នាយករដ្ឋមន្ត្រីថៃ លោកស្រី Paetongtarn Shinawatra ចុះត្រួតពិនិត្យតំបន់ Chongbok ខេត្ត Ubon Ratchathani។ រូបភាព៖ ខុទ្ទកាល័យនាយករដ្ឋមន្ត្រីថៃ

ក្នុងដំណើរត្រួតពិនិត្យ នាយករដ្ឋមន្ត្រីថៃ លោកស្រី Paetongtarn Shinawatra និងរដ្ឋមន្ត្រីក្រសួងការពារជាតិ លោក Phumtham Wechayachai បានទទួលស្គាល់ និងកោតសរសើរចំពោះកិច្ចខិតខំប្រឹងប្រែងរបស់លោកឧត្តមសេនីយ៍ទោ Boonsin Padklang មេបញ្ជាការយោធភូមិភាគទី ២ រួមជាមួយទាហាន និងកងកម្លាំងសន្តិសុខស្ម័គ្រចិត្តនៅមូលដ្ឋាន ក្នុងការធានាសន្តិសុខតាមព្រំដែន។

នៅមូលដ្ឋានប្រតិបត្តិការណ៍ Morakot លោកស្រីនាយករដ្ឋមន្ត្រី Paetongtarn បានជួបសំណេះសំណាល​ជាមួយកងកម្លាំងពិសេស Suranaree លើកទឹកចិត្តស្មារតីទាហាន ហើយបានបញ្ជាក់ពីការសន្យារបស់រដ្ឋាភិបាលក្នុងការជួយគាំទ្រដោយអស់ពីសមត្ថភាពចំពោះកងកម្លាំងប្រដាប់អាវុធ ដោយសង្កត់ធ្ងន់ថា កងទ័ពគឺជាខែលរបស់ប្រទេសជាតិ ហើយត្រូវតែធានាថា ខែលនេះមានភាពរឹងមាំទាំងផ្លូវកាយនិងផ្លូវចិត្ត។

ដំណើរទស្សនកិច្ចនេះធ្វើឡើងក្នុងបរិបទនៃការលេចធ្លាយ នៃការថតសម្លេងការសន្ទនារវាងលោកស្រីនាយករដ្ឋមន្ត្រី Paetongtarn Shinawatra និងប្រធានព្រឹទ្ធសភាកម្ពុជា លោក ហ៊ុន សែន ដោយបានលើកឡើងពីតួនាទីរបស់លោកឧត្តមសេនីយ៍ទោ Boonsin Padklang ក្នុងការដោះស្រាយបញ្ហាព្រំដែនរវាងប្រទេសទាំងពីរ។ មេបញ្ជាការយោធភូមិភាគទី ២ រូបនេះ ក៏បានអះអាងពីការសម្របសម្រួលយ៉ាងជិតស្និទ្ធជាមួយស្ថាប័នពាក់ព័ន្ធ ដោយសង្កត់ធ្ងន់លើជំហរដ៏ខ្ជាប់ខ្ជួនក្នុងការការពារផលប្រយោជន៍ជាតិ ក៏ដូចជាសារៈសំខាន់នៃការកាត់បន្ថយភាពតានតឹងនៅតាមព្រំដែនផងដែរ៕