ប្រធានរដ្ឋវៀតណាម លោក លឿង គឿង។ រូបថត៖ VOV

ក្នុងសារផ្ញើជូនអគ្គលេខាធិការនិងប្រធានមហាសន្និបាតអង្គការសហប្រជាជាតិ ក្នុងឱកាសទិវាអន្តរជាតិនៃសាមគ្គីភាពជាមួយប្រជាជនប៉ាឡេស្ទីន លោកប្រធានរដ្ឋវៀតណាម លឿង គឿង បានអះអាងសារជាថ្មីអំពីជំហររឹងមាំរបស់វៀតណាមក្នុងការគាំទ្រការដោះស្រាយបញ្ហាប៉ាឡេស្ទីនដោយសន្តិវិធី ឈរលើមូលដ្ឋានគោរពច្បាប់អន្តរជាតិនិងដំណោះស្រាយពាក់ព័ន្ធរបស់អង្គការសហប្រជាជាតិ ធានាផលប្រយោជន៍ស្របច្បាប់របស់ភាគីពាក់ព័ន្ធ ជាពិសេសសិទ្ធិមិនអាចរំលោភបំពានបានរបស់ប្រជាជនប៉ាឡេស្ទីន ក្នុងនោះមានសិទ្ធិបង្កើតរដ្ឋប៉ាឡេស្ទីនឯករាជ្យ មានអធិបតេយ្យភាព និងរួមរស់ដោយសន្តិភាពនិងសន្តិសុខជាមួយរដ្ឋអ៊ីស្រាអែល។

លោកប្រធានរដ្ឋបានអះអាងថា រដ្ឋាភិបាលនិងប្រជាជនវៀតណាមគាំទ្រយ៉ាងមុតមាំចំពោះបុព្វហេតុនៃការតស៊ូសុច្ចរិតដើម្បីឯករាជ្យនិងសេរីភាពរបស់ប្រជាជនប៉ាឡេស្ទីន ហើយត្រៀមខ្លួនជាស្រេចក្នុងការចូលរួមក្នុងកិច្ចខិតខំប្រឹងប្រែងរួមរបស់សហគមន៍អន្តរជាតិ ដើម្បីជំរុញការសន្ទនា ការផ្សះផ្សា និងជំនួយមនុស្សធម៌សម្រាប់ប្រជាជនក្នុងតំបន់ជម្លោះ រួមចំណែកធានាសន្តិភាព សន្តិសុខ និងស្ថិរភាពក្នុងតំបន់និងពិភពលោក៕