នេះជាការវាយតម្លៃរបស់ឯកអគ្គរដ្ឋទូតកាហ្សាក់ស្ថានប្រចាំនៅ ប្រទេស​វៀតណាម លោក Kanat Tumysh នៅចំពោះមុខដំណើរទស្សនកិច្ចផ្លូវរដ្ឋរបស់អគ្គលេខាបក្ស តូ ឡឹម ទៅកាន់ប្រទេសកាហ្សាក់ស្ថានចាប់ពីថ្ងៃទី ៥-៧ ឧសភា។

យោងតាមលោកឯកអគ្គរដ្ឋទូត Kanat Tumysh បន្ទាប់ពីដំណើរទស្សនកិច្ចនៅវៀតណាមឆ្នាំ ២០២៣ របស់ប្រធានាធិបតីកាហ្សាក់ស្ថាន លោក Jomart Tokaev ដំណើរទស្សនកិច្ចរបស់លោកអគ្គលេខាបក្ស តូ ឡឹម ទៅកាន់កាហ្សាក់ស្ថានលើកនេះ នឹងលើកកំពស់ទំនាក់ទំនងរវាងប្រទេសទាំងពីរឡើងកំពស់ថ្មីមួយ។ លោកឯកអគ្គរដ្ឋទូតបានសង្កត់ធ្ងន់ថា មូលដ្ឋានសម្រាប់ជំនឿនេះគឺថា ប្រទេសទាំងពីរសម្រេចបាននូវលទ្ធផលកិច្ចសហប្រតិបត្តិការសំខាន់ៗជាច្រើនក្នុងរយៈពេលថ្មីៗនេះ ជាពិសេសទំហំពាណិជ្ជ កម្មទ្វេភាគីកាលពីឆ្នាំមុនឈានដល់ជិត ១ ពាន់លានដុល្លារអាមេរិក កើនឡើងជិត ៤ ដងបើធៀបនឹងឆ្នាំ ២០២១ តាមនោះធ្វើឱ្យកាហ្សាក់ស្ថានក្លាយជាដៃគូពាណិជ្ជកម្មធំទីពីររបស់វៀតណាម ក្នុងសហភាពសេដ្ឋកិច្ចអឺរ៉ាស៊ី (EAEU) និងវៀតណាមជាដៃគូធំទីពីររបស់កាហ្សាក់ស្ថានក្នុងសមាគមប្រជាជាតិអាស៊ីអាគ្នេយ៍ (អាស៊ាន)។ លើសពីនេះ កិច្ចសហប្រតិបត្តិការអាកាសចរណ៍ ឡូគីស្ទិច និងទេសចរណ៍រវាងប្រទេសទាំងពីរមានការអភិវឌ្ឍយ៉ាងខ្លាំង ដោយក្នុងនោះមានជើងហោះហើរចំនួន ៤២ ជើងក្នុងមួយសប្តាហ៍រវាងប្រទេសទាំងពីរនៅខែមិថុនាក្រោយ ហើយចាប់ពីថ្ងៃទី ២៥ ឧសភាតទៅ ការលើកលែងទិដ្ឋាការសម្រាប់ពលរដ្ឋនៃប្រទេសទាំងពីរកាន់លិខិតឆ្លងដែនធម្មតានឹងចូលជាធរមានជាផ្លូវការ។

ទាក់ទិននឹងសក្ដានុពលនៃកិច្ចសហប្រតិបត្តិការនាពេលខាងមុខ លោក ឯកអគ្គរដ្ឋទូត Kanat Tumysh បានបញ្ជាក់ថា នៅឆ្នាំ២០៣០ ប្រទេសទាំងពីរអាចបង្កើនទំហំពាណិជ្ជកម្មទ្វេភាគីពី ២ ទៅ ៥ ដង (ពី ២ ទៅ ៥ ពាន់លានដុល្លារ) ព្រោះនៅមានសក្កានុពលច្រើនសម្រាប់កិច្ចសហប្រតិបត្តិការលើវិស័យឡូគីស្ទីច កសិកម្ម ឧស្សាហកម្មការពារជាតិ ថាមពល។ល។  លោកឯកអគ្គរដ្ឋទូតបានអះអាងថា កាហ្សាក់ស្ថានមានការរំពឹងទុកខ្ពស់ចំពោះដំណើរទស្សនកិច្ចរបស់អគ្គលេខាបក្ស តូ ឡឹម ដើម្បីលើកកម្ពស់ទំនាក់ទំនងទ្វេភាគី។ ក្នុងដំណើរទស្សនកិច្ចនេះ ភាគីទាំងពីរនឹងរៀបចំវេទិកាធុរកិច្ច ដោយមានការចូលរួមពីតំណាងធុរកិច្ចវៀតណាម និងកាហ្សាក់ស្ថានជាង ១២០ ហើយរំពឹងថា នឹងចុះហត្ថលេខាលើឯកសារកិច្ចសហប្រតិបត្តិការជាច្រើន។ លោកឯកអគ្គរដ្ឋទូតបានសង្កត់ធ្ងន់ថា ក្រោយរយៈពេល ៦៦ ឆ្នាំ បន្ទាប់ពីដំណើរទស្សនកិច្ចរបស់លោកប្រធាន ហូជីមិញលើកតំបូងនៅកាហ្សាក់ស្ថានក្នុងឆ្នាំ ១៩៥៩ ប្រទេសទាំងពីរកំពុងឈានចូលដល់ “សម័យកាលមាស” នៃទំនាក់ទំនងមិត្តភាព និងកិច្ចសហប្រតិបត្តិការលើគ្រប់វិស័យ៕