លោកប្រធានរដ្ឋ Vo Van Thuong បានស្វាគមន៍យ៉ាងកក់ក្តៅចំពោះលោក Ferdinand Romualdez Marcos Jr. សម្រាប់ដំណើរទស្សនកិច្ចផ្លូវរដ្ឋជាលើកដំបូងទៅកាន់ប្រទេសវៀតណាមក្នុងនាមជាប្រធានាធិបតីហ្វីលីពីន ហើយសង្កត់ធ្ងន់ថា ដំណើរទស្សនកិច្ចដ៏មានអត្ថន័យសំខាន់ រួមចំណែកបង្កើតកម្លាំងចលករថ្មីដើម្បីអភិវឌ្ឍទំនាក់ទំនងភាពជាដៃគូយុទ្ធសាស្ត្រវៀតណាម - ហ្វីលីពីន ជាពិសេសក្នុងបរិបទដែលប្រទេសទាំងពីរប្រារព្ធខួបលើកទី ១០ នៃការបង្កើតទំនាក់ទំនងភាពជាដៃគូយុទ្ធសាស្ត្រនៅឆ្នាំ ២០២៥ និង ៥០ ឆ្នាំនៃការបង្កើតទំនាក់ទំនងការទូតនៅឆ្នាំ ២០២៦។
លោកប្រធានាធិបតី Ferdinand Romualdez Marcos Jr. បានអះអាងថា វៀតណាមបន្តជាដៃគូយុទ្ធសាស្ត្រតែមួយគត់របស់ហ្វីលីពីនក្នុងអាស៊ាន ព្រមទាំងមានបំណងចង់ធ្វើឱ្យកិច្ចសហប្រតិបត្តិការរវាងប្រទេសទាំងពីរកាន់តែមានប្រសិទ្ធភាព។
លោក Vo Van Thuong ប្រធានរដ្ឋវៀតណាមជួបពិភាក្សាការងារជាមួយលោក Ferdinand Romualdez Marcos Jr. ប្រធានាធិបតីហ្វីលីពីន។ រូបថត៖ VNA
ថ្នាក់ដឹកនាំទាំងពីរបានវាយតម្លៃខ្ពស់ចំពោះការអភិវឌ្ឍន៍នៃទំនាក់ទំនងទ្វេភាគីនាពេលកន្លងមក ជាពិសេសបន្ទាប់ពីដំឡើងទំនាក់ទំនងទៅជាភាពជាដៃគូយុទ្ធសាស្ត្រក្នុងឆ្នាំ២០១៥។ ទំនាក់ទំនងនយោបាយ និងការទូតត្រូវបានពង្រឹងកាន់តែខ្លាំងឡើងតាមរយៈការរក្សាការផ្លាស់ប្តូរគណៈប្រតិភូជាន់ខ្ពស់និងគ្រប់លំដាប់ថ្នាក់ យន្តការសហប្រតិបត្តិការទ្វេភាគីត្រូវបានដាក់ពង្រាយប្រកបដោយប្រសិទ្ធភាព។
ភាគីទាំងពីរក៏បានឯកភាពពង្រឹងកិច្ចសហប្រតិបត្តិការសេដ្ឋកិច្ច ខិតខំបង្កើនទំហំពាណិជ្ជកម្មទ្វេភាគីឲ្យឡើងដល់ ១០ ពាន់លានដុល្លារ នាពេលឆាប់ៗ បង្កើតលក្ខណៈងាយស្រួលសម្រាប់ការនាំចេញ និងនាំចូលទំនិញដែលភាគីទាំងពីរមានសក្ដានុពលនិងប្រៀបខ្លាំងដូចជា ជលផល ផ្លែឈើ បន្លែជាដើម...។ ឆ្លៀតឱកាសពីកិច្ចព្រមព្រៀងពាណិជ្ជកម្មក្នុងតំបន់ លើកទឹកចិត្តឱ្យធុរកិច្ចនៃប្រទេសទាំងពីរវិនិយោគលើវិស័យសំខាន់ៗដូចជា បច្ចេកវិទ្យាកែច្នៃ កសិកម្មបច្ចេកវិទ្យាខ្ពស់ ហេដ្ឋារចនាសម្ព័ន្ធ ប្រេង និងឧស្ម័ន...; ទន្ទឹមនឹងនោះ ពង្រីកកិច្ចសហប្រតិបត្តិការលើវិស័យថ្មី និងសំខាន់ៗដូចជា សេដ្ឋកិច្ចឌីជីថល សេដ្ឋកិច្ចបៃតង ការធ្វើបរិវត្តកម្មឌីជីថល សេដ្ឋកិច្ចវិលជុំ ថាមពលកកើតឡើងវិញ និងការពង្រឹងភាពធន់នៃខ្សែសង្វាក់ផ្គត់ផ្គង់...
ថ្នាក់ដឹកនាំទាំងពីរបានឯកភាពជំរុញកិច្ចសហប្រតិបត្តិការលើវិស័យការពារជាតិនិងសន្តិសុខ ព្រមទាំងសង្កត់ធ្ងន់លើសារសំខាន់នៃកិច្ចសហប្រតិបត្តិការសមុទ្រនិងមហាសមុទ្រ។ ភាគីទាំងពីរឯកភាពសហការក្នុងការលើកកម្ពស់សមត្ថភាពទប់ស្កាត់ និងប្រយុទ្ធប្រឆាំងឧក្រិដ្ឋកម្មឆ្លងដែន និងឧក្រិដ្ឋកម្មដោយប្រើបច្ចេកវិទ្យាខ្ពស់។ ថ្នាក់ដឹកនាំទាំងពីរក៏បានឯកភាពពង្រីកកិច្ចសហប្រតិបត្តិការលើវិស័យសំខាន់ៗផ្សេងទៀត ដូចជាការអប់រំ វប្បធម៌ និងទេសចរណ៍ រួមទាំងការបើកជើងហោះហើរត្រង់បន្ថែមទៀតរវាងប្រទេសទាំងពីរ។
អំពីបញ្ហាសមុទ្រខាងកើត ភាគីទាំងពីរបានប្តេជ្ញារក្សានិងជំរុញសន្តិភាព ស្ថិរភាព សន្តិសុខ សុវត្ថិភាព និងសេរីភាពនាវាចរណ៍និងអាកាសចរណ៍។ ភាគីទាំងពីរអំពាវនាវឱ្យគ្រប់ភាគីអត់ធ្មត់ មិនគំរាមកំហែង ឬ ប្រើប្រាស់កម្លាំងយោធា និងគោរពយ៉ាងពេញលេញនូវដំណើរការការទូតនិងផ្លូវច្បាប់, ដោះស្រាយវិវាទដោយសន្តិវិធី ដោយឈរលើគោលការណ៍ជាមូលដ្ឋាននៃច្បាប់អន្តរជាតិ រួមទាំងអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ឆ្នាំ ១៩៨២ ។
នៅចុងបញ្ចប់ លោកប្រធានរដ្ឋ Vo Van Thuong និងលោកប្រធានាធិបតី Ferdinand Romualdez Marcos Jr. បានធ្វើជាសាក្សីក្នុងការផ្លាស់ប្តូរឯកសារសហប្រតិបត្តិការរវាងប្រទេសទាំងពីរ។ ក្នុងឱកាសនេះ ភាគីទាំងពីរបានចេញសេចក្តីថ្លែងការណ៍រួម៕
