ທ່ານພົນໂທ ຫງວຽນຈີ໊ວິ້ງ, ຮອງລັດຖະມົນຕີກະຊວງປ້ອງກັນປະເທດຫວຽດນາມ
ໃນການເຈລະຈາທາງອອນລາຍ ທີ່ຖືກຈັດຂຶ້ນໃນຕອນເຊົ້າວັນທີ10 ກໍລະກົດ ລະຫວ່າງທ່ານພົນໂທ ຫງວຽນຈີ໊ວິ້ງ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ກັບທ່ານ Atul Khare ຮອງເລຂາທິການໃຫຍ່ ສປຊ, ທ່ານ Atul Khare ໄດ້ຊົມເຊີຍຄວາມມານະພະຍາຍາມ ແລະ ໝາກຜົນຂອງຫວຽດນາມໃນວຽກງານປ້ອງກັນ, ສະກັດກັ້ນໂລກລະບາດໂຄວິດ - 19, ໃນນັ້ນ ມີກໍາລັງຮັກສາສັນຕິພາບ ເຊິ່ງພວມຜັນຂະຫຍາຍຢູ່ ຊູດັງໃຕ້ ແລະ ອາຟະລິກາກາງ. ສອງຝ່າຍກໍໄດ້ແລກປ່ຽນ ແລະ ສະເໜີຫຼາຍແຜນການຮ່ວມມືລະອຽດໃນໄລຍະຈະມາເຖິງ. ກ່າວຄໍາເຫັນທີ່ການເຈລະຈາ, ທ່ານພົນໂທ ຫງວຽນຈີ໊ວິ້ງ ໄດ້ແຈ້ງໃຫ້ຊາບກ່ຽວກັບໝາກຜົນຂອງການເຂົ້າຮ່ວມການເຄື່ອນໄຫວຮັກສາສັນຕິພາບ ສປຊ ຂອງຫວຽດນາມ ໃນໄລຍະຜ່ານມາ ແລະ ການເຄື່ອນໄຫວສໍາຄັນຈໍານວນໜຶ່ງຂອງຫວຽດນາມ ໃນຂົງເຂດປ້ອງກັນຊາດ ໃນປີເປັນປະທານ ອາຊຽນ. ທ່ານຢັ້ງຢືນວ່າ: ກະຊວງປ້ອງກັນປະເທດຫວຽດນາມ ຈະສືບຕໍ່ປະຕິບັດບັນດາໂຄງການດໍາເນີນງານຈຸດສຸມທີ່ຍັງເຫຼືອໃນປີ 2020. ທ່ານກ່າວວ່າ:
“ການເຄື່ອນໄຫວທີ່ໜ້າສົນໃຈໃນໄລຍະຈະມາເຖິງແມ່ນ ຈັດຕັ້ງກອງປະຊຸມ “ແມ່ຍິງ ກັບການເຄື່ອນໄຫວຮັກສາສັນຕິພາບ ສປຊ” ເຊິ່ງຈະຈັດຕັ້ງໃນທ້າຍປີ 2020 ຫຼື ໃນປີ 2021. ຄາດວ່າ, ຫວຽດນາມ ຈະສ້າງຕັ້ງສູນຮັກສາສັນຕິພາບ ພາກພື້ນ ອາຊີປາຊີຟິກ ດ້ວຍບັນດາຂົງເຂດຄື ຝຶກແອບ, ແບ່ງປັນບົດຮຽນ, ປະສົບການ, ຍົກສູງກໍາລັງຄວາມສາມາດໃຫ້ແກ່ກໍາລັງຮັກສາສັນຕິພາບຂອງພາກພື້ນ. ຫວຽດນາມ ມີຄວາມປາດຖະໜາວ່າ ສປຊ ຈະສົມທົບເພື່ອສ້າງຕັ້ງສູນດັ່ງກ່າວຕາມຮູບແບບທີ່ເໝາະສົມ”.ນະທີ່ນີ້, ສອງຝ່າຍກໍໄດ້ປຶກສາຫາລືກ່ຽວກັບການເຄື່ອນໄຫວຈຸດສຸມຈໍານວນໜຶ່ງຂອງຫວຽດນາມໃນປີດໍາລົງຕໍາແໜ່ງຄວບຄູ່: ເປັນປະທານ ອາຊຽນ ແລະເປັນກໍາມະການບໍ່ປະຈໍາການສະພາຄວາມໝັ້ນຄົງ ສປຊ. ທ່ານຮອງເລຂາທິການໃຫຍ່ ສປຊ Atul Khare ກໍສະແດງການສະໜັບສະໜູນຕໍ່ບາງເນື້ອໃນ, ຂໍ້ລິເລີ່ມ, ແຜນການຈັດຕັ້ງບັນດາກິດຈະກໍາເຄື່ອນໄຫວຂອງຫວຽດນາມ.
(ແຫຼ່ງຄັດຈາກ VOV)
