ព័ត៌មាន
រដ្ឋសភាវៀតណាមអនុម័តលើការកាត់បន្ថយរយៈពេល៣ខែនៃអាណត្តិទី១៥ ដោយកំណត់កាលបរិច្ឆេទបោះឆ្នោតនៅថ្ងៃទី១៥ ខែមីនា ឆ្នាំ២០២៦
នាព្រឹកថ្ងៃទី២១ ខែឧសភា ក្នុងសម័យប្រជុំលើកទី៩ សមាជិករដ្ឋសភានីតិកាលទី ១៥ បានបោះឆ្នោតអនុម័តលើសេចក្តីសម្រេចចិត្តស្តីពីការកាត់បន្ថយរយៈពេល អាណត្តិរដ្ឋសភានីតិកាលទី ១៥ និងក្រុមប្រឹក្សាប្រជាជនគ្រប់ជាន់ថ្នាក់អាណត្តិ ២០២១-២០២៦; ថ្ងៃបោះឆ្នោតជ្រើសតាំងសមាជិករដ្ឋសភានីតិកាលទី១៦ និងក្រុមប្រឹក្សាប្រជាជនគ្រប់ជាន់ថ្នាក់ សម្រាប់អាណត្តិ ២០២៦-២០៣១។ សេចក្ដីសម្រេចចិត្ត ទទួលការគាំទ្រពីសមាជិករដ្ឋសភាដែលមានវត្តមានចំនួន ៤៤៩/៤៤៩។
តាមនោះ រដ្ឋសភាបានសម្រេចថា ថ្ងៃបោះឆ្នោតជ្រើសតាំងសមាជិករដ្ឋសភា នីតិកាលទី១៦ និងក្រុមប្រឹក្សាប្រជាជនគ្រប់ជាន់ថ្នាក់ សម្រាប់អាណត្តិឆ្នាំ២០២៦-២០៣១ គឺថ្ងៃអាទិត្យ ទី១៥ ខែមីនា ឆ្នាំ២០២៦។
ទន្ទឹមនឹងនេះ រដ្ឋសភានីតិកាលទី១៥ និងក្រុមប្រឹក្សាប្រជាជនគ្រប់ជាន់ថ្នាក់ អាណត្តិឆ្នាំ ២០២១-២០២៦ នឹងត្រូវបានកាត់បន្ថយ ៣ ខែ ពោលគឺបញ្ចប់នៅដើមខែ មេសា ឆ្នាំ ២០២៦ (ជំនួសឱ្យខែកក្កដា ឆ្នាំ ២០២៦)។
អនុប្រធានរដ្ឋសភាវៀតណាម លោកស្រី Nguyen Thi Thanh បានឲ្យដឹងថា ការកាត់បន្ថយពេលវេលាគឺចាំបាច់ដើម្បីបង្រួញគម្លាតរវាងមហាសន្និបាតបក្សទូទាំងប្រទេសលើកទី ១៤ (ដើមឆ្នាំ ២០២៦) និងសម័យប្រជុំដំបូងនៃរដ្ឋសភា និងក្រុមប្រឹក្សា ប្រជាជននៃអាណត្តិថ្មី។ គោលដៅគឺធានាបាននូវការធ្វើសមកាលកម្ម ការតភ្ជាប់ ស្ថិរភាព និងភាពស៊ីសង្វាក់គ្នាក្នុងការចាត់តាំងភារកិច្ចដល់សមាជិកអាណត្តិថ្មី នៅក្នុង ស្ថាប័នរបស់បក្ស រដ្ឋ រដ្ឋាភិបាល រណសិរ្សមាតុភូមិ និងអង្គការនយោបាយសង្គម៕
