នេះជាការអះអាងរបស់លេខាគណៈកម្មាធិការបក្សទីក្រុងហូជីមិញ លោក Nguyen Van Nen ក្នុងជំនួបជាមួយអគ្គលេខាបក្សប្រជាជនម៉ុងហ្គោលី Yangug Sodbaatar នារសៀលថ្ងៃទី ៤ កក្កដា ក្នុងក្របខ័ណ្ឌនៃដំណើរទស្សនកិច្ច និងធ្វើការនៅប្រទេសម៉ុងហ្គោលី។
នៅទីនេះ ភាគីទាំងពីរបានឯកភាពពង្រឹងទំនាក់ទំនងតាមរយៈបណ្តាញបក្ស រដ្ឋ និងប្រជាជន រួមទាំងរក្សាសកម្មភាពផ្លាស់ប្តូរគណៈប្រតិភូជាន់ខ្ពស់គ្រប់ជាន់ថ្នាក់ និងសម្របសម្រួលយ៉ាងល្អដើម្បីអនុវត្តសកម្មភាពរំលឹកខួបលើកទី ៧០ នៃការបង្កើតទំនាក់ទំនងការទូតរវាងវៀតណាម និងម៉ុងហ្គោលី ២០២៤; ពង្រឹងទំនាក់ទំនងបណ្តាញបក្ស លើកកម្ពស់តួនាទីតម្រង់ទិសយុទ្ធសាស្ត្ររបស់បក្សកាន់អំណាចទាំងពីរ ក្នុងទំនាក់ទំនងរួមរវាងប្រទេសទាំងពីរ។ ទន្ទឹមនឹងនោះ សម្របសម្រួលជំរុញកិច្ចសហប្រតិបត្តិការជាក់ស្តែង និងប្រកបដោយប្រសិទ្ធភាពក្នុងវិស័យសេដ្ឋកិច្ច ពាណិជ្ជកម្ម និងវិនិយោគ ស្របតាមសក្ដានុពល និងប្រៀបខ្លាំងរបស់ប្រទេសនីមួយៗ; ជំរុញការជួបប្រាស្រ័យរវាងប្រជាជននិងប្រជាជន និងកិច្ចសហប្រតិបត្តិការរវាងមូលដ្ឋាន ដើម្បីបង្កើនការយល់ដឹង និងចំណងមិត្តភាព បង្កើតមូលដ្ឋានគ្រឹះសង្គមរឹងមាំសម្រាប់ការអភិវឌ្ឍទំនាក់ទំនងវៀតណាម - ម៉ុងហ្គោលី។
ក្នុងដំណើរទស្សនកិច្ចនេះ លេខាបក្សទីក្រុង លោក Nguyen Van Nen និងគណៈប្រតិភូបានជួបប្រជុំ និងធ្វើការជាមួយអភិបាលនៃរដ្ឋធានី Ulaanbaatar; បានទៅទស្សនាសាលារៀនមួយកន្លែងដាក់ឈ្មោះតាមលោកប្រធានហូជីមិញនៅរដ្ឋធានី Ulaanbaatar; ទស្សនា និងធ្វើការជាមួយស្ថានទូត និងសហគមន៍វៀតណាមនៅម៉ុងហ្គោលីផងដែរ៕
