16/08/2019 15:00 GMT+7 Email Print Like 0

ហូយអាន (Hoi An) - មន្តស្នេហ៍ទីក្រុងបុរាណ

ទីក្រុង​បុរាណ​ហូយ​អាន (Hoi An)​ របស់​វៀតណាម​ កំពុង​ក្លាយជា​ចំណុច​ក្រហម​ចំណាប់​អារម្មណ៍ ​​របស់​​ពិភពលោក​ បន្ទាប់ពី​ឆ្លងកាត់​ទីក្រុង​ Tokyo – “បេះដូង​” របស់​ប្រទេសជប៉ុន​ ចោល​ឆ្ងាយ​ទីក្រុង​ Rome - ទីកន្លែង​មានប្រសិទ្ធិនាម​ជា​សួ​គ៌ា​​​មនោរម្យ​ ​របស់​ប្រទេស​អ៊ីតាលី​ បាន​​ក្លាយជា​ទីកន្លែង​ធ្វើ​ដំណើរ​មក​កម្សាន្ត​ដ៏អស្ចារ្យ​​បំផុត​​នាឆ្នាំ​២០១៩ ដោយ​ទស្សនាវដ្តី​ទេសចរណ៍​លំដាប់ថ្នាក់​ របស់​អាមេរិក​ Travel + Leisure ជ្រើសរើស។​

ទីកន្លែង​ពេលវេលា​ទច់​គាំង​ដំណើរ​

ទីក្រុង​បុរាណ​ហូយ​អាន (Hoi An)​ ជា​ទីក្រុង​បុរាណ​មួយ​​​ស្ថិតនៅ​ចុង​ប្រភព​ព្រែកធូ​បោន​ (Thu Bon) នៅ​​ខេត្ត​ក្វាង​ណាម​ (Quang Nam) ចម្ងាយ​ពី​ទីក្រុង​ដាណាំង ​ប្រហែល​៣០​គីឡូ​ម៉ែត្រ​ទៅ​ទិស​ខាង​ត្បូង​។ អតីតកាសមនុស្ស​​លោក​ខាង​លិច​​តែង​ហៅ​ថា​ Faifo។ អំឡុង​សតវត្សរ៍​ទី​១៧  និង ១៨ ទី​ក្រុងបុរាណ​​ហូយអាន (Hoi An) ​ធ្លាប់​​ជា​កំពង់​ផែ​​ពាណិជ្ជកម្ម​​អន្តរជាតិ​​រុង​រឿង​ ជា​ទីកន្លែង​ដោះដូរ​ពាណិជ្ជកម្ម​កុះករ​នៃ​ក្រុម​នាវាជួញ​ដូរ​ធំៗ មកពី​ប្រទេស​ជប៉ុន​ ចិន ហូឡង់ អេស្ប៉ាញ​ជាដើម។ មុន​សម័យកាល​នេះ​​ ទីកន្លែងនេះ​ក៏ធ្លាប់បាន​រំលឹកដល់​ដូច​ជា​ទីកន្លែង​ឈប់​​សម្រាក​សំខាន់មួយ​​ នៃ​ផ្លូវ​សូត្រ​លើ​សមុទ្រ​។

ទីក្រុង​បុរាណ​ហូយ​អាន (Hoi An)​​ បាន​ប្រៀប​ដូចជា​សារមន្ទីរ​រស់​មួយ ​ស្តីពីស្ថាបត្យកម្ម​​ និង ​ផ្នត់​ជីវភាព​រស់​នៅ​ទីក្រុង​ គំរូ​ពិសេស​មួយ ស្តី​ពី​​​កំពង់​ផែពាណិជ្ជកម្ម​​​​ប្រពៃណី​​នៅ​​តំបន់​​អាស៊ី​អាគ្នេយ៍​ ដែល​រហូត​មកដល់​សព្វថ្ងៃ​នៅ​បានរក្សា​ដូច​​​សភាព​​ដើម​។ ភាគច្រើន​ផ្ទះនៅ​ទីនេះ មានរាង​​ទម្រង់​ស្ថាបត្យកម្ម​ប្រពៃណីនៃ​​ប្រជាជន​​​វៀត​ណាម​ មានអាយុកាល​ចាប់ពី​សតវត្សរ៍​ទី​១៧ ដល់​សតវត្សរ៍ទី​១៩។ ឆ្លាស់​នឹង​​ផ្ទះ​ទាំង​អស់​នោះ​ គឺ​ជា​សំណង់​ស្ថាបត្យកម្ម​​​សាសនា​ ជំនឿ​ ដូចជា​ទីសក្ការបូជា​ វត្ត សាល​ប្រជុំ​ បូជនីយដ្ឋាន​វង្សត្រកូល​ជាដើម​ បាន​កសាង​ជាមួយ​​​ដំណើរ​​កកើត​ និង អភិវឌ្ឍន៍​នៃ​កំពង់​ពាណិជ្ជកម្ម​បុរាណ​នេះ​។​

