ការស្វែងយល់
សូមទស្សនាកម្រងរតនវត្ថុជាតិនៃព្រះពុទ្ធសាសនាវៀតណាម តាមរយៈពិព័រណ៍ "វប្បធម៌ព្រះពុទ្ធសាសនាវៀតណាម" ក្នុងឱកាសបុណ្យវិសាខបូជាឆ្នាំ២០២៥
ជាលើកដំបូង ព័ត៌មាននៃរតនវត្ថុជាតិចំនួន៨៧ ដែលជាកម្មសិទ្ធិរបស់ព្រះពុទ្ធសាសនាវៀតណាម បានបកបង្ហាញដល់សាធារណជន ព្រះសង្ឃ ពុទ្ធបរិស័ទ រួមគ្នាស្វែងយល់ និងទស្សនា តាមរយៈពិព័រណ៍ "វប្បធម៌ព្រះពុទ្ធសាសនាវៀតណាម" ក្នុងក្របខ័ណ្ឌនៃពិធីបុណ្យវិសាខបូជារបស់អង្គការសហប្រជាជាតិឆ្នាំ២០២៥ នៅទីក្រុងហូជីមិញ។
ពិព័រណ៍នេះ រៀបចំឡើងដោយគណៈកម្មាធិការវប្បធម៌មជ្ឈិមសមាគមព្រះពុទ្ធសាសនាវៀតណាម ក្រោមប្រធានបទ "វប្បធម៌ព្រះពុទ្ធសាសនាវៀតណាម៖ ភាសា - សម្លៀកបំពាក់បុព្វជិត - ស្ថាបត្យកម្ម - បេតិកភណ្ឌ" ឧទ្ទេសនាមអំពីតម្លៃពិសេសនៃព្រះពុទ្ធសាសនាវៀតណាម កៀកជាមួយស្មារតីនៃការធ្វើសមាហរណកម្ម ការតភ្ជាប់រួមជាមួយវប្បធម៌ព្រះពុទ្ធសាសនានៃប្រទេសនានា នៅលើពិភពលោក។
នៅទីនេះ សាធារណជន នឹងមានឱកាសទស្សនាបរិយាកាសបង្ហាញឡើងវិញភាពរស់រវើក នៃកក្តាវប្បធម៌ព្រះពុទ្ធសាសនាដូចជា៖ ពិធីកិច្ចសាសនា សម្លៀកបំពាក់បព្វជិត ឧបករណ៍តន្ត្រីបុរាណ គម្ពីរដីកា គម្ពីរបន្ទះឈើ សីលធម៌ជុងតែ ព្រះរាជក្រឹត្យតែងតាំង រួមជាមួយកម្រងរូបភាព និង ឯកសារកម្រៗ។
ជាពិសេស នេះជាលើកដំបូង ដែលរតនវត្ថុជាតិចំនួន៨៧ ដែលទាក់ទងនឹងព្រះពុទ្ធសាសនា បានប្រមូលផ្តុំ នៅព្រឹត្តិការណ៍វប្បធម៌សាសនា មានលក្ខណៈអន្តរជាតិ ក្នុងនោះរួមមាន រូបសំណាក គ្រឿងចម្លាក់ គ្រឿងសក្ការៈ គម្ពីរបុរាណ។ល។ បានដាក់បង្ហាញ និង ឧទ្ទេសនាមដូចជា ភស្តុតាងរស់រវើកអំពីតួនាទីរបស់ព្រះពុទ្ធសាសនា ក្នុងប្រវត្តិសាស្ត្រវប្បធម៌វៀតណាម។ រតនវត្ថុទាំងនេះ ឆ្លុះបញ្ចាំងច្បាស់នូវដំណើរសញ្ញាស្លាក់ស្នាមនៃរាជវង្ស លី ត្រឹន ឡេ ង្វៀន ក្នុងដំណើរការបង្កើតអត្តសញ្ញាណព្រះពុទ្ធសាសនាវៀតណាម។ ភ្ញៀវទេសចរជាច្រើន ក៏ដូចជាព្រះសង្ឃ ដូនជី និងពុទ្ធបរិស័ទ មានចាប់អារម្មណ៍ និងកោតសរសើរយ៉ាងខ្លាំង នៅពេលដែលបានឃើញផ្ទាល់នូវរតនវត្ថុជាច្រើនមានប្រភពដើម