12/04/2021 10:43 GMT+7 Email Print Like 0

ឆ្លើយសំណួររបស់មិត្តអ្នកស្ដាប់

ក្នុងសប្ដាហ៍កន្លងទៅ គណៈកម្មការផ្សាយជាភាសាបរទេស (VOV5) ទទួលបានសំបុត្រ អ៊ីម៉ែលនិងទូរស័ព្ទចំនួន៣៩៦ មកពីប្រទេសនិងតំបន់ដែនដីចំនួន៣៧ ក្នុងនោះកម្មវិធីផ្សាយជាភាសាខ្មែរទទួលបានសំបុត្រនិងអ៊ីម៉ែលចំនួន១៣របស់មិត្តអ្នកស្ដាប់កម្ពុជា។ យើងខ្ញុំសូមថ្លែងអំណរគុណយ៉ាងស្មោះស្ម័គ្រដល់ការផ្ដល់មតិនិងមនោសញ្ចេតនារបស់លោកអ្នកចំពោះកម្មវិធី។
 

អនុរដ្ឋមន្រ្តីការបរទេសវៀតណាម លោក Nguyen Quoc Dung ប្រគល់ជានិមិត្តរូបជំនួយជាទឹកប្រាក់ចំនួន២០ម៉ឺនដុល្លាអាមេរិកជូនឯកអគ្គរាជទូតកម្ពុជាប្រចាំវៀតណាមលោក ចាយ ណាវុធ។
 

ក្នុងសប្ដាហ៍កន្លងមក មិត្តអ្នកស្ដាប់ជាច្រើនបានសម្ដែងការយកចិត្តទុកដាក់អំពីព័ត៌មានពាក់ព័ន្ធដល់ការដែលវៀតណាមបន្តជួយឧបត្ថម្ភកម្ពុជាក្នុងការបង្ការប្រយុទ្ធប្រឆាំងនឹងជម្ងឺរាតត្បាត កូវីដ ១៩។ មិត្តអ្នកស្ដាប់ ខែម ចម្រុង ផ្ដល់យោបល់ថា៖ “ប្រទេសយើងទាំងពីរគឺជាអ្នកជិតខាងល្អប្រសើរដែលតែងតែជួយគាំទ្រគ្នាទៅវិញទៅមកក្នុងគ្រាលំបាក”។ ចំណែកឯ មិត្ត សេង សុភ័ត្តិ នៅទីក្រុងភ្នំពេញ បានចែករំលែកថា៖ “វៀតណាមទើបនឹងបានទប់ស្កាត់ការផ្ទុះរាលដាលថ្មីកាលពីដើមឆ្នាំ ទោះបីជានៅតែមានការលំបាកជាច្រើនក៏ដោយ ប៉ុន្តែវៀតណាមបានផ្ដល់ជំនួយដ៏ថ្លៃថ្លាជូនចំពោះកម្ពុជា ក្នុងអំឡុងពេលចាប់តាំងពីការផ្ទុះឡើងជាលើកដំបូងនៃ កូវីដ ១៩”។