 


ទីក្រុង​បុរាណ​ហូយ​អាន (Hoi An)​​ ស្ថិតនៅ​សុខ​សាន្ត​ក្បែរ​មាត់​ព្រែក​ហ្វាយ​ (Hoai)។ រូបថត៖ តឹតសើន


 ទីក្រុង​បុរាណ​ហូយអាន​ (Hoi An)​​ ពាំនាំ​ស្ថាបត្យកម្ម​ប្រពៃណី​​របស់​ប្រជាជន​វៀតណាម​។ រូបថត៖​តឹតសើន​​


ផ្ទះបុរាណ​តឹន​គី (Tan Ky) សំណង់​បាន​ទទួល​ស្គាល់ជា​កេរដំណែល​ជាតិ​នៅ​ទីក្រុងបុរាណ​​​ហូយ​អាន (Hoi An)​។ រូបថត៖ ថាញ​ហ្វរ


 ទីក្រុងបុរាណ​ហូយអាន ​(Hoi An) ទាក់ទាញ​ភ្ញៀវទេសចរ​ ដោយ​មាន​ច្រក​ចូល​ពោរពេញទៅ​ដោយ​ស្លែកាន់​។​ រូបថត៖ ហ្វុង​ធូ​


 ហាងលក់​វត្ថុបុរាណ​មួយ​នៅទីក្រុង​​ហូយ​អាន (Hoi An)​។​ រូបថត៖ តឹតសើន


 ភាគច្រើន​ផ្ទះ​បុរាណ​នៅទីក្រុង​​បុរាណ​ហូយ​អាន (Hoi An)​ សុទ្ធតែបាន​រចនា​តាម​បែប​ស្ថាបត្យកម្មអណ្តូង​​មេឃនៅ​ចំកណ្តាល​ផ្ទះ​។ រូបថត៖ ហ្វុង​ធូ​


 ភ្ញៀវទេសចរ​ចូល​ចិត្ត​ស្វែង​យល់អំពី​សាល​ប្រជុំ​​ភុក​កៀន​ (Phuc Kien) របស់​ជនជាតិ​ចិន​ នៅ​ទីក្រុង​បុរាណ​ហូយ​អាន (Hoi An)​។ រូបថត៖ ថាញ​ហ្វ័រ​


 ទីក្រុងបុរាណ​ហូយអាន (Hoi An)​ ​ទាក់ទាញ​ភ្ញៀវទេសចរ​ជិត​៥លាន​នាក់ អញ្ជើញ​មកទស្សនា​នា​ឆ្នាំ​២០១៨។ រូបថត៖ ថាញ​ហ្វ័រ​


 ភ្ញៀវ​ទេសចរ​ជិះកង់​កម្សាន្ត​​ទីក្រុង​បុរាណ​ហូយអាន​ (Hoi An)​ សុខ​សាន្ត​។ រូបថត៖ តឹតសើន

បណ្តាញ​ព័ត៌មាន​​ CNN អាមេរិក ធ្លាប់​លើក​សរសើរ​ទីក្រុង​បុរាណ​ហូយអាន (Hoi An)​ ជា​ទីក្រុង​បូរាណ​មួយ​ ក្នុង​ចំណោម​ទីក្រុង​បុរាណ​ស្អាតបំផុតនៅ​​អាស៊ាន​អាគ្នេយ៍​។ CNN​ សរសេរ​ថា៖ “បាន​អង្គការ​ UNESCO ទទួល​ស្គាល់​ជា​បេតិកភណ្ឌ​ពិភពលោក​​នា​ឆ្នាំ​១៩៩៩។ ទីក្រុង​បុរាណ​ហូយអាន (Hoi An) ​​ធ្លាប់​ជា​កំពង់​ផែ​ពាណិជ្ជកម្ម​រុង​រឿង​មួយ​ របស់​​ឈ្មួញ​បារាំង ជប៉ុន និង ចិន​ជាដើម​។ ឆ្លង​កាត់​កងចក្រ​​ប្រវត្តិសាស្រ្ត​​ ទីក្រុង​បុរាណ​នេះ​ បាន​ពាំនាំ​នូវ​លក្ខណៈ​​បុរាណ​ដ៏​ស្អាត និង ​ភាព​សុខសាន្ត​​”។​


