នៅក្នុងសម័យពិភាក្សាស្តីពី "កសាងហេដ្ឋារចនាសម្ព័ន្ធសម្រាប់សេដ្ឋកិច្ចអាស៊ាននាពេលអនាគត" នាយករដ្ឋមន្ត្រី លោក ឡេ មិញហ៊ឹង បានលើកឡើងថា ផែនការយុទ្ធសាស្ត្រតភ្ជាប់អាស៊ាន ២០២៦-២០៣៥ ចាំបាច់ត្រូវផ្តោតលើអាទិភាពចំនួន ៤។ ទីមួយ ការតភ្ជាប់គមនាគមន៍ដឹកជញ្ជូន និងភស្តុភារកម្មឆ្លងដែន។ ទីពីរ ការតភ្ជាប់ថាមពល ដោយជំរុញការតភ្ជាប់ហេដ្ឋារចនាសម្ព័ន្ធថាមពលក្នុងតំបន់ ធ្វើពិពិធកម្មប្រភពផ្គត់ផ្គង់ និងជំរុញការផ្លាស់ប្តូរថាមពលប្រកបដោយចីរភាព។ ទីបី តភ្ជាប់ឌីជីថល តាមរយៈការកសាងប្រព័ន្ធអេកូឡូស៊ីឌីជីថលក្នុងតំបន់ប្រកបដោយសុវត្ថិភាព រលូន និងបរិយាបន្ន។ ទីបួន ការតភ្ជាប់ស្ថាប័ន និងប្រជាជន។ ដើម្បីអនុវត្តអាទិភាពទាំងនេះឱ្យបានសម្រេច អាស៊ានចាំបាច់ត្រូវធ្វើសកម្មភាពរួមគ្នា ដោយផ្លាស់ប្តូរយ៉ាងខ្លាំងក្លាពីចក្ខុវិស័យ និងការប្តេជ្ញាចិត្ត ទៅជាកម្មវិធី និងគម្រោងជាក់ស្តែង។ ឈរលើមូលដ្ឋាននោះ ប្រមុខរដ្ឋាភិបាលវៀតណាមបានស្នើទិសដៅសកម្មភាពជាក់ស្តែងចំនួន ៤ រួមមាន៖ កសាងបញ្ជីអាទិភាពហេដ្ឋារចនាសម្ព័ន្ធអាស៊ានដល់ឆ្នាំ២០៤០; បង្កើនការសម្របសម្រួលគម្រោងឆ្លងដែន; អភិវឌ្ឍន៍ប្រព័ន្ធអេកូឡូស៊ីរៀបចំគម្រោង និងការកៀរគរមូលធនក្នុងតំបន់ ព្រមទាំងការចាត់ទុកវិស័យឯកជនជាដៃគូពិតប្រាកដ។

នាយករដ្ឋមន្ត្រី លោក ឡេ មិញហ៊ឹង បានសង្កត់ធ្ងន់ថា ដោយស្ថិតនៅចំណុចប្រសព្វនៃច្រករបៀងសេដ្ឋកិច្ច និងខ្សែចង្វាក់ផ្គត់ផ្គង់ជាច្រើនក្នុងតំបន់ វៀតណាមប្តេជ្ញាអភិវឌ្ឍន៍ហេដ្ឋារចនាសម្ព័ន្ធផ្សារភ្ជាប់នឹងការបង្កើនការតភ្ជាប់អាស៊ាន; រួមដំណើរជាមួយធុរកិច្ច និងដៃគូអន្តរជាតិ ដោយប្តេជ្ញាចិត្តដោះស្រាយរាល់ឧបសគ្គ បង្កើតបរិយាកាសវិនិយោគ និងធុរកិច្ចប្រកបដោយស្ថិរភាព និងអំណោយផល។ លោកនាយករដ្ឋមន្ត្រីបានសង្កត់ធ្ងន់ថា៖ ដោយស្មារតីនៃការតភ្ជាប់ជាក់ស្តែង ការកៀរគរប្រកបដោយប្រសិទ្ធភាព និងការធ្វើសកម្មភាពរួមគ្នា យើងនឹងបង្កើតបាននូវអាស៊ានមួយប្រកបដោយថាមវន្ត ភាពធន់ និងបរិយាបន្ន ដែលនាំមកនូវផលប្រយោជន៍ជាក់ស្តែង និងយូរអង្វែងជូនប្រជាជន ធុរកិច្ច និងតំបន់ទាំងមូល៕