ພາຍຫຼັງປະຕິບັດມາເປັນເວລາ 1 ປີ, ສັນຍາສະບັບດັ່ງກ່າວ ໄດ້ສ້າງກອບນິຕິກຳທີ່ສະດວກໃຫ້ແກ່ການແລກປ່ຽນການຄ້າລະຫວ່າງສອງຝ່າຍ ແລະ ນຳມາເຊິ່ງແຫຼ່ງກຳລັງໜູນໃໝ່ໃຫ້ແກ່ການຮ່ວມມືເສດຖະກິດ ລະຫວ່າງ ຫວຽດນາມ ແລະ ອີຢູ. ທ່ານ ຫງວຽນວັນຖາວ ເອກອັກຄະລັດຖະທູດ ຫວຽດນາມ ປະຈຳ ລາຊະອານາຈັກ ແບນຊິກ ແລະ Luxembourg ທັງເປັນຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ອີຢູ ໄດ້ຕີລາຄາວ່າ: ເຖິງວ່າ ຖືກຜົນກະທົບຈາກໂລກລະບາດໂຄວິດ -19 ກໍຕາມ, ແຕ່ວົງເງິນການຄ້າສອງສົ້ນ ລະຫວ່າງ ຫວຽດນາມ - ອີຢູ ໃນໄລຍະ 5 ເດືອນທ້າຍປີ 2020 ຍັງມີການເຕີມໂຕຢູ່ໃນລະດັບ 4,5%. ເຖິງວ່າ ຕົວເລກດັ່ງກ່າວຍັງຕ່ຳກໍຕາມ ແຕ່ຖ້າປຽບທຽບໃນສະພາບຂອງປີ 2020, ເມື່ອ GDP ຂອງ ອີຢູ ຫຼຸດລົງ 6,2% ນັ້ນ ພັດແມ່ນໝາກຜົນທີ່ໜ້າຊື່ນຊົມ. ບໍ່ພຽງແຕ່ເທົ່ານັ້ນ, ໃນໄຕມາດທີ 1 ປີ 2021, ລະດັບການເຕີບໂຕເສດຖະກິດ ອີຢູ ຫຼຸດລົງ 0,4%, ແຕ່ວົງເງິນການຄ້າສອງສົ້ນຍັງເພີ່ມຂຶ້ນ 15%. ສິ່ງດັ່ງກ່າວໄດ້ຢັ້ງຢືນໃຫ້ເຫັນຜົນປະໂຫຍດຫຼາຍຢ່າງຂອງສັນຍາ EVFTA.
ຕາມທ່ານເອກອັກຄະລັດຖະທູດ ຫງວຽນວັນຖາວ ແລ້ວ, ຄວາມສາມາດບົ່ມຊ້ອນລະຫວ່າງ ຫວຽດນາມ ແລະ ອີຢູ ຍັງໃຫຍ່ຫຼວງຢູ່. ບັນດາປະເທດ ອີຢູ ມີຄວາມຕ້ອງການນຳເຂົ້າບັນດາຜະລິດຕະພັນກະເສດ - ເຄື່ອງປາຂອງດົງ - ສິນໃນນ້ຳ - ສິນທະເລ ນອກກຸ່ມ ຢູ່ໃນລະດັບກວ່າ 150 ຕື້ USD ຕໍ່ປີ, ໃນຂະນະນັ້ນ, ວົງເງິນສົ່ງອອກບັນດາຜະລິດຕະພັນດັ່ງກ່າວຂອງ ຫວຽດນາມ ໄປຍັງ ອີຢູ ຫາກໍຢູ່ໃນລະດັບປະມານ 5 ຕື້ USD ເທົ່ານັ້ນ. ພ້ອມກັນນັ້ນ ແມ່ນບັນດາບຸລິມະສິດຈາກ EVFTA ດ້ວຍອັດຕາພາສີ 0% ພ້ອມກັບບັນດາເງື່ອນໄຂການຄ້າທີ່ມີຄວາມກົມກ່ຽວ ຈະຊ່ວຍໃຫ້ວົງເງິນສົ່ງອອກຂອງ ຫວຽດນາມ ໄປຍັງ ອີຢູ ເພີ່ມຂຶ້ນຫຼາຍກວ່າອີກ./.
(ແຫຼ່ງຄັດຈາກ VOV)
