ទទួលសេចក្ដីអញ្ជើញរបស់នាយករដ្ឋមន្ត្រីម៉ាឡេស៊ី លោក Anwar Ibrahim និងលោកជំទាវ នៅព្រឹកថ្ងៃទី ២១ វិច្ឆិកា អគ្គលេខាបក្សកុម្មុយនិស្តវៀតណាមលោក តូ ឡឹម និងលោកជំទាវ ង៉ូ ហ្វឿងលី រួមជាមួយគណៈប្រតិភូជាន់ខ្ពស់វៀតណាមបានចាកចេញពីរដ្ឋធានីហាណូយ ទៅបំពេញទស្សនកិច្ចនៅប្រទេសម៉ាឡេស៊ីចាប់ពីថ្ងៃទី២១ ដល់ថ្ងៃទី ២៣ ខែវិច្ឆិកា។

ដោយសង្កត់ធ្ងន់លើអត្ថន័យនៃដំណើរទស្សនកិច្ចផ្លូវការរបស់លោកអគ្គលេខាបក្ស តូ ឡឹម ឯកអគ្គរដ្ឋទូតវៀតណាមប្រចាំនៅម៉ាឡេស៊ី លោក Dinh Ngoc Linh បានមានប្រសាសន៍​ថា៖

“ដំណើរទស្សនកិច្ចរបស់លោកអគ្គលេខាបក្ស តូ ឡឹម នៅប្រទេសម៉ាឡេស៊ី មានអត្ថន័យដ៏សំខាន់ពិសេស ក្នុងការជំរុញចំណងសាមគ្គីភាពរវាងបណ្ដាប្រទេសអាស៊ាន ព្រមទាំងបង្ហាញពីគោលនយោបាយការបរទេសដ៏ខ្ជាប់ខ្ជួនរបស់វៀតណាមនោះ គឺគោរពទំនាក់ទំនងអ្នកជិតខាងមិត្តភាព និងដៃគូយុទ្ធសាស្ត្រជាមួយម៉ាឡេស៊ី ជាមួយគោលបំណងចង់ធ្វើឲ្យស៊ីជម្រៅថែមទៀតនូវទំនាក់ទំនងសហប្រតិបត្តិការដ៏ល្អប្រសើរដែលមានស្រាប់រវាងប្រទេសទាំងពីរ និងឆ្ពោះទៅរកកម្ពស់ថ្មី។ ដំណើរទស្សនកិច្ចលើកនេះក៏ជាសញ្ញាសម្គាល់ថ្មី ដែលរួមចំណែកពង្រឹងមូលដ្ឋានគ្រឹះនយោបាយ និងបំពេញបន្ថែមកម្លាំងចលករដើម្បីជំរុញកិច្ចសហប្រតិបត្តិការជាយុទ្ធសាស្ត្ររវាងប្រទេសទាំងពីរលើគ្រប់វិស័យឱ្យកាន់តែរីកចម្រើនខ្លាំងក្លា ទូលំទូលាយ និងមានប្រសិទ្ធភាពថែមទៀត ជាពិសេសក្នុងបរិបទដែលប្រទេសទាំងពីរកំពុងឈានចូលឆ្នាំទី ១០ នៃទំនាក់ទំនងភាពជាដៃគូយុទ្ធសាស្ត្រ”។

ក្នុងដំណើរទស្សនកិច្ចលើកនេះ ភាគីទាំងពីរនឹងពិភាក្សាអំពីវិធានការពង្រីកកិច្ចសហប្រតិបត្តិការលើវិស័យសក្តានុពលផ្សេងទៀត ដូចជាកិច្ចសហប្រតិបត្តិការហាឡាល់ ការផ្លាស់ប្តូរឌីជីថល សេដ្ឋកិច្ចឌីជីថល សេដ្ឋកិច្ចបៃតង កសិកម្មបច្ចេកវិទ្យាខ្ពស់... ពីនោះ រួមចំណែកបង្កើតសន្ទុះថ្មីដើម្បីទំនាក់ទំនងរវាងប្រទេសទាំងពីរឡើងដល់កម្ពស់ថ្មី៕