ក្នុងឱកាសអញ្ជើញចូលរួមកិច្ចប្រជុំកំពូលក្រុម G7 បើកទូលាយនិងបំពេញទស្សនកិច្ចនៅប្រទេសកាណាដានោះ នារសៀលថ្ងៃទី៨ មិថុនា នៅទីក្រុង Quebec នាយករដ្ឋមន្រ្តីវៀតណាមលោក Nguyen Xuan Phuc បានអញ្ជើញចូលរួមសិក្ខាសាលាសហគ្រាសវៀតណាម កាណាដា។
នាយករដ្ឋមន្រ្តីលោក Nguyen Xuan Phuc ថ្លែងមតិនៅក្នុងសិក្ខាសាលានេះ (រូបថត៖ VGP)
ថ្លែងមតិនៅទីនេះ លោកនាយករដ្ឋមន្រ្តីបានសម្ដែងជំនឿទុកចិត្តថា នាពេលដែលកិច្ចព្រមព្រៀងពាណិជ្ជកម្មលើគ្រប់ជ្រុងជ្រោយនិងជឿនលឿនសំរាប់ភាពជាដៃគូអន្តរប៉ាស៊ីហ្វិក (CPTPP) ចូលជាធរមាននោះ នឹងបង្កើតឡើងបរិយាកាសធ្វើអាជីវកម្មយ៉ាងងាយស្រួលដើម្បីទាក់ទាញវិនិយោគិនកាណាដាដ៏ច្រើនកុះករចូលមកវៀតណាម។ ស្ដីពីសក្ដានុភាពសហប្រតិបត្តិការរវាងប្រទេសទាំងពីរ នាយករដ្ឋមន្រ្តីលោក Nguyen Xuan Phuc បានអះអាងថា៖
“វៀតណាមកំណត់ថា កាណាដាជាដៃគូសំខាន់នៅទ្វីបអាមេរិក ព្រោះថាខឿនសេដ្ឋកិច្ចនៃប្រទេសទាំងពីរមានសក្ដានុភាពដ៏ធំធេង ហើយមានលក្ខណៈជួយឧបត្ថម្ភគ្នាទៅវិញទៅមក។ ពិសេសគឺវៀតណាមមានខឿនកសិកម្មត្រូពិចដ៏សម្បូរបែបណាស់ដែលពោរពេញទៅដោយផលិតផលឆ្ងាញ់ សម្បូរជីវជាតិក៏ដូចជាត្រូវបានធានាអនាម័យចំណីអាហារផងដែរ”។
នៅសិក្ខាសាលានេះ នាយករដ្ឋមន្រ្តីលោក Nguyen Xuan Phuc បានថ្លែងបញ្ជាក់ថា ទុនវិនិយោគដោយផ្ទាល់ពីបរទេសគឺសំខាន់ណាស់ចំពោះវៀតណាម ដោយហេតុនេះវៀតណាមតែងតែយកចិត្តទុកដាក់ដល់វិនិយោគិនបរទេសនិងការពារសិទ្ធិនិងផលប្រយោជន៍ដ៏ស្របច្បាប់របស់វិនិយោគិន។ លោក Vincent Joli-Coeur អនុប្រធានធនាគារជាតិកាណាដាបានវាយតំលៃខ្ពស់ចំពោះការកែទម្រង់ ការផ្លាស់ប្ដូរថ្មីរបស់វៀតណាមក្នុងអំឡុង៣០ ឆ្នាំកន្លងមក ព្រមទាំងសម្ដែងសុទិដ្ឋិនិយមអំពីឱកាសវិនិយោគនៅវៀតណាម។
“ក្នុងចំណោមប្រទេសដែលធនាគារជាតិកាណដាកំពុងមានវត្តមាននោះគឺវៀតណាមឈរលំដាប់ថ្នាក់ទី ១ អំពីការបើកចំហចំពោះវិនិយោគិនបរទេស។ វៀតណាមក៏កំពុងសុក្រិតនូវបទដ្ឋានអំពីហេដ្ឋារចនាសម្ព័ន្ធផងនិងសីលធម៌អាជីវកម្មទៀតផង”។
មុននោះ នារសៀលថ្ងៃទី៨ មិថុនា នាយករដ្ឋមន្រ្តីលោក Nguyen Xuan Phuc បានជួបសន្ទនាជាមួយអគ្គទេសាភិបាលកាណាដាលោកស្រី Julie Payette។ ក្នុងជំនួបនេះ លោកនាយករដ្ឋមន្រ្តីអះអាងថា វៀតណាមគាំទ្រយ៉ាងពេញទំហឹងចំពោះប្រធានបទស្ដីពីបម្រែបម្រួលអាកាសធាតុនិងមហាសមុទ្រនៃកិច្ចប្រជុំកំពូលក្រុម G7 លើកនេះ ហើយនឹងខិតខំប្រឹងប្រែងដើម្បីរួមវិភាគទានទៅក្នុងជោគជ័យរួមនៃកិច្ចប្រចុំ៕
តាម VOV5 -វិទ្យុសម្លេងវៀតណាម