បាទ! មិត្តអ្នកស្ដាប់ជាទីស្រឡាញ់រាប់អាន! បន្តសកម្មភាពជួយឧបត្ថម្ភប្រជាជនកម្ពុជាក្នុងការបង្ការប្រយុទ្ធប្រឆាំងនឹងជម្ងឺរាតត្បាត កូវីដ ១៩ ជាពិសេសគឺក្នុងបរិបទដែលការផ្ទុះរាលដាលក្នុងសហគមន៍កាលពីចុងខែកុម្ភៈនៅតែកំពុងមានការវិវឌ្ឍន៍យ៉ាងស្មុគស្មាញនោះ ក្នុងសប្ដាហ៍កន្លងមក ស្ថានទូតវៀតណាមប្រចាំកម្ពុជាបានប្រគល់ម៉ាស់ចំនួន១ម៉ឺនម៉ាស់ជូនអគ្គនាយកដ្ឋានអន្តោប្រវេសន៍កម្ពុជា។ ក្នុងពេលជាមួយគ្នានោះ រដ្ឋាភិបាលវៀតណាមក៏បានប្រគល់ជំនួយជាទឹកប្រាក់ចំនួន២០ម៉ឺនដុល្លាអាមេរិកជូនរាជរដ្ឋាភិបាលនិងប្រជាជនកម្ពុជា សំដៅរួមដៃគ្នាបង្ការទប់ស្កាត់ការរីករាលដាលនៃ កូវីដ ១៩។ រាល់អំណោយទាំងនេះបានបង្ហាញទឹកចិត្តរបស់រដ្ឋាភិបាល ស្ថាប័នតំណាងវៀតណាមប្រចាំកម្ពុជា ក៏ដូចជាប្រជាជនវៀតណាមនិយាយរួម ក្នុងបំណងចង់ជួយឧបត្ថម្ភប្រជាជនកម្ពុជាជាបងប្អូន ជំនះពុះពារលើការលំបាក ចូលរួមចំណែកដល់ការពង្រឹងនិងពូនជ្រុំថែមទៀតនូវចំណងសាមគ្គីភាព មិត្តភាពដ៏ល្អប្រសើររវាងប្រជាជាតិទាំងពីរ។ សម្ដេចតេជោ ហ៊ុន សែន នាយករដ្ឋមន្រ្តីកម្ពុជាបានផ្ញើរសារលិខិតជូនអតីតនាយករដ្ឋមន្រ្តីវៀតណាមលោក Nguyen Xuan Phuc ដើម្បីសម្ដែងការរំភើបចិត្តនិងថ្លែងអំណរគុណពីកញ្ចប់ជំនួយជាទឹកប្រាក់ចំនួន២០ម៉ឺនដុល្លាអាមេរិកជូនចំពោះរាជរដ្ឋាភិបាលនិងប្រជាជនកម្ពុជា ព្រមទាំងថ្លែងអំណរគុណរដ្ឋាភិបាលវៀតណាមដែលមានប្រព្រឹត្តិកម្មដ៏ល្អប្រសើរជាមួយសហគមន៍ជនកម្ពុជានៅវៀតណាមក្នុងដំណាក់កាលដ៏លំបាកនាបច្ចុប្បន្ន។ នាពេលថ្មីៗនេះ សម្ដេចតេជោ ហ៊ុន សែន ក៏ជាថ្នាក់ដឹកនាំបរទេសដើមដំបូងដែលផ្ញើរសារលិខិតអបអរសាទរជូនលោក Nguyen Xuan Phuc បន្ទាប់ពីលោកត្រូវបានរដ្ឋសភា វៀតណាមបោះឆ្នោតជ្រើសតាំងជាប្រធានរដ្ឋផងដែរ។

មិត្តអ្នកស្ដាប់ ហាក់ ណារិទ្ធ នៅទីក្រុងភ្នំពេញ បានផ្ញើរយោបល់ដោយអបអរសាទរវៀតណាមនៅពេលចូលកាន់តំណែងជាប្រធានក្រុមប្រឹក្សាសន្តិសុខអង្គការសហប្រជាជាតិលើកទី២ក្នុងអាណត្តិជាសមាជិកមិនអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិ (អ.ស.ប) ឆ្នាំ២០២០-២០២១ ព្រមទាំងដាក់សំណួរថា តើលើកដំបូងចូលកាន់មុខតំណែងខាងលើ វៀតណាមមានគំនិតផ្ដួចផ្ដើមអ្វីៗខ្លះ?

