ថ្លែងសុន្ទរកថានៅទីនេះ ប្រធានរដ្ឋសភាវៀតណាម លោក ត្រិន ថាញ់មិន បានឲ្យដឹងថា៖ វៀតណាមនិងអាមេនីសុទ្ធតែ មានសេដ្ឋកិច្ចបើកចំហ ក្នុងនោះការនាំចេញដើរតួនាទីសំខាន់ ហើយមានសមត្ថភាពសម្របខ្លួនទៅនឹងគោលការណ៍ពាណិជ្ជកម្មអន្តរជាតិ។ លោកប្រធានរដ្ឋសភាបានស្នើទិសដៅជាក់លាក់មួយចំនួនដែលសហគ្រាសនៃប្រទេសទាំងពីរអាចពិចារណា នោះគឺបច្ចេកវិទ្យាព័ត៌មាន និងការផ្លាស់ប្តូរឌីជីថល។
លោកប្រធានរដ្ឋសភា ក៏មានបំណងថា សហគ្រាសនៃភាគីទាំងពីរនឹងរួមគ្នាស្រាវជ្រាវ និងវិនិយោគលើ គម្រោងថាមពលពន្លឺព្រះអាទិត្យ វាយោអគ្គីសនី និងវារីអគ្គិសនីខ្នាតតូច ដោយឆ្លៀតយកបច្ចេកវិទ្យាទំនើបរបស់ប្រទេសអាមេនី និងធនធានដ៏សម្បូរបែបរបស់វៀតណាម។ លោកប្រធានរដ្ឋសភា ត្រិន ថាញ់មិន មានប្រសាសន៍ថា៖
"ខ្ញុំស្នើឲ្យបណ្ដាក្រសួង ផ្នែក និងសមាគមលើកកម្ពស់តួនាទីជាស្ពានដើម្បីជំរុញការផ្លាស់ប្តូរ និងកិច្ចសហប្រតិបត្តិការ ស្របតាមគោលការណ៍នៃ "ផលប្រយោជន៍និងភាពជោគជ័យទៅវិញទៅមក" ដោយឈរលើមូលដ្ឋាននៃការគាំទ្រទៅវិញទៅមក ជួយសហគ្រាសឱ្យសហការយ៉ាងស៊ីជម្រៅ និងគ្រប់ជ្រុងជ្រោយ បង្កើនសមត្ថភាពប្រកួតប្រជែង រួមគ្នាធ្វើអាជីវកម្មទីផ្សាររបស់គ្នានិងក្នុងតំបន់ ព្រមទាំងចូលរួមយ៉ាងស៊ីជម្រៅក្នុងខ្សែសង្វាក់តម្លៃនិងផលិតកម្មក្នុងតំបន់ និងសកលលោកផងដែរ”។
លោកប្រធានរដ្ឋសភាបានអះអាងថា រដ្ឋសភា និងរដ្ឋាភិបាលវៀតណាមសន្យារួមដំណើរជានិច្ចនិងបង្កើតគ្រប់លក្ខខណ្ឌអំណោយផលតាមបទបញ្ញត្តិច្បាប់សម្រាប់សហគ្រាសអាមេនី ធ្វើអាជីវកម្មវិនិយោគប្រកបដោយជោគជ័យ និរន្តរភាព និងយូរអង្វែងនៅវៀតណាម៕