ទីក្រុង​បុរាណ​ហូយ​អាន (Hoi An)​ បាន​អង្គការ​ UNESCO ទទួល​ស្គាល់​ជា​បេតិកភណ្ឌ​ពិភពលោក​នា​ឆ្នាំ​១៩៩៩។ ទីនេះ​សព្វថ្ងៃ​មាន​កេរដំណែល​​ ១៣៦០ ក្នុង​នោះ​មាន​ផ្ទះបុរាណ​​១០៦៨​ខ្នង អណ្តូង​ទឹក​បុរាណ​១១កន្លែង​ បូជនីយដ្ឋាន​វង្សត្រកូល​៣៨ វត្ត​១៩ ទីសក្ការបូជា​អាទិទេព​​​៤៣ វិហារ​​២៣ ផ្នូរ​ខ្មោច​បុរាណ​ប្រភេទ​ពិសេស​៤៤ និង ស្ពាន​បុរាណ​មួយ​។

ពិសេស​ ថ្មី​ៗនេះ ទស្សនាវដ្តី​ទេសចរណ៍​ល្បី​ឈ្មោះ​លំដាប់ថ្នាក់​ពិភពលោក​ Travel + Leisure របស់​អាមេរិក បាន​ជ្រើសទីក្រុង​បុរាណ​​ហូយ​អាន (Hoi An)​ ជា​ទីកន្លែង​អស្ចារ្យ​បំផុត​លើ​សកលលោក​​នា​ឆ្នាំ​២០១៩។ តាម​លទ្ធផល​ប្រកាស​របស់ Travel + Leisure ក្នុង​តារាង​រៀប​លំដាប់​ថ្នាក់​ “ទីក្រុងដ៏​អស្ចារ្យ​បំផុត​លើសកលលោក​”​ (Top 15 Cities in the World) ទីក្រុង​បុរាណ​ហូយអាន (Hoi An)​ទទួល​បាន​៩០,៣៩​​ពិន្ទុ លើ១០០​ពិន្ទុ​​ ដោយ​សារ​ “ប្រជាជន​មូលដ្ឋាន​ស្និទ្ធស្នាល​ វប្បធម៌ កេរដំណែល​ និង ម្ហូបអាហារ​សម្បូរ​បែប​”។ នៅ​ថ្ងៃទី​១៦ ខែ​កក្កដា ​ម្តងទៀត​ ទីក្រុង​បុរាណ​ហូយអាន (Hoi An)​ ​បាន​ក្លាយជា​ចំណុច​ក្រហម​ចំណាប់​អារម្មណ៍​​​នៃ​សកលលោក​ ពេល​រូបភាព​ដ៏ស្រស់​​ស្អាត​​អំពី​ វត្ត ស្ពាន​ ជា​និមិត្ត​រូប​ជាង​៤សតវត្សរ៍ ​នៃបេតិកភណ្ឌ​ពិភពលោក​នេះ បាន​ Google លើកនាម​លើ​ទំព័រ​​ដើម​ ​ដោយ​​​ស្នាមគំនូស​រស់​រវើករបស់​​វិចិត្រករ​ Shanti Rittgers នៅ​លើ​ Google Doodle។

ពេលនេះ ធ្វើដំណើរ​ឆ្លង​កាត់​​ច្រក​ផ្លូវ​តូចនីមួយ​ៗ​​ ភ្ញៀវទេសចរ​ដូច​ជា​បាន​ឃើញ​ពេល​វេលា​គាំង​ដំណើរ​​នៅលើរាល់​​ដំបូលក្បឿង​ ល្វែងផ្ទះ​ បង្អួច​តូច​។​ ​តាម​នោះ រូបភាព​អតីតកាល​ពន្លឺ​ឡើង​បញ្ចាំង​សម័យ​អតីតកាស​រុង​រឿង នៃ​ទីក្រុង​បុរាណ​ហូយ​អាន (Hoi An)​ ឆ្នាំ​ណានោះ​។

