នាព្រឹកថ្ងៃទី៣១ ខែតុលា ឆ្នាំ២០២១ (ម៉ោងក្នុងតំបន់) យន្តហោះពិសេសដឹកលោកនាយករដ្ឋមន្ត្រី Pham Minh Chinh និងគណៈប្រតិភូជាន់ខ្ពស់វៀតណាមបានចុះចតនៅអាកាសយានដ្ឋាន Prestwick ប្រទេសស្កុតឡែន ដោយចាប់ផ្តើម បំពេញដំណើរទស្សនកិច្ចចូរួមសន្និសីទ COP26 និងបំពេញទស្សនកិច្ចការងារនៅចក្រភពអង់គ្លេសតបតាមការអញ្ជើញរបស់នាយករដ្ឋមន្ត្រីអង់គ្លេស Boris Johnson ។
 

លោកនាយករដ្ឋមន្ត្រី Pham Minh Chinh (ស្ដាំ) (រូបថត៖ TTXVN)

តាមផែនការ ក្នុងកម្មវិធីការងារចាប់ពីថ្ងៃទី ៣១ ខែតុលា ដល់ថ្ងៃទី ៣ ខែវិច្ឆិកា លោកនាយករដ្ឋមន្ត្រី Pham Minh Chinh នឹងចូលរួម និងថ្លែងសុន្ទរកថានៅ សន្និសីទCOP26; មានជំនួបទ្វេភាគីជាមួយថ្នាក់ដឹកនាំប្រទេស អង្គការអន្តរជាតិ មូលនិធិអន្តរជាតិ និងចូលរួមក្នុងព្រឹត្តិការណ៍ ប្រកាសគំនិតផ្តួចផ្តើមរបស់ដៃគូសំខាន់ៗមួយចំនួននៅខាងក្រៅ COP26។

ការចូលរួមសន្និសីទ COP26 នៅកម្រិតខ្ពស់បានបង្ហាញយ៉ាងច្បាស់លាល់នូវសារអំពីប្រទេសវៀតណាមមានការទទួលខុសត្រូវ សកម្ម រួមដៃជាមួយសហគមន៍អន្តរជាតិ ដើម្បីដោះស្រាយបញ្ហាប្រឈមសកលនៃការប្រែប្រួលអាកាសធាតុ; ការប្តេជ្ញាចិត្ត និងការខិតខំប្រឹងប្រែង ព្រមទាំងការលំបាក និងបញ្ហាប្រឈមនាពេលបច្ចុប្បន្នរបស់វៀតណាមក្នុងការឆ្លើយតបទៅនឹងការប្រែប្រួលអាកាសធាតុ។ វៀតណាមរួមចំណែកយ៉ាងសកម្ម និងមានការទទួលខុសត្រូវចំពោះយន្តការរបស់ភាគីនានានៃអនុសញ្ញាក្របខ័ណ្ឌអង្គការសហប្រជាជាតិស្តីពីការប្រែប្រួលអាកាសធាតុ (UNFCCC)។

ក្នុងក្របខ័ណ្ឌនៃដំណើរទស្សនកិច្ចការងារនៅចក្រភពអង់គ្លេស លោកនាយករដ្ឋមន្ត្រី Pham Minh Chinh នឹងមានជំនួបជាមួយថ្នាក់ដឹកនាំអង់គ្លេស; ធ្វើការជាមួយសហគ្រាសនានា; ធ្វើជាសាក្សីក្នុងពិធីចុះហត្ថលេខាលើកិច្ចសន្យាពាណិជ្ជកម្មមួយចំនួន; ជួបជាមួយតំណាងសហគមន៍ជនវៀតណាមនៅអង់គ្លេស។

ការដែលលោកនាយករដ្ឋមន្ត្រីបានដឹកនាំគណៈប្រតិភូជាន់ខ្ពស់វៀតណាម អញ្ជើញបំពេញទស្សនកិច្ចការងារនៅចក្រភពអង់គ្លេសនឹងរួមចំណែកពង្រឹងជំនឿទុកចិត្តផ្នែកនយោបាយ ធ្វើឲ្យស៊ីជម្រៅថែមទៀតនូវកិច្ចសហប្រតិបត្តិការពហុភាគី នាំទំនាក់ទំនងទ្វេភាគីឱ្យកាន់តែមានប្រសិទ្ធភាពជាក់ស្ដែងថែមទៀត៕

តាម VOV5 - វិទ្យុសំឡេងវៀតណាម