ບັນດາລັດຖະມົນຕີ ເຂົ້າຮ່ວມກອງປະຊຸມ
ພາບ:vietnam+
ນີ້ ແມ່ນສອງກອງປະຊຸມສຸດທ້າຍ ອັດສັບປະດາ ກອງປະຊຸມລັດຖະມົນຕີ ການຕ່າງປະເທດ ອາຊຽນ ຄັ້ງທີ 52 ແລະ ບັນດາກອງປະຊຸມກ່ຽວຂ້ອງ. ທ່ານຮອງນາຍົກລັດຖະມົນຕີ ຫວຽດນາມ ຟ້າມບີງມີງ ນຳຫນ້າ ຄະນະຜູ້ແທນຫວຽດນາມ ເຂົ້າຮ່ວມກອງປະຊຸມ.
ທີ່ກອງປະຊຸມ ລັດຖະມົນຕີການຕ່າງປະເທດ ຮ່ວມມື ແມ່ຂອງ - ສເກົາຫລີ ຄັ້ງທີ 9, ບັນດາທ່ານລັດຖະມົນຕີ ໄດ້ເຫັນດີ ສືບຕໍ່ຜັນຂະຫຍາຍບັນດາໂຄງການຮ່ວມມືບຸລິມະສິດໃນແຜນການດຳເນີນງານ, ສຸມໃສ່ປະຕິບັດບັນດາໂຄງການ ເພື່ອປະກອບສ່ວນໃຫ້ແກ່ການພັດທະນາແບບຍືນຍົງ, ໃນນັ້ນ ມີການຄຸ້ມຄອງ ແລະ ນຳໃຊ້ແຫລ່ງນ້ຳແບບຍືນຍົງ ແລະ ສົມທົບຢ່າງແຫນ້ນແຟ້ນກັບ ຄະນະກຳມາທິການແມ່ຂອງ.
ທີ່ກອງປະຊຸມ ລັດຖະມົນຕີ ຮ່ວມມື ແມ່ຂອງ - ຍີ່ປຸ່ນ ຄັ້ງທີ 12, ບັນດາທ່ານລັດຖະມົນຕີ ເນັ້ນຫນັກເຖິງຄວາມສຳຄັນຂອງການພັດທະນາເສດຖະກິດເໝາະສົມກັບການປົກປັກຮັກສາສິ່ງແວດລ້ອມ, ຫລຸດຜ່ອນໄພທຳມະຊາດ, ເພີ່ມຄວາມສາມາດຮັບມືກັບການປ່ຽນແປງຂອງດິນຟ້າອາກາດ, ການນຳໃຊ້ ແລະ ຄຸ້ມຄອງແຫລ່ງນ້ຳຢູ່ແມ່ນ້ຳຂອງໃຫ້ໝັ້ນຄົງ. ບັນດາທ່ານລັດຖະມົນຕີ ກໍ່ຊົມເຊີຍ ຍີ່ປຸ່ນ ແລະ ອາເມລິກາ ມີຂໍ້ລິເລີ່ມສ້າງ “ຄູ່ຮ່ວມມືພະລັງງານເຂດແມ່ນ້ຳຂອງ” ເພື່ອແນໃສ່ຫນູນຊ່ວຍບັນດາປະເທດແມ່ຂອງພັດທະນາ ແລະ ຮັບປະກັນຄວາມໝັ້ນຄົງດ້ານພະລັງງານແບບຍືນຍົງ.
ກ່າວຄຳເຫັນທີ່ກອງປະຊຸມໃນຕອນເຊົ້າວັນທີ 3 ສິງຫາ, ທ່ານ ຟ້າມບີງມີງ ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ສະເຫນີ ບາງເນື້ອໃນຮ່ວມມືລະຫວ່າງ ແມ່ຂອງ ກັບ ສເກົາຫລີ ແລະ ຍີ່ປຸ່ນ ໃນໄລຍະຈະມາເຖິງ ວ່າ: ຄວນຫນູນຊ່ວຍບັນດາປະເທດ ແມ່ຂອງ ແກ້ໄຂບັນດາບັນຫາກ່ຽວກັບການປ່ຽນແປງຂອງດິນຟ້າອາກາດ, ສິ່ງແວດລ້ອມ, ຄຸ້ມຄອງ ແລະ ນຳໃຊ້ຊັບພະຍາກອນນ້ຳ ຢູ່ ແມ່ນ້ຳຂອງ ແບບຍືນຍົງ.
(ແຫຼ່ງຄັດຈາກ VOV)
