ຕອນເຊົ້າວັນທີ 20 ຕຸລາ, ກອງປະຊຸມສະໄໝສາມັນເທື່ອທີ 2 ສະພາແຫ່ງຊາດຫວຽດນາມ ຊຸດທີ XV ຖືກໄຂຂຶ້ນຢ່າງສົມກຽດຕາມຮູບແບບທາງໄກ. ພິທີໄຂໄດ້ຖ່າຍຖອດທາງໄກຈາກສຳນັກງານສະພາແຫ່ງຊາດ ດ້ວຍການເຊື່ອມຕໍ່ກກັບ 62 ສະຖານທີ່ຄະນະສະມາຊິກສະພາແຫ່ງຊາດຢູ່ແຂວງ, ນະຄອນຕ່າງໆ. ເຂົ້າຮ່ວມພິທີໄຂຢູ່ສະຖານທີ່ເຊື່ອມຕໍ່ທີ່ຫໍປະຊຸມ ຢຽນຮົ່ງ (ຮ່າໂນ້ຍ), ມີທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຝູຈ້ອງ, ທ່ານປະທານປະເທດ ຫງວຽນຊວັນຟຸກ, ທ່ານນາຍົກລັດຖະມົນຕີ ຟ້າມມິງຈິງ, ທ່ານປະທານສະພາແຫ່ງຊາດ ເວືອງດິ່ງເຫ້ວ, ບັນດາແຂກຖືກເຊີນສາກົນ ພ້ອມດ້ວຍສະມາຊິກສະພາແຫ່ງຊາດຊຸດທີ XV ຈຳນວນໜຶ່ງ
ໂດຍດຳເນີນໃນສະພາບໂລກລະບາດໂຄວິດ-19 ພວມມີການຜັນແປຢ່າງສັບສົນ, ໃນວາລະໄຂ, ສະພາແຫ່ງຊາດໄດ້ສະຫງວນເວລາ 1 ນາທີກົ້ມຫົວໄວ້ອາໄລແກ່ດວງວິນຍານປະຊາຊົນ, ພະນັກງານ, ນັກຮົບທີ່ເສຍສະຫຼະຊີວິດຍ້ອນໂລກລະບາດໂຄວິດ-19.
ທີ່ກອງປະຊຸມ, ເມື່ອເຕື້ອງເຖິງເນື້ອໃນກອງປະຊຸມຄັ້ງນີ້, ທ່ານປະທານສະພາແຫ່ງຊາດ ເວືອງດິ່ງເຫ້ວ, ໃຫ້ຮູ້ວ່າ:
“ສະພາແຫ່ງຊາດຈະພິຈາລະນາ, ຮັບຮອງເອົາຮ່າງກົດໝາຍ 2 ສະບັບ, ຮ່າງມະຕິ 5 ສະບັບ, ພິຈາລະນາ, ປະກອບຄຳເຫັນໃສ່ຮ່າງກົດໝາຍອື່ນ 5 ສະບັບຕື່ມອີກ. ສະພາແຫ່ງຊາດຈະພິຈາລະນາບົດລາຍງານຂອງລັດຖະບານກ່ຽວກັບການຕີລາຄາໝາກຜົນການປະຕິບັດແຜນການພັດທະນາເສດຖະກິດ-ສັງຄົມ ແລະ ຂຶ້ນແຜນງົບປະມານແຫ່ງລັດປີ 2021; ພິຈາລະນາ ແລະ ຕົກລົງແຜນການພັດທະນາເສດຖະກິດ-ສັງຄົມປີ 2022, ການຂຶ້ນແຜນງົບປະມານແຫ່ງລັດ ແລະ ວິທີຈັດແບ່ງງົບປະມານສູນກາງປີ 2022; ວຽກງານປ້ອງກັນ, ຕ້ານໂລກລະບາດໂຄວິດ-19; ພິຈາລະນາ, ຕົກລົງແຜນການສ້າງໂຄງປະກອບພື້ນຖານເສດຖະກິດຄືນໃໝ່ໄລຍະ 2021-2025…”
ພາຍຫຼັງພິທີໄຂຂອງທ່ານປະທານສະພາແຫ່ງຊາດ ເວືອງດິ່ງເຫ້ວ, ທ່ານນາຍົກລັດຖະມົນຕີ ຟ້າມມິນຈິງ ໄດ້ສະເໜີບົດລາຍງານປະກາດໝາກຜົນການປະຕິບັດແຜນການພັດທະນາເສດຖະກິດ-ສັງຄົມປີ 2021, ຄາດຄະເນແຜນການພັດທະນາເສດຖະກິດ-ສັງຄົມປີ 2022, ໃນນັ້ນມີວຽກງານປ້ອງກັນ, ຕ້ານໂລກລະບາດໂຄວິດ-19.