អាហារសួគ៌ា ​ ស្វែង​យល់ និង ទិញ​ដូ

ឆ្លងកាត់ពេលវេលា​ កង​ចក្រប្រវត្តិសាស្រ្ត​ ទីក្រុង​បុរាណ​​​​ហូយ​អាន (Hoi An)​ ​​ពេល​នេះ​មិន​សូវ​មាន​ស្លាក​ស្នាម​​​ កំពង់​ផែ​ពាណិជ្ជកម្ម​ដ៏​ល្បី​ល្បាញ​ពិភពលោក​​​នៃ​​អតីតកាល​ តែ​មិន​ដោយសារ​​ហេតុនោះ​ បាត់​ទៅ​ភាព​​សង្ហារ​ និង ភាព​កុះករ​ នៃ​កំពង់​ផែដ៏​​​រុង​រឿង​ថ្ងៃណានោះ​។

ទីក្រុង​បុរាណ​ហូយអាន​ (Hoi An) សព្វថ្ងៃ​បាន​ប្រៀប​ដូចជា​​សួគ៌ា​ នៃ​អ្នក​និយម​ស្វែង​​យល់​​ និង ពិសោធន៍​។ រៀងរាល់ឆ្នាំ​ ភ្ញៀវទេសចរ​លើ​ពិភពលោក​រាប់​លាន​នាក់​ បាន​ធ្វើ​ដំណើរ​ស្វែង​មក​ទីក្រុង​បុរាណ​តូច​​ ទូលាយ​មិនពេញ​២​គីឡូម៉ែត្រ​បួន​ជ្រុង​នេះ ដើម្បី​ក្រេប​ពិសោធន៍​ នូវ​​អារម្មណ៍​ពិសេស អំពី​​មនុស្ស​ វប្បធម៌ ទេសចរណ៍ និង ម្ហូប​អាហារ​​​ទីក្រុង​បុរាណ​ហូយអាន ​(Hoi An)។​

ឆ្លង​កាត់​ពេលវេលា​រាប់​រយ​ឆ្នាំ ប៉ុន្តែ​ស្លាកស្នាម​ជីវិត ​កំពង់​ផែ​ពាណិជ្ជកម្ម​ នៅ​តែ​​ដិត​ជាប់​លើ​ផ្នត់​​ជីវភាព​រស់​នៅ​ របស់​ប្រជាជន​នៅ​ក្រុង​បុរាណ​ហូយ​អាន (Hoi An)​។ បណ្តោយ​តាម​ភ្លឺ​​ព្រែក​​ហ្វាយ (Hoai) ​ដ៏មនោរម្យ​ ផ្ទះសម្បែង​ ហាង​ ផ្សារផ្សោនៅទីនេះ​ និង សកម្មភាព​កុះករ​ចាប់ពី​ព្រឹក​រហូតដល់​យប់​។​ លើ​ព្រែក​ទោះបី​មិនមាន​​នៅ​ទិដ្ឋភាព​នាវា​ជួញ​ដូរធ្វើដំណើរ​តាម​សមុទ្រ​​ចេញ​ចូល​ ប៉ុន្តែ​ទិដ្ឋភាព​ទូក​កុះករធ្វើ​ដំណើរ​ចុះឡើង ​នៅ​តែមាន​ដូច​ដើម​​។

 


 សព្វថ្ងៃ​ មានភោជនិយដ្ឋាននៅ​លើទី​​ខ្ពស់​ ជួយភ្ញៀវទេសចរ​ងាយ​គយ​គន់​នូវ​ទេសភាព​​បុរាណ​ទាំងស្រុង​នៃ​ទីក្រុង​បុរាណ​ ចាប់តាំងពី​ដំបូល​ក្បឿង​ញីឈ្មោល​។ រូបថត៖ តឹត​សើន​


ទីក្រុងបុរាណ​​ហូយ​អាន (Hoi An)​​ ទាក់ទាញ​​ភ្ញៀវទេសចរ​​ ដោយ​មាន​ម្ហូប​អាហារ​ពិសេស​។​ រូបថត៖ តឹត​សើន