ក៏ដូចជារឿងរ៉ាវគួរឱ្យចាប់អារម្មណ៍ពាក់ព័ន្ធដល់រតនវត្ថុដ៏មានតម្លៃ នៅក្នុងឃ្លាំងវប្បធម៌ព្រះពុទ្ធសាសនា។ រតនវត្ថុមួយចំនួន ដែលសាធារណជនចាប់អារម្មណ៍ និងស្វែងយល់បំផុត អាចរៀបរាប់បានដូចជា៖ រូបភាពបង្ហាញឡើងវិញនូវការសាងសង់ចេតិយ ផាត់ទិច (Phat Tich) នាសម័យរជ្ជកាលលី (ខេត្តបាក់និញ - Bac Ninh) គម្ពីរបន្ទះឈើនៅទីស្ការបូជាវិញងៀម (Vinh Nghiem) (ខេត្តបាក់យ៉ាង - Bac Giang) ចីវរ និងផ្តិលនាសម័យង្វៀន បក្សីសេកបៃតង និងទំនៀមទម្លាប់នៃការគោរពបូជារបស់ជនជាតិវៀតណាមពីបុរាណ រូបសំណាកព្រះម៉ែគង់ស៊ីអ៊ីមសហស្សនេត្រសហស្សហស្ត នៃវត្តប៊ុតថាប (But Thap) (ខេត្តបាក់និញ - Bac Ninh) រូបសំណាកព្រះម៉ែគង់ស៊ីអ៊ីមសហស្សនេត្រសហស្សហស្តនៃវត្តមេសឺ (Me So) (ខេត្តហឹងអៀន - Hung Yen) សម្លៀកបំពាក់បព្វជិត ព្រះពុទ្ធសាសនាវៀតណាម។ល។
ទាំងនេះ មិនត្រឹមតែជាបេតិកភណ្ឌសម្ភារៈដ៏មានតម្លៃប៉ុណ្ណោះទេ ថែមទាំងជាភស្តុតាងរស់រវើកអំពីតួនាទីរបស់ព្រះពុទ្ធសាសនាក្នុងជីវភាពវប្បធម៌ - ស្មារតីរបស់ប្រជាជនវៀតណាម តាមសម័យកាលនីមួយៗ។ តាមរយៈពិព័រណ៍ "វប្បធម៌ព្រះពុទ្ធសាសនាវៀតណាម" ជាមួយគោលបំណងឧទ្ទេសនាម អំពីលក្ខណៈទូទៅ នៃវប្បធម៌ព្រះពុទ្ធសាសនាវៀតណាម លើទិដ្ឋភាពភាសា សម្លៀកបំពាក់បព្វជិត ស្ថាបត្យកម្ម បេតិកភណ្ឌ តាមរយៈនោះបង្ហាញពីភាពសម្បូរបែប ភាពចម្រុះ នៃវប្បធម៌ព្រះពុទ្ធសាសនាវៀតណាម ដើម្បីកូនចៅជំនាន់ក្រោយគោរព ថែរក្សា បន្តវេន និងផ្សព្វផ្សាយ៕
ក្នុងក្របខ័ណ្ឌនៃពិធីបុណ្យវិសាខបូជាអង្គការសហប្រជាជាតិឆ្នាំ២០២៥ នៅទីក្រុងហូជីមិញ ព្រះពុទ្ធសាសនាវៀតណាម បានអញ្ជើញនិមន្តបេះដូងរបស់ព្រះសង្ឃ ធីច ក្វាងឌឹក (Thich Quang Duc) មកកាន់វត្ត វៀតណាមក្វឹកទឺ (Viet Nam Quoc Tu) (ខណ្ឌ១០ ទីក្រុងហូជីមិញ) ដើម្បីតម្កល់ ក៏ដូចជាដើម្បីឱ្យសាធារណជន អាចមកគោរពបូជាបេះដូង (រហូតដល់ថ្ងៃទី១០ ខែឧសភា) បន្ទាប់មក បេះដូងរបស់ព្រះអង្គ នឹងបានតម្កល់ជាអចិន្ត្រៃយ៍ នៅវត្ត វៀតណាមក្វឹកទឺ (Viet Nam Quoc Tu)។
