លោកនាយករដ្ឋមន្ត្រីមានបំណងរួមជាមួយកូរ៉េខាងត្បូង ធ្វើឲ្យកាន់តែស៊ីជម្រៅនូវទំនាក់ទំនង “ភាពជាដៃគូយុទ្ធសាស្ត្រលើគ្រប់ជ្រុងជ្រោយ” រវាងប្រទេសទាំងពីរ ស្នើភាគីទាំងពីរពង្រឹងការផ្លាស់ប្តូរគណៈប្រតិភូគ្រប់ជាន់ថ្នាក់ និងគ្រប់លំដាប់ថ្នាក់ ពង្រឹងកិច្ចសហប្រតិបត្តិការលើវិស័យសន្តិសុខ និងការពារជាតិ ជាពិសេស ឧស្សាហកម្មការពារជាតិ។
ដោយសង្កត់ធ្ងន់ថា កិច្ចសហប្រតិបត្តិការសេដ្ឋកិច្ចគឺជាសសរស្តម្ភសំខាន់នៃកិច្ចសហប្រតិបត្តិការ លោកនាយករដ្ឋមន្ត្រី Pham Minh Chinh បានស្នើភាគីទាំងពីរសម្របសម្រួលអនុវត្តប្រកបដោយប្រសិទ្ធភាពនូវកិច្ចព្រមព្រៀងពាណិជ្ជកម្មសេរីទ្វេភាគី និងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP); ខិតខំបង្កើនទំហំពាណិជ្ជកម្មទ្វេភាគីឡើងដល់ ១០០ ពាន់លានដុល្លារក្នុងឆ្នាំនេះ ក្នុងទិសដៅតុល្យភាព និរន្តរភាព និងបង្កើតលក្ខខណ្ឌអំណោយផលសម្រាប់កសិកម្ម ជលផល និងផ្លែឈើវៀតណាមចូលក្នុងទីផ្សារកូរ៉េខាងត្បូង។
លោកនាយករដ្ឋមន្ត្រីបានសង្កត់ធ្ងន់ថា វៀតណាមស្វាគមន៍ និងបង្កើតលក្ខខណ្ឌអំណោយផលសម្រាប់សហគ្រាសកូរ៉េខាងត្បូង ពង្រីកការវិនិយោគនៅវៀតណាម; ទន្ទឹមនឹងនោះ លោកស្នើឲ្យសហគ្រាសកូរ៉េខាងត្បូង បង្កើនសមាមាត្រនៃតម្លៃមូលដ្ឋាននីយកម្មលើផលិតផលដែលផលិតនៅវៀតណាម បង្កើតលក្ខខណ្ឌសម្រាប់សហគ្រាសវៀតណាមចូលរួមក្នុងខ្សែសង្វាក់ផលិតកម្ម និងផ្គត់ផ្គង់សកល។
រីឯខ្លួនវិញ ប្រធានរដ្ឋសភាកូរ៉េខាងត្បូងបានអះអាងថា វៀតណាមជាដៃគូសំខាន់របស់កូរ៉េខាងត្បូងនៅអាស៊ីអាគ្នេយ៍; ថ្លែងអំណរគុណចំពោះរដ្ឋាភិបាលវៀតណាមដែលតែងតែយកចិត្តទុកដាក់បង្កើតលក្ខខណ្ឌអំណោយផល ក៏ដូចជាតែងតែយកចិត្តទុកដាក់ក្នុងការដោះស្រាយរាល់ការលំបាក និងឧបសគ្គសម្រាប់ប្រតិបត្តិការរបស់សហគ្រាសកូរ៉េខាងត្បូងនៅវៀតណាម។ លោក Kim Jin Pyo មានបំណងចង់ពង្រឹងបន្ថែមទៀតនូវកិច្ចសហប្រតិបត្តិការរវាងរដ្ឋសភា និងរដ្ឋាភិបាលនៃប្រទេសទាំងពីរ ដើម្បីលើកកម្ពស់ទំនាក់ទំនង "ភាពជាដៃគូយុទ្ធសាស្ត្រគ្រប់ជ្រុងជ្រោយ"៕
