នៅចំពោះមុខសារព័ត៌មាននៅសេតវិមាន ប្រធានាធិបតីអាមេរិកលោក Donald Trump បានប្រកាសតារាងទិន្នន័យជាមួយដៃគូសេដ្ឋកិច្ចសំខាន់នីមួយៗដែលគណនាដោយសហរដ្ឋអាមេរិក; ក្នុងនោះ បានបញ្ជាក់ពីអត្រាពន្ធដែលរដ្ឋបាលអាមេរិកជឿជាក់ថា ដៃគូសេដ្ឋកិច្ចទាំងនេះបានដាក់ពន្ធដោយ "មិនយុត្តិធម៌" លើទំនិញរបស់អាមេរិក ហើយអត្រាពន្ធទៅមកដែលរដ្ឋបាលអាមេរិកនឹងអនុវត្តជាការឆ្លើយតប។
ដោយផ្អែកលើការគណនា ប្រធានាធិបតីអាមេរិកបានប្រកាសថា នឹងដាក់ពន្ធមូលដ្ឋានចំនួន ១០% លើទំនិញនាំចូលសហរដ្ឋអាមេរិក ជាមួយនឹងអត្រាពន្ធទៅមកសម្រាប់ដៃគូនីមួយៗ។ អត្រាពន្ធ ១០% នឹងចូលជាធរមានចាប់ពីថ្ងៃទី ៥ ខែមេសា ខណៈដែលពន្ធទៅវិញទៅមកនឹងចូលជាធរមានចាប់ពីថ្ងៃទី ៩ ខែមេសា។ ដូច្នេះ អត្រាពន្ធថ្មីរបស់អាមេរិកអនុវត្តន៍ចំពោះដៃគូសេដ្ឋកិច្ចសំខាន់ៗគឺ៖ សហភាពអឺរ៉ុប (EU) ២០%; ចិន ៣៤%; ជប៉ុន ២៤%;ប្រេស៊ីល ២៦%; កូរ៉េខាងត្បូង ២៥%; ថៃ ៣៦%។ ដៃគូផ្សេងទៀតដូចជា៖ តៃវ៉ាន់ (ចិន) ស្វីស ឥណ្ឌូនេស៊ី ម៉ាឡេស៊ី... ក៏ត្រូវបានដាក់ពន្ធចាប់ពី ២៤ ទៅ ៣១% ផងដែរ។ ដោយឡែកប្រទេសម៉ិកស៊ិកនិងកាណាដា មិនត្រូវបានដំឡើងពន្ធលើកនេះទេ ដោយសារប្រទេសទាំងពីរនេះ ធ្លាប់ត្រូវបានដំឡើងពន្ធពីមុនមកហើយ។ ក្រៅពីពន្ធទៅមក ប្រធានាធិបតីអាមេរិកក៏បានចុះហត្ថលេខាជាផ្លូវការលើក្រឹត្យប្រតិបត្តិដាក់ពន្ធ ២៥% លើរថយន្តទាំងអស់ដែលនាំចូលសហរដ្ឋអាមេរិក ដោយអនុវត្តន៍សេចក្តីប្រកាសរបស់លោកកាលពីប៉ុន្មានសប្តាហ៍មុន។
ដៃគូសេដ្ឋកិច្ចសំខាន់ៗរបស់អាមេរិកក៏ធ្វើប្រតិកម្មភ្លាមមួយរំពិចផងដែរ។ សហភាពអឺរ៉ុបបានប្រកាសថា ខ្លួននឹងចាត់វិធានការសងសឹកនៅព្រឹកថ្ងៃទី ៣ ខែមេសា ។ អូស្ត្រាលី ស៊ុយអែត ន័រវែស ស្វីស... ក៏បានរិះគន់អត្រាពន្ធថ្មីរបស់សហរដ្ឋអាមេរិក ហើយបាននិយាយថា នឹងពិចារណាលើការឆ្លើយតបសមស្របផងដែរ៕