 ផ្លូវ​​​អាហារ​រាត្រី​ក្បែរ​មាត់​ព្រែក​ហ្វាយ (Hoai)​។ រូបថត៖ តឹត​សើន​


 នំ​បង្គា​ឈ្ងុយ​ឆ្ងាញ់​នៅទី​​ក្រុង​បុរាណ​ហូយ​អាន (Hoi An)​។ រូបថត៖ តឹត​សើន​


ភ្ញៀវ​ទេសចរ​អាច​ជ្រើស​សម្រាប់​​ខ្លួន​​ នូវ​នំ​ម្សៅ​​អាំង​ ធ្វើជា​របស់​ហូប​សម្រន់​ ក្នុង​ដំណើរ​ស្វែង​យល់​ទីក្រុងបុរាណ​​ហូយ​អាន (Hoi An)​។ រូបថត៖ តឹត​សើន


សព្វថ្ងៃ​ ប្រជាជន​ហូយអាន ​(Hoi An) នៅ​អភិវឌ្ឍន៍​មុខ​របរ​ធ្វើ​ប្រដាប់ប្រដារ​ហត្ថកម្ម​ បាន​ភ្ញៀវ​ទេសចរ​ពេញ​និយម​។ រូបថត៖ តឹត​សើន


 ហាង​ឆ្លាក់​កូន​ត្រា​ស្ថិតនៅ​មជ្ឈមណ្ឌល​ទីក្រុងបុរាណ​​ហូយ​​អាន​។ រូបថត៖ តឹត​សើន


ភ្ញៀវទេសចរ​អន្តរជាតិ​ពិសោធន៍ ​​របៀប​ធ្វើ​ចង្កៀង​គោម​ប្រពៃណី ​របស់​ប្រជាជន​ក្រុង​បុរាណ​ហូយ​អាន (Hoi An)​។ រូបថត៖ ថាញ​ហ្វ័រ


 ទីក្រុង​បុរាណ​ហូយ​អាន (Hoi An)​ អភិវឌ្ឍន៍​ខ្លាំង​ពូកែ ជាមួយនឹង​ហាង​កាត់​ដេរ​ ប្រសិន​បើ​​ភ្ញៀវទេសចរ​​ចង់​បាន​សម្លៀក​បំពាក់​ឆាប់​ៗ ជាង​នៅទីនេះ​នឹង​ធ្វើ​ជូន​អំឡុង​ពេល​មួយ​ថ្ងៃ​។ រូបថត៖ ថាញ​ហ្វ័រ​


 មុខ​របរ​ធ្វើ​ចង្កៀង​គោម​ល្បី​ឈ្មោះ​នៅ​ក្រុង​បុរាណ​ហូយ​អាន (Hoi An)​។ រូបថត៖ ហ្វុង​ធូ​

 

ប្រជាជន​ទីក្រុង​បុរាណ​ហូយអាន​ (Hoi An)​ ល្បី​ឈ្មោះ​មាន​ថ្វី​ដៃ​ពូកែ​ ខាងការ​ជួញ​ដូរ​ និង ធ្វើ​របរវិចិត្រ​​សិប្បកម្ម​ ​​ ទើប​បណ្តោយ​តាម​ផ្លូវ​​ក្រុង​មាន​​ហាង​តៀម​ច្រើន​ណាស់​។ ទាំងសងខាង​ផ្លូវ​ ផ្ទះ​មួយ​គឺមាន​ហាង​មួយ​។ នៅទីនោះ​ពួកគាត់​លក់​គ្រប់​ប្រដាប់​​ ធ្វើ​គ្រប់​មុខរបរ​។ តាំងពី​អាហារដ្ឋាន​ ហាង​កាហ្វេ ហាង​ទឹក​ រហូតដល់​ហាង​ដេរ​ប៉ាក់​ គ្រឿង​ស្បែក​ រូបគំនូរ​ វត្ថុអនុស្សាវរីយ៍​ វត្ថុ​វិចិត្រ​សិប្បកម្មជាដើម​របស់​អ្វី​ក៏មាន​។ ច្រើន​បំផុត ​គឺ​ចង្កៀង​គោម​ មានដង​ផ្លូវមួយ​សុទ្ធតែ​​ជំនាញ​ផលិត​ និង អាជិវកម្ម​ចង្កៀត​គោម​។ រាត្រី ចង្កៀង​គោម​អុជ​បំភ្លឺ​ដូចជា​ផ្កាយ​ ពណ៌ខៀវ​ ពណ៌ក្រហម ពណ៌​ស្វាយ​ជាដើម​ ភ្លឺ​ផ្លេកៗ ​នៅគ្រប់​​ដង​ផ្លូវ​។​

