ດ້ວຍການເຂົ້າຮ່ວມຂອງຜູ້ແທນກ່ວາ 90 ທ່ານ ລວມມີເຈົ້າໜ້າທີ່ລັດຖະບານ, ນັກຄົ້ນຄວ້າທີ່ມາຈາກ 10 ປະເທດ ອາຊຽນ, 8 ປະເທດຄູ່ຮ່ວມມືຄູ່ເຈລະຈາ, ຄະນະເລຂາ ອາຊຽນ ແລະ ບາງອົງການຈັດຕັ້ງສາກົນທີ່ກ່ຽວຂ້ອງ.
ເວທີປາໄສທະເລ ອາຊຽນ ຄັ້ງທີ 9 ແລະ ເວທີປາໄສທະເລ ອາຊຽນ ເປີດກ້ວາງຄັ້ງທີ 7 (ພາບ: TTXVN)
ນະທີ່ນີ້, ບັນດາຜູ້ແທນໄດ້ສະແດງຄວາມວິຕົກກັງວົນກ່ຽວກັບບັນດາການຜັນແປຢ່າງສັບສົນຢູ່ທະເລຕາເວັນອອກ, ເປັນຕົ້ນແມ່ນສະພາບຫັນເປັນການທະຫານໃນໂຄງປະກອບຂັດແຍ້ງ, ລະເມີດກົດໝາຍສາກົນ, ກີດຂວາງບັນດາປະເທດແຄມທະເລຂຸດຄົ້ນຊັບພະຍາກອນຢູ່ບັນດາເຂດທະເລຂອງຕົນຕາມຂໍ້ກຳນົດຂອງສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລ 1982 (UNCLOS). ບັນດາຜູ້ແທນກໍ່ປາດຖະໜາວ່າ ອາຊຽນ ແລະ ຈີນ ຈະບັນລຸໄດ້ກົດແຫ່ງການປະພຶດຢູ່ທະເລຕາເວັນອອກໂດຍໄວ, ມີຜົນສັກສິດ, ມີປະສິດທິຜົນ, ເໝາະສົມກັບກົດໝາຍສາກົນ ແລະ UNCLOS.
ທີ່ວາລະປຶກສາຫາລພິເສດ ເນື່ອງໃນໂອກາດສະເຫຼີມສະຫຼອງ 25 ປີແຫ່ງວັນສົນທິສັນຍາກົດໝາຍວ່າດ້ວຍທະເລ 1982 ມີຜົນສັກສິດ, ບັນດາຜູ້ແທນລ້ວນແຕ່ຢັ້ງຢືນຄວາມສຳຄັນຂອງສົນທິສັນຍາກົດໝາຍວ່າດ້ວຍທະເລໃນບົດບາດ "ລັດຖະທຳມະນຸນຂອງມະຫາສະໝຸດ". ຕາມນັ້ນແລ້ວ, ຜູ້ແທນຫລາຍທ່ານໄດ້ສະແດງຄວາມວິຕົກກັງວົນຕໍ່ບັນດາການກະທຳລະເມີດສົນທິສັນຍາກົດໝາຍວ່າດ້ວຍທະເລທີ່ເກີດຂຶ້ນໃນໄລຍະມໍ່ໆມານີ້ຢູ່ທະເລຕາເວັນອອກ.
ກ່ຽວກັບການກຳນົດທິດໃນໄລຍະຈະມາເຖິງ, ບັນດາຜູ້ແທນກໍ່ເຫັນດີເປັນເອກະພາບຄວນປັບປຸງບົດບາດຂອງເວທີປາໄສທະເລ ອາຊຽນ ແລະ ເວທີປາໄສທະເລ ອາຊຽນ ເປີດກ້ວາງ, ເປັນຕົ້ນແມ່ນໃນການແບ່ງປັນຂໍ້ມູນຂ່າວສານ ແລະ ປະສານງານການເຄື່ອນໄຫວຮ່ວມມື ແນໃສ່ຍົກສູງປະສິດທິຜົນ ແລະ ຫຼີກລ້ຽງການຊ້ຳຊ້ອນກັນ.
(ແຫຼ່ງຄັດຈາກ VOV)