 

សម័យប្រជុំពិភាក្សាបើកចំហ ក្រោមអធិបតីភាពឧបនាយករដ្ឋមន្រ្តីនិងជារដ្ឋមន្រ្តីការបរទេសវៀតណាម លោក Pham Binh Minh បានទាក់ទាញសុន្ទរកថាចំនួន១១១ ដែលជាចំនួនអ្នកចូលរួមខ្ពស់បំផុតក្នុងប្រវត្តិសាស្ត្រនៃសម័យប្រជុំពិភាក្សាបើកចំហរបស់អ.ស.ប។
 

លោកអ្នកនាងនិងប្រិយមិត្តជាទីមេត្រី! មុនខែមេសាឆ្នាំ២០២១ វៀតណាមធ្លាប់បានកាន់តំណែងជាប្រធានក្រុមប្រឹក្សាសន្តិសុខនាខែមករាឆ្នាំ២០២០ ក្នុងអាណត្តិជាសមាជិកមិនអចិន្រ្តៃយ៍នៃក្រុមប្រឹក្សាសន្តិសុខអ.ស.ប។ ក្នុងនាមជាប្រធានក្រុមប្រឹក្សាសន្តិសុខក្នុងខែដំបូងនៃឆ្នាំគម្រប់ខួប ៧៥ ឆ្នាំនៃធម្មនុញ្ញអ.ស.បនោះ វៀតណាមបានជ្រើសរើសមូលបទអាទិភាពក្នុងខែនោះ គឺ “ជំរុញការគោរពធម្មនុញ្ញអ.ស.បដើម្បីរក្សាសន្តិភាពនិងសន្តិសុខអន្តរជាតិ”។ សម័យប្រជុំពិភាក្សាបើកចំហ ក្រោមអធិបតីភាពឧបនាយករដ្ឋមន្រ្តីនិងជារដ្ឋមន្រ្តីការបរទេសវៀតណាម លោក Pham Binh Minh បានទាក់ទាញសុន្ទរកថាចំនួន១១១ ដែលជាចំនួនអ្នកចូលរួមខ្ពស់បំផុតក្នុងប្រវត្តិសាស្ត្រនៃសម័យប្រជុំពិភាក្សាបើកចំហរបស់អ.ស.ប។ វៀតណាមក៏មានគំនិតផ្ដួចផ្ដើមអំពីការរៀបចំកិច្ចប្រជុំដើមដំបូងរវាងអ.ស.បនិងអាស៊ាននៅក្រុមប្រឹក្សាសន្តិសុខ អំពីការជំរុញកិច្ចសហប្រតិបត្តិការគ្រប់ជ្រុងជ្រោយ ប្រកបដោយប្រសិទ្ធភាពរវាងអង្គការទាំងពីរ ដែលផ្ដោតសំខាន់ទៅលើវិស័យអាទិភាពនានាដូចជា៖ ការដោះស្រាយជម្លោះដោយសន្តិវិធី ការទូតទប់ស្កាត់ ការរំសាយសព្វាវុធ ការរក្សាសន្តិភាព ការប្រយុទ្ធប្រឆាំងនឹងភេរវកម្ម កិច្ចសហប្រតិបត្តិការសមុទ្រនិងសន្តិសុខនាវាចរណ៍ ជាដើម។

ពាក់ព័ន្ធដល់វិស័យវប្បធម៌-សង្គម ក្នុងសប្ដាហ៍កន្លងមក មិត្តអ្នកស្ដាប់ ថាច់ ស៊ីញ ជនជាតិខ្មែរម្នាក់ដែលកំពុងរស់នៅខេត្ត Binh Phuoc បានផ្ញើរសំបុត្រមកកាន់កម្មវិធីដើម្បីចែករំលែកក្ដីសប្បាយរីករាយនិងមោទនភាពនៅពេលដែលពិធី យកត្រពាំងរបស់ជនជាតិខ្មែរនៅខេត្ត Binh Phuoc ត្រូវបានទទួលស្គាល់ជាបេតិកភ័ណ្ឌវប្បធម៌អរូបិយ៍ជាតិ ហើយសម្ដែងក្ដីសង្ឃឹមថា កម្មវិធីនឹងណែនាំពីពិធីដ៏វិសេសវិសាលនេះទៅកាន់សំណាក់មិត្តអ្នកស្ដាប់និងមិត្តអ្នកអាន។

 

