ប្រធានរដ្ឋសភាលោក ត្រឹន ថាញ់ មិន ថ្លែងសុន្ទរកថាបិទសម័យប្រជុំលើកទី៩ នៃរដ្ឋសភានីតិកាលទី១៥ (រូបថត៖ quochoi.vn)

អញ្ជើញចូលរួមបិទសម័យប្រជុំមានអគ្គលេខាគណៈកម្មាធិការមជ្ឈិមបក្សកុម្មុយនិស្តវៀតណាម លោក តូ ឡឹម ប្រធានរដ្ឋ លោក លឿង គឿង នាយករដ្ឋមន្ត្រី លោក ហ្វាម មិញ ជិញ ប្រធានរដ្ឋសភាលោក ត្រឹន ថាញ់ មិន រួមទាំងថ្នាក់ដឹកនាំបក្ស រដ្ឋ អតីតថ្នាក់ដឹកនាំបក្ស រដ្ឋ។ សម័យបិទកិច្ចប្រជុំត្រូវបានផ្សាយបន្តផ្ទាល់តាមវិទ្យុសម្លេងវៀតណាម និងទូរទស្សន៍វៀតណាម។

ក្នុងសម័យប្រជុំនេះ រដ្ឋសភាបានពិនិត្យ ផ្តល់យោបល់ និងសម្រេចលើបរិមាណការងារដ៏ច្រើន ដែលមានសារៈសំខាន់ជាប្រវត្តិសាស្ត្រ ដោយមានខ្លឹមសារសំខាន់ៗ  ផ្សាភ្ជាប់យ៉ាងជិតស្និទ្ធទៅនឹងតម្រូវការនៃការផ្លាស់ប្តូរថ្មី ការកែលម្អស្ថាប័ន និងការបង្រួមក្បាលម៉ាស៊ីនដឹកនាំ។ រដ្ឋសភាបានអនុម័តលើច្បាប់ចំនួន៣៤ សេចក្តីសម្រេចចិត្តចំនួន ៣៤ ពិភាក្សា និងផ្តល់យោបល់លើសេចក្តីព្រាងច្បាប់ចំនួន៦។

ប្រធានរដ្ឋសភាលោក ត្រឹន ថាញ់មិន មានប្រសាសន៍ថា៖ “នេះជាសម័យប្រជុំដែលមានមាតិកានីតិបញ្ញត្តិធំបំផុតមិនធ្លាប់មាន។ ជាពិសេស រដ្ឋសភាបានពិភាក្សា និងអនុម័តលើសេចក្តីសម្រេចចិត្ត វិសោធនកម្ម និងបំពេញបន្ថែមមាត្រាមួយចំនួននៃរដ្ឋធម្មនុញ្ញនៃសាធារណរដ្ឋសង្គមនិយមវៀតណាម។ រដ្ឋសភាបានអនុម័តសេចក្តីសម្រេចបង្កើតក្រុមប្រឹក្សាជាតិ រៀបចំការបោះឆ្នោតជ្រើស រើសប្រធានក្រុមប្រឹក្សាជាតិរៀបចំការបោះឆ្នោត និងអនុម័តអនុប្រធាន និងសមាជិកក្រុមប្រឹក្សា។ ទាំងនេះគឺជាការសម្រេចចិត្តដ៏សំខាន់ក្នុងការរៀបចំដោយប្រុងប្រយ័ត្នសម្រាប់ការបោះឆ្នោតនៅខែមីនា ឆ្នាំ ២០២៦។ ការ ងារបុគ្គលិកត្រូវបានអនុវត្តស្របតាមបទប្បញ្ញត្តិរបស់បក្ស និងច្បាប់រដ្ឋ”។

ប្រធានរដ្ឋសភា លោក ត្រឹន ថាញ់ មិន បានអះអាងថា សម័យប្រជុំលើកទី៩ នៃរដ្ឋសភានីតិកាលទី១៥ ទទួលបានជោគជ័យយ៉ាងត្រចះត្រចង់ ដែលជាសម័យប្រជុំជាប្រវត្តិសាស្ត្រ។

“សម័យប្រជុំលើកទី ៩ ជាព្រឹត្តិការណ៍សំខាន់មួយក្នុងប្រវត្តិសាស្ត្ររដ្ឋធម្មនុញ្ញ និងនីតិបញ្ញត្តិនៃរដ្ឋសភានីតិកាលទី១៥។ សេចក្តីសម្រេចចិត្ត និងច្បាប់ដែលបានអនុម័តនៅក្នុងសម័យប្រជុំនេះ គឺជាបដិវត្តន៍ ដែលចាប់ផ្តើមកំណែទម្រង់ស្ថាប័ន និងភារកិច្ចតម្រង់ទិសសម្រាប់ដំណាក់កាលអភិវឌ្ឍន៍ថ្មីរបស់ប្រទេសជាតិ។ រដ្ឋសភានឹងបន្តធ្វើការច្នៃប្រឌិតយ៉ាងទូលំទូលាយ ពង្រឹងសមត្ថភាពនីតិបញ្ញត្តិ ត្រួតពិនិត្យ និងសម្រេចលើបញ្ហាសំខាន់ៗរបស់ប្រទេសជាតិ”។

សម័យប្រជុំលើកទី៩ នៃរដ្ឋសភានីតិកាលទី១៥ ចែកចេញជា ២ ដំណាក់កាល ពោលគឺដំណាក់កាលទី១ ចាប់ពីថ្ងៃទី៥ ដល់ថ្ងៃទី២៩ ខែឧសភា និងដំណាក់កាលទី២ ចាប់ពីថ្ងៃទី១១ ដល់ថ្ងៃទី២៧ ខែមិថុនា ឆ្នាំ២០២៥៕