ប្រធានក្រុមប្រឹក្សាអគ្គសេនាធិការចម្រុះអាមេរិក បានឲ្យដឹងថា សហរដ្ឋអាមេរិក មានបំណងចង់ចាប់ផ្ដើមឡើងវិញនូវកាណាល់ទំនាក់ទំនងយោធាជាមួយប្រទេសចិន ដែលត្រូវបានផ្អាកកាលពីឆ្នាំមុន បន្ទាប់ពីដំណើរទស្សនកិច្ចទៅកាន់តៃវ៉ាន់កាលពី ឆ្នាំមុន របស់ប្រធានសភាជាន់ទាបអាមេរិក លោកស្រី Nancy Pelosy។

ប្រធានក្រុមប្រឹក្សាអគ្គសេនាធិការចម្រុះអាមេរិក លោកឧត្តមសេនីយ Charles Brown កាលពីថ្ងៃទី ១០ វិច្ឆិកា បាននិយាយថា លោកបានផ្ញើលិខិតមួយច្បាប់ទៅកាន់ សមភាគីចិន គឺលោក Liu Zhenli ដើម្បីបង្ហាញពីគោលបំណងរបស់អាមេរិកក្នុងការ បន្តកិច្ចសន្ទនាយោធារវាងប្រទេសទាំងពីរ។ យោងតាមលោកឧត្តមសេនីយ Charles Brown ការបន្តកិច្ចសន្ទនាយោធារវាងសហរដ្ឋអាមេរិក និងចិន គឺជាគោលដៅមួយនៃ រដ្ឋបាលរបស់ប្រធានាធិបតីលោក Joe Biden ហើយប្រការនេះគឺដើម្បីជៀសវាងការ យល់ច្រឡំដែលអាចនាំឱ្យមានវិបត្តិ។

លិខិតរបស់លោកឧត្តមសេនីយ៍ Charles Brown ត្រូវបានផ្ញើចេញក្នុងបរិបទ ដែលប្រធានាធិបតីអាមេរិកលោក Joe Biden និងប្រធានរដ្ឋចិនលោក Xi Jinping នឹង ជួបគ្នានៅថ្ងៃទី ១៥ ខែវិច្ឆិកា នៅខាងក្រៅកិច្ចប្រជុំកំពូលវេទិកាសហប្រតិបត្តិការ សេដ្ឋកិច្ចអាស៊ី-ប៉ាស៊ីហ្វិក (APEC) នៅទីក្រុង San Francisco សហរដ្ឋអាមេរិក៕