ប្រជាជនខេត្ត Binh Phuoc ចូលរួមពិធីយកត្រពាំង។
 

បាទ! ដូចដែលបំណងរបស់មិត្តអ្នកស្ដាប់ ថាច់ ស៊ីញ ដែរ យើងខ្ញុំសូមណែនាំត្រួសៗ ពីពិធីយកត្រពាំងប្រពៃណីរបស់ជនជាតិខ្មែរនៅឃុំ Loc Khanh ស្រុក Loc Ninh ខេត្ត Binh Phuoc។ ពិធីយកត្រពាំងត្រូវបានរៀបចំឡើងនៅរដូវប្រាំង មុនបុណ្យចូលឆ្នាំថ្មី។ តាមទំនៀមទំលាប់ ក្រុមព្រឹទ្ធាចារ្យភូមិ នឹងអនុវត្តន៍ពិធីការប្រពៃណីមួយចំនួននិងពិធីសែនទេវតា បួងសួងសុំឲ្យទទួលបានរដូវអំណោយផល សុំឲ្យពិធីយកត្រពាំងប្រព្រឹត្តទៅបានយ៉ាងងាយស្រួល ហើយប្រជាជនប្រមូលបានត្រី បង្គារជាច្រើនផងដែរ។ បន្ទាប់នោះ ប្រជាជនប្រកួតប្រណាំងគ្នាធ្វើការនេសាទដោយឧបករណ៍សាមញ្ញប្រពៃណី។ ផលនេសាទក្នុងពិធីនេះ នឹងត្រូវបានកែច្នៃទៅជាម្ហូបអាហារដ៏ឆ្ងាញ់ពិសារ។ តាមការកំណត់របស់អ្នកភូមិ ត្រពាំងធម្មជាតិគឺជាទ្រព្យសម្បត្តិរួមរបស់សហគមន៍ ដែលបានគ្រប់គ្រងដោយព្រឹទ្ធាចារ្យភូមិ។ ក្នុងរយៈពេលមួយឆ្នាំ ប្រសិនបើគ្មានការអនុញ្ញាតរបស់ព្រឹទ្ធាចារ្យភូមិនោះ គឺគ្មាននរណាម្នាក់មានសិទ្ធិធ្វើការនេសាទនៅក្នុងត្រពាំងឡើយ។ រាល់ការរំលោភបំពានទាំងអស់នឹងត្រូវផាកពិន័យដោយផ្អែកលើកម្រិត។ នេះជារូបភាពវប្បធម៌ប្រជាប្រិយចម្រុះ ដែលបង្កប់នូវតម្លៃវិសេសវិសាលជាច្រើន និងខ្លឹមសារដ៏សម្បូរបែបរបស់ជនជាតិខ្មែរនៅឃុំ Loc Khanh និយាយដោយឡែកនិងខេត្តBinh Phuoc និយាយរួម។

លោកអ្នកនាងនិងប្រិយមិត្តទាំងអស់ជាទីមេត្រី! ខាងលើនេះគឺជាមតិយោបល់និងសំណួរមួយចំនួនរបស់មិត្តអ្នកស្ដាប់ដែលបានផ្ញើរមកកាន់យើងខ្ញុំក្នុងសប្ដាហ៍កន្លងមក។ យើងខ្ញុំសង្ឃឹមថា នឹងបន្តទទួលបានមនោសញ្ចេតនាក៏ដូចជាមតិយោបល់ជាច្រើនថែមទៀតរបស់មិត្តអ្នកស្ដាប់។ សំបុត្ររបស់លោកអ្នក សូមផ្ញើរមកកាន់យើងខ្ញុំតាមអាស័យដ្ឋាន៖ កម្មវិធីផ្សាយជាភាសាខ្មែរ វិទ្យុសម្លេងវៀតណាមលេខ ៤៥ វិថី Ba Trieu ខ័ណ្ឌ Hoan Kiem រដ្ឋធានីហាណូយឬអ៊ីម៉ែល៖ vov5khmer@gmail.com៕

តាម VOV5 - វិទ្យុសំឡេងវៀតណាម

បណ្តាព័ត៌មានបានផ្សាយ