កាលពីថ្ងៃទី១៥ ខែមិថុនា ឆ្នាំ២០២៣ នៅទីស្នាក់ការអង្គការសហប្រជាជាតិ នៅទីក្រុងញូវយ៉ក (សហរដ្ឋអាមេរិក) មហាសន្និបាតអង្គការសហប្រជាជាតិបានបើកកិច្ចពិភាក្សាជាន់ខ្ពស់ក្រោមប្រធានបទ “សិទ្ធិទទួលបានយុត្តិធម៌សមភាពសម្រាប់មនុស្សគ្រប់រូប៖ ជំរុញកំណែទម្រង់ដើម្បីសង្គមប្រកបដោយសន្តិភាព សមភាព និងបរិយាប័ន្ន” ក្រោមការដឹកនាំដោយអនុប្រធានមហាសន្និបាតអង្គការសហប្រជាជាតិនីតិកាលទី ៧៧ លោកឯកអគ្គរដ្ឋទូត Dang Hoang Giang ប្រធានស្ថានបេសកកម្មតំណាងអចិន្ត្រៃយ៍វៀតណាមប្រចាំនៅអង្គការសហប្រជាជាតិ។
អញ្ជើញថ្លែងមតិក្នុងកិច្ចប្រជុំ លោកស្រីទីប្រឹក្សា Le Thi Minh Thoa អនុប្រធានស្ថានបេសកកម្មតំណាងអចិន្ត្រៃយ៍វៀតណាមប្រចាំនៅអង្គការសហប្រជាជាតិបានសង្កត់ធ្ងន់ថា ការទទួលបានយុត្តិធម៌សមភាពបានរួមវិភាគទានដ៏សំខាន់ក្នុងការធានាយុត្តិធម៌ សមភាពប្រកបដោយប្រសិទ្ធភាព និងទូលំទូលាយ រួមចំណែកដល់ការសម្រេចបានគោលដៅបរិយាប័ន្ននៃរបៀបវារៈឆ្នាំ ២០៣០ ស្ដីពីការអភិវឌ្ឍប្រកបដោយចីរភាព ដោយមិនបំភ្លេចចោលនរណាម្នាក់នៅពីក្រោយ។ តំណាងវៀតណាមបានអះអាងថា វៀតណាមមានវឌ្ឍនភាពយ៉ាងធំធេងក្នុងការពង្រឹងក្របខ័ណ្ឌច្បាប់ ដោយធានាថាមនុស្សគ្រប់រូបមានសមភាពនៅចំពោះមុខច្បាប់ និងស្របតាមស្តង់ដារអន្តរជាតិស្តីពីសិទ្ធិមនុស្ស។ អនុប្រធានស្ថានបេសកកម្មតំណាងអចិន្ត្រៃយ៍វៀតណាមប្រចាំនៅអង្គការសហប្រជាជាតិក៏បានសង្កត់ធ្ងន់លើការបង្កើនកិច្ចសហប្រតិបត្តិការអន្តរជាតិ និងចែករំលែកបទពិសោធន៍ ចំណេះដឹង និងប្រភពធនធាន ដើម្បីជំរុញបរិយាកាសសកលសម្រាប់មនុស្សគ្រប់រូបអាចទទួលបានយុត្តិធម៌ផងដែរ៕