ភ្ញៀវទេសចរបរទេស ​អញ្ជើញ​មក​ទីក្រុង​បុរាណ​ហូយ​អាន (Hoi An)​ តែង​លង់​អារម្មណ៍ចំពោះ​​មុខម្ហូប​តាម​ចញ្ចើម​ថ្នល់​ តម្លៃ​ថោ​ក​​ ឈ្ងុយ​ឆ្ងាញ់​ ហើយ​ពាំ​នូវ​រសជាតិ​ប្រពៃណី​​ ​របស់​ប្រជាជន​វៀតណាម​ ក្នុងនោះ​មាន​មុខម្ហូប​ល្បី​ឈ្មោះ​លើ​ពិភពលោក​​ដូចជា៖ កាវ​ឡូវ​ (Cao Lau) មីក្វាង Mi Quang) បាយ​មាន់ លៀស​ច្របល់​ នំប័ង នំ​ខ្វាយ (Khoai) នំ​បៅ បញ្ចុក​សាច់​អាំង តាវ​ភើ​ (Tao Pho) ជាដើម​។

ទិញ​ដូរ​ សម្លៀក​បំពាក់ ក៏​​ជា​ចំណាប់​អារម្មណ៍​មួយ ​មិនអាច​​អំណត់​បាន​​ចំពោះ​ភ្ញៀវទេសចរ​។ នៅទីនេះ​ពួកគាត់​អាច​ដាក់​ឱ្យ​កាត់​ដេរ​សម្លៀកបំពាក់​ ចាប់ពី​ធម្មតា​រហូតដល់​ឆើត​ឆាយ​​ប្រណីត​ ធ្វើ​ស្បែក​ជើង​ ធ្វើ​កាបូប​កាន់ដៃ​​សមនឹង​ម៉ូដ​សម្លៀក​បំពាក់​ ដោយ​តម្លៃ​សមរម្យ​ បំផុត​គឺពេលវេលា​ធ្វើ​សម្រេច​អាច​ឆ្លើយ​តប​នឹ​ង​តម្រូវ​ការ​របស់​ភ្ញៀវ​។​

ទីក្រុង​បុរាណ​ហូយ​អាន (Hoi An)​ នៅ​ជា​រង្វង់​ផ្លូវ​ស្វែង​យល់​​ពោរពេញ​ទៅ​ចំណូល​ចិត្ត ​នៃ​ភ្ញៀវទេសចរ ជាមួយនឹង​​អាសយដ្ឋាន​ទស្សនា​ទាក់ទាញ​។​ ពីព្រោះ​នៅ​ជុំវិញ​ទីក្រុងបុរាណ​​​ហូយ​អាន (Hoi An)​ ក្នុង​រង្វង់​កាំ​មិន​លើស​ពី​​៣០គីឡូម៉ែត្រ​ គឺ​មាន​មណ្ឌល​ទេសចរ​ល្បី​ឈ្មោះ​ជាច្រើន​ ដែល​ភ្ញៀវទេសចរ​អាច​ឈាន​ចូល​ទស្សនា​នៅពេល​ណា​ក៏បាន​ ដូចជា៖ ភូមិ​កុលាលភាជន៍​​បុរាណ​ថាញ​ហា (Thanh Ha) ភូមិ​បន្លែ​ត្រា​ក្វេ​ (Tra Que) ព្រៃចាក​កឹមថាញ (Cam Thanh) កោះ​កូវឡាវ​ចាម​ (Cu Lao Cham) សិវក្ខេត្តមី​សើន (My Son) ឆ្នេរ​សមុទ្រ​កឿដាយ (Cua Dai) ឆ្នេរ​សមុទ្រ​មី​ខេ (My Khe) ភ្នំ​ងូហាន់ (Ngu Hanh) មណ្ឌលទេសចរណ៍​ BaNa Hills ជា​ដើម​។

ហេតុនេះ​ហើយ​ គ្មានទីណា​ ទីក្រុងបុរាណ​​​ហូយ​អាន (Hoi An)​ គឺជា​សួគ៌ា​នៃ​អ្នកនិយម​​ម្ហូបអាហារ​ ស្វែង​យល់​ និង​ទិញ​ដូ​រ៕​

 

អត្ថបទ៖ ថាញ​ហ្វ័រ​ រូបថត៖ តឹតសើន ថាញហ្វ័រ​​ ហ្វុង​ធូ​
 

បណ្តាអត្ថបទបានផ្សាយ