោមផ្កាយជាមួយគ្នា ផ្លាស់ប្តូរការសម្តែងវប្បធម៌ក្នុងរាត្រីព្រះច័ន្ទពេញបូណ៌មី សប្បាយរីករាយ និងរំភើបចិត្តជាខ្លាំង”។

ក្នុងចំណោមសិស្សានុសិស្សជិត ៦៥០នាក់ នៃអនុវិទ្យាល័យ Co Ma សម្រាប់ជនជាតិភាគតិច គឺជាកុមារនៃជនជាតិភាគតិច មកពីគ្រួសារក្រីក្រ លើបន្ទាត់ក្រីក្រ និងជាពិសេសនៅក្នុងស្ថានភាពលំបាក។ លោកគ្រូ Le Trung Kien នាយករងសាលាបានចែករំលែកថា៖ “ដោយយល់អំពីស្ថានភាពរបស់សិស្ស សាលាបានប្រមូលធនធានទាំងអស់ពីសង្គម អង្គការ និងបុគ្គលនានា ដើម្បីរៀបចំពិធីបុណ្យសែនលោកខែដ៏មានអត្ថន័យ ជួយសិស្សទទួលបានបទពិសោធន៍កាន់តែច្រើន ដោយហេតុនេះទទួលបានកម្លាំងចិត្តកាន់តែច្រើនឡើងក្នុងជីវភាពប្រចាំថ្ងៃ”។

កុមារនៅតំបន់ព្រំដែន Phieng Pan, Son La ទទួលបានអំណោយក្នុងឱកាសបុណ្យព្រះច័ន្ទពេញបូណ៌មី។ រូបថត៖ Le Hanh/VOV ភាគពាយ័ព្យ

នៅក្នុងឃុំព្រំដែន Phieng Pan កម្មាភិបាល និងយុទ្ធជនប៉ុស្តិ៍ការពារព្រំដែន Phieng Pan និងក្រុមអ្នកស្ម័គ្រចិត្តក៏បានឆ្លងកាត់ភ្នំ និងព្រៃឈើរាប់សិបគីឡូម៉ែត្រ ដើម្បីនាំយកពិធីបុណ្យសែនលោកខែដល់កុមារមត្តេយ្យសិក្សា និងបឋមសិក្សានៅសាលារៀន។

សិស្សានុសិស្ស និងប្រជាពលរដ្ឋនៅតំបន់ព្រំដែន ទទួលបានការពិនិត្យសុខភាព ពិគ្រោះ និងផ្តល់ថ្នាំដោយឥតគិតថ្លៃ។ រូបថត៖ Le Hanh/VOV Tay Bac

ពិធីបុណ្យសែនលោកខែកំពុងមកដល់ជាមួយប្អូនៗកុមារ និងប្រជាជនទូទាំងប្រទេស។ សម្រាប់កុមារនៅតំបន់ដាច់ស្រយាល តំបន់ភ្នំ និងព្រំដែន អំណោយពិធីបុណ្យនេះ គឺជាប្រភពលើកទឹកចិត្តពិសេស បន្ថែមកម្លាំងចិត្តដល់សិស្សានុសិស្សនៅទីនេះ បន្តការសិក្សា ស្នាក់នៅក្នុងថ្នាក់ ជំនះការលំបាក និងខិតខំកែលម្អ៕