មជ្ឈមណ្ឌលព័ត៌មាន SEA Games ៣២ មានទីតាំងនៅជាន់ទី ១ នៃពហុកីឡដ្ឋានមរតកតេជោ ស្ថិតក្នុងតំបន់ពហុកីឡាដ្ឋានជាតិ ដែលបានសាងសង់នៅលើផ្ទៃដីជាង ៨០ ហិកតា នៅជាយក្រុងភ្នំពេញ កម្ពុជា។ ក្រៅពីមជ្ឈមណ្ឌលព័ត៌មានបានដាក់ឲ្យដំណើរការនោះ ប្រទេសម្ចាស់ផ្ទះកម្ពុជាក៏បានបង្កើតមជ្ឈមណ្ឌលព័ត៌មានមួយទៀតនៅមជ្ឈមណ្ឌលតាំងពិព័រណ៍ ជ្រោយចង្វា ដែលជាទីតាំងប្រកួតដែលមានចំនួនវិញ្ញាសា និងខ្លឹមសារប្រកួតច្រើនជាងគេនៅស៊ីហ្គេម៣២នេះ; ទន្ទឹមនឹងនេះ បានរៀបចំសេវាកម្មអ៊ីនធឺណែត ដោយផ្តល់ wifi សាធារណៈដោយឥតគិតថ្លៃនៅគ្រប់ទីកន្លែងនៃការប្រកួត។

អគ្គនាយកដ្ឋានព័ត៌មាន និងសោតទស្សន៍ (ក្រសួងព័ត៌មានកម្ពុជា) បានឲ្យដឹងថា គិតត្រឹមថ្ងៃទី ២៨ ខែមេសា មានអ្នកយកព័ត៌មានជាង ២០០០ នាក់ចំណុះសមាគមប្រជាជាតិអាស៊ីអាគ្នេយ៍ (អាស៊ាន) និងទីម័រឡេស្ទើ បានចុះឈ្មោះប្រតិបត្តិការនៅ SEA Games ៣២ និងអាស៊ានប៉ារ៉ាហ្គេមលើកទី ១២។

នៅ SEA Games ៣២ មានប្រភេទកីឡាចំនួន ៣៧ ជាមួយវិញ្ញាសារចំនួន ៥៨៦ ប្រភេទ។ គណៈចាត់តាំងបានរៀបចំមេដាយគ្រប់ប្រភេទចំនួន ៥.១៥១គ្រឿង ដើម្បីប្រគល់ជូនកីឡាករដែលទទួលបានស្នាដៃខ្ពស់ក្នុងវិញ្ញាសារកីឡានីមួយៗ។ ជាមួយនឹងពាក្យស្លោក “កីឡារស់ក្នុងសន្តិភាព” SEA Games ៣២គ្រោងនឹងប្រព្រឹត្តទៅចាប់ពីថ្ងៃទី ៥-១៧ ខែឧសភា នៅរាជធានីភ្នំពេញ និងខេត្ត ក្រុងចំនួន ៤ផ្សេងទៀតរបស់កម្ពុជា រួមមាន សៀមរាប ព្រះសីហនុ កំពត និងកែប៕