បន្ទាប់ពីពិធីទទួលស្វាគមន៍ជាផ្លូវការ អគ្គលេខាបក្ស ប្រធានរដ្ឋ លោក តូ ឡឹម និងប្រធានាធិបតីអាស៊ែបៃហ្សង់ លោក អ៊ីលហាំ អាលីយ៉េវ បានដំណើរការជំនួបពិភាក្សា។ នៅក្នុងជំនួបនេះ អគ្គលេខាបក្ស ប្រធានរដ្ឋ លោក តូ ឡឹម បានបញ្ជាក់ច្បាស់ថា បក្សនិងរដ្ឋវៀតណាម តែងតែយកចិត្តទុកដាក់ជំរុញទំនាក់ទំនងមិត្តភាព និងកិច្ចសហប្រតិបត្តិការលើវិស័យជាច្រើនជាមួយអាស៊ែបៃហ្សង់ និងគណបក្សកាន់អំណាចអាស៊ែបៃហ្សង់ថ្មី; ព្រមទាំងបញ្ជាក់ថា អាស៊ែបៃហ្សង់គឺជាដៃគូសំខាន់នៅតំបន់ Kavkaz ខាងត្បូង និង Caspi។
លោកអគ្គលេខាបក្ស ប្រធានរដ្ឋវៀតណាម បានស្នើឱ្យភាគីទាំងពីរបន្តពង្រីកវិស័យកិច្ចសហប្រតិបត្តិការប្រពៃណីដូចជា សេដ្ឋកិច្ច-ពាណិជ្ជកម្ម ថាមពល-ប្រេងកាត ការពារជាតិ-សន្តិសុខ វប្បធម៌ កីឡានិងទេសចរណ៍; ទន្ទឹមនឹងនោះ ពង្រីកកិច្ចសហប្រតិបត្តិការទៅកាន់វិស័យថ្មីៗ ដែលមានសក្តានុពលខ្ពស់ ដូចជា នវានុវត្តន៍ វិទ្យាសាស្ត្រនិងបច្ចេកវិទ្យា; សហការយ៉ាងជិតស្និទ្ធរៀបចំសកម្មភាពអបអរសាទរខួប ៣៥ ឆ្នាំនៃការបង្កើតទំនាក់ទំនងការទូត (១៩៩២-២០២៧) បន្តបង្កើតកម្លាំងចលករខ្លាំងក្លា សម្រាប់ភាគីទាំងពីរអនុវត្តក្របខ័ណ្ឌភាពជាដៃគូយុទ្ធសាស្ត្រវៀតណាម - អាស៊ែបៃហ្សង់ ឱ្យអភិវឌ្ឍន៍ជាក់ស្តែង និងមានប្រសិទ្ធភាព។
រីឯខ្លួនវិញ លោកប្រធានាធិបតី អ៊ីលហាំ អាលីយ៉េវ បានស្នើឱ្យភាគីទាំងពីរ លើកទឹកចិត្តដល់សហគ្រាសនៃប្រទេសទាំងពីរ បង្កើតក្រុមហ៊ុនបណ្តាក់ទុនរួមគ្នា ចូលរួមវិនិយោគ លើគម្រោងថាមពលស្អាត ថាមពលថ្មី និងថាមពលកកើតឡើងវិញ ដែលមានលទ្ធភាពអនុវត្តបាន; ជំរុញបន្ថែមទៀតនូវកិច្ចសហប្រតិបត្តិការសេដ្ឋកិច្ច-ពាណិជ្ជកម្ម-វិនិយោគ; បន្តជំរុញទំនាក់ទំនងមិត្តភាព និងកិច្ចសហប្រតិបត្តិការរវាងគណបក្សអាស៊ែបៃហ្សង់ថ្មី និងបក្សកុម្មុយនិស្តវៀតណាម។ ប្រធានាធិបតីលោក អ៊ីលហាំ អាលីយ៉េវ ក៏បានស្នើឲ្យបង្កើនកិច្ចសហប្រតិបត្តិការរវាងរដ្ឋសភានៃប្រទេសទាំងពីរ ក្នុងនោះផ្តោតលើការផ្លាស់ប្តូរគណៈប្រតិភូ ការចែករំលែកបទពិសោធន៍នីតិកម្ម ការកែលម្អក្របខ័ណ្ឌច្បាប់ និងការតាមដានត្រួតពិនិត្យការអនុវត្តកិច្ចព្រមព្រៀងសហប្រតិបត្តិការទ្វេភាគី៕





