នៅក្នុងកិច្ចពិភាក្សា នាយឧត្តមសេនីយ៍ ផាន់ វ៉ាន់យ៉ាង បានបញ្ជាក់ថា ដំណើរទស្សនកិច្ចរបស់លោកអគ្គលេខាបក្ស ប្រធានរដ្ឋ តូ ឡឹម គឺជាព្រឹត្តិការណ៍ដ៏សំខាន់ខាងនយោបាយ ដែលបង្កើតសន្ទុះដ៏រឹងមាំ ដើម្បីពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ និងបើកដំណាក់កាលថ្មីនៃការអភិវឌ្ឍក្នុងទំនាក់ទំនងទ្វេភាគី។
នាយឧត្តមសេនីយ៍ ផាន់ វ៉ាន់យ៉ាង មានបំណងចង់ធ្វើការជាមួយក្រសួងការពារជាតិអូស្ត្រាលី ដើម្បីអនុវត្តន៍ការយល់ដឹងរួមរបស់ថ្នាក់ដឹកនាំជាន់ខ្ពស់នៃប្រទេសទាំងពីរលើកិច្ចសហប្រតិបត្តិការការពារជាតិ; ពង្រឹងទំនាក់ទំនងមិត្តភាព គួរឱ្យទុកចិត្ត និងជាក់ស្តែងរវាងក្រសួងការពារជាតិទាំងពីរ និងកងទ័ពទាំងពីរ; ជំរុញកិច្ចសហប្រតិបត្តិការការពារជាតិទ្វេភាគីឱ្យអភិវឌ្ឍកាន់តែខ្លាំងក្លា ស្របតាមភាពជាដៃគូយុទ្ធសាស្ត្រគ្រប់ជ្រុងជ្រោយរវាងវៀតណាម និងអូស្ត្រាលី។
រីឯខ្លួនវិញ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិអូស្ត្រាលី លោក Richard Marles បានបញ្ជាក់ពីការត្រៀមខ្លួនរួចជាស្រេច រួមជាមួយនាយឧត្តមសេនីយ៍ ផាន់ វ៉ាន់ យ៉ាង និងថ្នាក់ដឹកនាំនៃក្រសួងការពារប្រទេសវៀតណាម ដើម្បីពង្រឹងនិងពង្រីកប្រសិទ្ធភាពនៃកិច្ចសហប្រតិបត្តិការការពារជាតិទ្វេភាគី ដោយរួមចំណែកដល់ការអភិវឌ្ឍទំនាក់ទំនងដ៏រឹងមាំរវាងប្រទេសទាំងពីរ ដោយផ្អែកលើការគោរពគ្នាទៅវិញទៅមក ដើម្បីផលប្រយោជន៍របស់ប្រទេសនីមួយៗ ក៏ដូចជាសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍនៅក្នុងតំបន់។
នៅក្នុងកិច្ចពិភាក្សានេះដែរ ភាគីទាំងពីរក៏បានចែករំលែកព័ត៌មានអំពីស្ថានភាពពិភពលោកនិងតំបន់ និងបញ្ហាដែលមានការយកចិត្តទុកដាក់ដូចគ្នា។ នៅចុងបញ្ចប់កិច្ចពិភាក្សា ភាគីទាំងពីរបានចុះហត្ថលេខាលើសេចក្តីប្រកាសធ្វើបច្ចុប្បន្នភាព ចក្ខុវិស័យរួម ស្តីពីការអភិវឌ្ឍន៍កិច្ចសហប្រតិបត្តិការការពារជាតិរវាងក្រសួងការពារជាតិទាំងពីរ។ ក្នុងក្របខ័ណ្ឌនៃសកម្មភាពរបស់នាយឧត្តមសេនីយ៍ ផាន់ វ៉ាន់យ៉ាង នៅប្រទេសអូស្ត្រាលី ភាគីទាំងពីរក៏បានផ្លាស់ប្តូរឯកសារសហប្រតិបត្តិការចំនួន ៣ ស្តីពីការស្វែងរកនិងជួយសង្គ្រោះ សន្តិសុខព្រំដែន និងឆ្មាំឆ្នេរសមុទ្រ៕
